Flight Report SQ318 SIN - LHR 18 Sep 2022
本帖最後由 okt05032 於 2022-11-21 23:55 編輯前程提要：https://www.hkitalk.net/HKiTalk2/thread-2157148-1-1.html新加坡並唔係小弟嘅終點站，喺新加坡留咗超過13個鐘頭之後，小弟終於要上機前往我嘅最終目的地：倫敦希斯路。航班編號：SQ318飛行日期：18-09-2022 座位：16A/ 17D 機型: B777-300ER 註冊號: 9V-SNA飛行時間：13小時40分鐘 計劃出發時間STD：12:35 GMT+8 降落時間：18-09-2022 19:15 GMT3號客運大樓係新加坡航空嘅大本營。佢哋嘅商務艙貴賓室銀刃貴賓室(Silver Kris Lounge)今年完成翻新啱啱對外開放。新航斥資超過3,600萬美金為其進行翻新，新貴賓室面積增加至32,000平方呎。 並且歡迎新航及星空聯盟成員商務艙乘客使用。貴賓室內設置多個區域，首先是休息區。區內放置大量梳化及辦公枱，另外放置半開放式座椅比一啲注重私隱嘅客人使用。之後就係用餐區，呢度啲嘢食係用自助形式供應，仲有唔少Live Stations 例如提供即叫即煮嘅英式早餐、椰漿飯、喇沙。選擇都非常之多。如果趕時間嘅話佢哋亦都有一啲包好嘅三文治俾你即刻攞走。即叫即煮嘅喇沙十分之好食，小弟食完之後爭啲想食多碗。貴賓室提供唔少嘅紅白餐酒同埋烈酒選擇，茶包亦都用上TWG嘅產品。另外呢度都有提供淋浴間同埋免治馬桶，小弟上機前都決定沖返個涼先。小弟大概留咗喺貴賓室三個鐘頭之後就行咗去登機閘口，。樟宜機場嘅設計同其他機場唔同， 佢哋係去到登機閘口之後先至會做安檢，而唔係好似香港咁一入禁區即刻做。行去閘口中途遇到一架新加坡航空嘅A380。當日SQ318使用A11閘口，另一邊就係越捷航空嘅VJ812前往胡志明市。今次帶我去倫敦希斯路嘅就係註冊號9V-SNA嘅波音777-300ER，佢喺2015年3月交付到新加坡航空手上。 (賣出的機票數量/ 載客量)F: 5/4J: 46/48Y+:28/28Y: 210/184當時新航每日有四班機前往倫敦，SQ318係最遲抵達，但係都仍然非常之多人。頭等艙同埋經濟艙更加係超賣，聽返啲空中服務員講，有一位頭等貴賓要被迫轉去商務艙。同上一程SQ895一樣，呢一班機都係配置2013年推出嘅商務客位。 今日小弟原本係揀咗座位16A，但係後來張凳壞咗調教唔到角度，於是小弟就調咗去17D。每個座位都擺咗一支礦泉水同埋一副降噪耳機，迎賓飲品方便小弟就揀咗橙汁。上機後冇幾耐就開始Push back，滑行去跑道，途中小弟見到其中一架封存緊嘅新航A380 。航班大約1:00滑行至跑道20L起飛， 帶我哋前往倫敦。航班提供源自英國Penhaligon's 嘅過夜包，但係我需要問空姐佢哋先至會派俾我。 入邊有潤唇膏、潤手霜、同埋保濕噴霧。入邊嘅物品都比小弟想像中少。
航班於起飛後10分鐘開始供應午餐。 先來嘅就係開胃菜新航嘅招牌雞肉沙嗲。 配上甜甜地嘅花生醬簡直係天衣無縫，由於太好食小弟決定問空中服務員攞多碟。
前菜：三文魚沙律配油醋汁。
主菜：招牌烤焗龍蝦(名廚有約選項) 小弟好耐之前就聽過新航嘅龍蝦係好出名。今次終於都試到，龍蝦肉爽滑彈牙，香味四溢。可以話係小弟食過嘅最好嘅一餐飛機餐。
甜品：朱古力雲呢拿雪糕以及芝士拼盤。
食完飯之後空中服務員就將機艙嘅燈光調暗，小弟亦都叫佢哋過嚟幫手將我個位調校成一張闊28吋長78吋嘅睡床。 因為座椅設計問題，瞓覺時我要將對腳塞入去電視機右下角個窿仔度，換句話講即係我個人係要打斜瞓。
起飛之後八個鐘，空中服務員就將機艙嘅燈光較光開始供應晚餐
前菜：炙燒胡椒香脆吞拿魚配蟹肉。吞拿魚食落都幾新鮮冇腥味，配搭檸檬汁同埋蟹肉沙律非常之開胃。(同香港去新加坡嗰一程一模一樣......)
主菜:文東記海南雞飯(名廚有約選項)，呢個海南雞飯係其中一項為咗慶祝新加坡的小販文化獲選為「聯合國教科文組織人類非物質文化遺產」推出嘅小販文化企劃飛機餐，新航同佢地嘅機上餐飲夥伴 SATS合作製作的一系列知名小販道地美食。 除咗文東記海南雞飯， 仲提供松發肉骨茶、榜鵝椰漿飯、美芝律大蝦麵等等。同樣地小弟都係諗住去到英國未必成日有得食東南亞嘢，所以揀咗呢個雞飯。雞嘅份量都比較多都幾慷慨，可惜嘅係，佢配搭嘅汁預先淋左係啲雞嗰度，結果整淋左啲飯。小弟之後都同空姐反映番呢個問題。
甜品: 檸檬慕絲蛋糕
大約五個鐘頭之後，機場就將飛機降落倫敦希斯路機場。 歷時超過13個鐘嘅航程終於完結。 小弟以前成日睇SQ嘅廣告，佢哋有句口號叫 Singapore Girl, a greatway to fly. 呢個旅程可以話係體會到乜嘢叫A greatway to fly
希望將來可以有機會試吓SQ嘅其他產品。 非常羨慕，大開眼界。
香港機場仍然半個死城（好多餐廳都唔開，或只開中段時間），可能因此比平時有更多比例乘客想入lounge食野。龍蝦同海南雞飯睇到我流晒口水。:P
想問如何得知load factor，係咪直接問FA？
DIH 發表於 2022-11-21 10:27
非常羨慕，大開眼界。
香港機場仍然半個死城（好多餐廳都唔開，或只開中段時間），可能因此比平時有更多比 ...
有兩個方法，你可以問地勤/空姐攞。但係我係新加坡問地勤佢哋就唔方便透露。
超賣咁多唔知點安排啲客呢🥴 一張去英國既j class機票都唔平，真係富貴
Fuk19805 發表於 2022-11-21 20:31
超賣咁多唔知點安排啲客呢🥴
我諗同一般 overbooking 一樣，搵志願者搭遲一班機，賠返錢、酒店住宿或其他福利
SQ SIN - LHR 一日有幾班機，部分仲係 A380 執飛，應該唔會班班都咁爆掛?
唔成功或者會強行拖人落機... 回樓主：龍蝦同海南雞飯都係小弟睇人介紹 book the cook 嘅名菜，估唔到樓主有幸一程機入面食晒~
SQ 亦都出名 Y class 有 amenity kit 而 J class 唔會派，原來 J class 都係有嘅，亦係有悉心設計過；但好奇機組 stock amenity kit, 真係純粹預備 provide on request?
搭 Business Class 好多時都係想有得躺平、好好休息，如果 recline 唔到又無得換位都幾大鑊下
但 A 轉去 D 又會無咗窗口位...
聽人講過 SQ J class 隻腳係要斜放先伸得直，唔知係咪真?
Waiyin12 發表於 2022-11-28 05:34
回樓主：龍蝦同海南雞飯都係小弟睇人介紹 book the cook 嘅名菜，估唔到樓主有幸一程機入面食晒~
SQ 亦都出 ...
Amenity kit 由起飛到降落都唔見有空姐派。應該都係on request base
雖然張凳調校唔到角度，但係bed mode係由凳背反落嚟所以都仲可以瞓到。
冇錯，小弟當時係要打斜瞓嘅，隻腳要塞入去電視機右下角嗰窿仔。
頁:
[1]