[個人建議] 北環+中鐵綫延伸建議

最近出咗個中鐵綫延伸建議，但個人覺得未夠深入社區，所以建議進一步延伸
1. 北環綫延伸
未來粉嶺北新發展區未有規劃鐵路，只有巴士服務，所以，建議將北環綫由古洞站延伸至粉嶺北（中間有上水站再次同東鐵轉乘），車站興建喺聯捷街同和泰街之間一段馬適路地底，同時服務粉嶺北同聯和墟居民，另外亦可以用地下隧道連接粉嶺北同聯和墟各屋苑/屋邨，方便居民乘搭鐵路
然後，北環綫仲可以進一步延伸，設皇后山站同坪輋站，最後去香園圍口岸做總站，方便市民乘搭鐵路北上，減少而家假日B綫排長龍嘅情況

2. 中鐵綫延伸
除咗建議將北環同中鐵合併之外，同時建議喺過咗九龍塘站去啟德站之間加設「東頭站」，為咗配合起站，會同時提早重建東頭邨，將地皮賣畀港鐵發展物業
過咗啟德站之後，喺宏通街同常怡道之間一段啟福道地底興建「常怡道站」，以地下隧道連接Megabox同未來九展新項目，以加快東九龍商業區同新界嘅連接。車站興建期間宏光道以南一段啟福道會封閉，上落觀塘繞道嘅車輛必須用Megabox出入口，去觀塘道就行常怡道同牛頭角道，雅麗道天橋就照常開放但只可以連接觀塘道；然後，喺偉業街近海濱道公園一段地底興建「海濱道站」同近觀塘碼頭一段偉業街地底（駿業街同開源道之間一段）興建「觀塘碼頭站」，以分流觀塘綫
最後，中鐵綫過海前會先喺偉業街同茶果嶺道連接嘅位置興建「茶果嶺站」，然後過海去鰂魚涌站，轉乘港島綫。

呢個走綫連接口岸、北部都會區、上葵涌、東九龍同港島東，令新界居民來往市區更加方便，大家又點睇？