東京同大阪市內公共交通係咪幾乎一定要搭鐵？

每次去，見親Google Map幾乎去邊都係得鐵揀，其他城市唔係咁

唔會
舊年去東京都係靠Google Map搜尋過巴士，亦都搭過幾次

兩大城市有以下特性：
1. 鐵路車站多、覆蓋面廣
2. 十字路口多，市內巴士移動非常慢

例如由大阪駅往天保山海遊館一帶，搭88號巴士要50分以上，搭鐵淨車程約20分、連行路約30分。

N年前同朋友由原宿返池袋，行到好攰唔想出去搭鐵，搭池86號巴士，淨車程約45分，山手線淨車程只係13分。

如果車程與鐵路重疊，搵路程式都會首先推介鐵路。想遊河可以去巴士營運商網站睇下路線圖，搵路程式揀偏好巴士。

DIH 發表於 2026-4-21 14:58
兩大城市有以下特性：
1. 鐵路車站多、覆蓋面廣
2. 十字路口多，市內巴士移動非常慢

2.係咪唔會出現巴士快過鐵？

violet 發表於 2026-4-22 07:00
2.係咪唔會出現巴士快過鐵？

城市咁大，好難斬釘截鐵話「唔會」，鐵路放射線末端如果有直達巴士連接可能快過搭鐵，但旺區、旅遊區多數都係鐵路較快。日本十字路口轉彎要讓行人、右轉要讓對頭車，清車效率極低，越係旺區行車越慢。

若同香港比，香港唔少跨區線行快速公路，英式思維係快路唔另外收錢，出入口設計亦比較靈活，但日式高速公路分得好明顯，上高速要收錢（近年越來越多免費），而且出入口之間有返咁上下距離，城市巴士比較少走上高速公路，而係多作為鐵路輔助角色。某香港巴迷去日本保留舊巴士，佢部城市巴士係唔可以上高速公路。至於長途高速巴士就去到Limousine級數，係另一回事，例如連接機場，部分站點搭高速巴士比較快及方便。

日本偶爾有一些不算高速公路的高規格道路，有分層交匯處行得比較快，一般巴士都可以行，但車速明顯比私家車低一截，遑論同鐵鬥快。日本市區應該無或極少類似龍翔道、告士打道那種沿途無燈又有巴士站的大路。