|
國泰航空CX539 名古屋>香港 商務艙體驗 其實本來係無打算用里程數換機票，但訂票時我同朋友因為回程日子有異決定分開訂所以我就去英航Avios系統看咗名古屋機票，不但有位而且係A350商務艙，咁就可以換啦。揀名古屋嘅理由好簡單，靜岡星期日無香港航班，而且可以去睇飛機就比東京好。
日期：19OCT2025 時間：16:15（16:43）- 19:40（19:55） 航班：CX539 機型：A350-900 B-LRL
首先我哋喺靜岡坐新幹線到名古屋，一落車馬不停蹄趕去名鐵名古屋站，我哋要坐特急列車去名古屋中部國際機場。 前面提到我哋回程日子有異，但最後係朋友時間上唔允許所以要同我同一日走，佢坐香港快運去T2而我坐國泰航空去T1，本以為我哋會喺度分道揚鑣。 辦好手續就直奔去睇787，但787在靠近T2嗰邊，用步行係需要啲時間，扣除去貴賓室坐嘅時間就會壓縮到參觀嘅時間，朋友也請我等埋佢一齊行，時間可能真係唔夠用。 呢架係全球第一架波音787原型機，落戶喺名古屋中部國際機場嘅FLIGHT OF DREAMS空間內靜態展示，一直想去打卡好耐但實在無諗到去名古屋旅遊嘅理由。 實在等唔切就落去週邊商品店行下，行完朋友嚟到我都夠鐘走。蛤唔去仔細睇787？我日日都睇實物仲唔夠？ 離開前再把握時間影影影，就係無攞好角度。 名古屋機場無快速安檢通道，但當天亦唔係太多人好似無乜所謂，直奔去貴賓室坐坐食下午茶。國泰喺名古屋係用環亞貴賓室，問題係環亞貴賓室係信用卡持卡人都可以使用，今次蝕咗一趟商務艙機票。 不過check in時地勤畀咗我一張酒精飲品券，我估信用卡持卡人入去就沒有酒精飲品。 食品種類感覺比香港同桃園機場多，憑剛才張卡仔可以換一杯酒精飲品。 食個咖哩飯加啲配菜，係幾好嘅下午茶。 如果以名古屋機場嘅客流其實呢個個貴賓室也偏小，但開揚嘅空間同可以影飛機確實加分。 今天要坐嘅飛機A350-900，沒諗到到短期內可以再坐一次。 登機閘口同貴賓室有少少距離，要預留充足時間。 返到熟悉的座位，平時屏幕都會亮起顯示座位編號，但今次就無亮起。 本日菜單，主菜有中式、西式跟日式，老實講呢日嘅菜色真係麻麻哋，我揀咗可能係最穩陣嘅中式。 唯一投訴係是酒單上有佢哋自家品牌Betsy 啤酒但佢哋話因為呢條係區域航線所以無供應，咁東京同大阪係例外？ 好高興又再一次見到DREAMLIFTER。 到咗指定高度就開始機上服務，首先上預點嘅Cathy Delight同零食。 前菜係日式料理，精緻度可能不及日系航空公司，但以國泰嚟講已經係正常。 今天吃中式XO醬芹菜炒蝦仁，如果無再加額外嘅辣醬基本上可以話係淡而無味，呢個都係非常國泰。 無Betsy咁飲麒麟都唔係唔得，但我比較喜歡飲朝日。 一如以往以哈根大師雪糕配咖啡收尾，反正其他甜品我還好。 食飽就躺平訓下，機艙會調整燈光方便大家休息。 呢一趟可能是本年度最好的一次短途商務，至少今次機上服務有到位，空服相對過往嘅服務態度已經是最好嘅一次，但明年嘛我想再試日本航空一次。
| 
