"為了配合香港未來新市鎮的發展及集體運輸的需求, 本港公共巴士亦要作出轉變;
現時 9.5 米雙層巴士將被調配行走港島區或一些路窄多彎的山路,
及市區內橫街窄巷。而載客需求較大的主要路線, 將由一批新巴士行走,
新巴士有更大的載客量, 全長有 12 米, 為避免車軸負荷過重, 新巴士有三條車軸,
多扇車門, 以減少乘客上落車的時間。"
(麻帆良市時報記者キズナアイ報導)
はい、ども! キズナアイです~♥
以上嘅一段開場白, 其實係上世紀 80 年代初港英政府時期嘅運輸司,
對未來香港公共巴士服務發出嘅指引, 呢個指引一出兼傳到英國之後,
令英國嘅巴士製造商都感到震驚, 因為呢次係繼九巴 Daimler 34 呎長 CVG 6 (或者丹拿 D 同 E型 "長牛" ),
AEC Regent V 34 呎 "大水牛" 雙層巴士, 以至中巴嘅 36 呎長 Guy Arab V 型 "長龍" 單層巴士之後,
再次要製造超出英國法定長度嘅巴士, 而且由於英國嘅雙層巴士都係以兩軸為主,
各巴士製造商為左要應付香港巴士市場嘅新訴求, 必須各出奇謀,
要喺現有嘅兩軸巴士底盤作出改良, 務求要喺最短時間之內,
搶先一步研製出新巴士比香港客户使用,
而呢場市場嘅決戰亦逐漸變成一場科技與時間嘅競賽,
其中位於伯明翰嘅都城嘉慕 Metro-Cammell Weymann (MCW),
喺短短 5 個月時間, 就宣佈成功研製出兩部樣辦巴土, 比中巴同九巴使用,
並命名為 Super Metrobus, 新巴士使用原廠嘅兩軸 Metrobus 為藍本,
將底盤加長, 再加上俗稱 "假擔" 嘅無動力中軸, 其他機械格局就照兩軸版設計一樣保持不變,
呢個簡單而直接嘅構思造就左呢款 12 米新車嘅誕生, 同時亦證明呢款巴士並冇因為短促嘅研製時間,
而出現任何問題。
九巴嘅首部 Super Metrobus 於 1981 年 4 月同中巴嘅一部同時運抵香港,
而且仲喺當年 5 月初喺中環愛丁堡廣場舉行新車嘅移交儀式,
兩巴巨頭亦有露面主持呢個歷史性時刻,
新車後來並且獲登記車牌為 CN 870, 初期九巴編號為 M1,
但係後來因為兩軸 9.7m Metrobus 嘅引入, 佢地被編為 M 系,
而 CN 870 就被改編為 3M1, 其中 3 係代表 3 軸嘅意思,
後來九巴亦再接收兩部樣辦車, 編號, M2 同 M3,
基於以上原因, 亦被改編為 3M2 同 3M3,
其中 3M3 亦係唯一一架喺香港裝嵌車身嘅 Super Metrobus 12m 樣辦車。
呢三部 3M 都係配上由英國 Rolls Royce 提供嘅 Eagle III 引擎, 馬大高達 230 匹,
係當時香港公共巴士之冠, 但係後來因為方便維修同統一零件嘅關係,
於是被換上 Gardner 6LXCT 引擎, 連接西德 Voith D851 三前速自動波箱,
車身方面就係同廠設計嘅 Apollo 車身, 呢批 3M 初期被派往行走 112 海隧線,
亦有行走部份新界路線, 為日後三軸巴士進軍新界路線作準備,
到後期已經成為荔枝角廠後備車嘅角色, 喺 6, 6B, 6C, 38, 42, 41A, 42A, 42C, 43B, 44M 同 48X 等路線出現,
隨後喺 1995 年開始被先後改裝作訓練巴士, 亦成為九巴車長訓練學校首款 12m 三軸訓練巴士,
等新進學員熟習12m 三軸巴士嘅操控性能, 最後喺 2001 年退役。
呢批 3M 得唔到九巴嘅後繼訂單, 因為九巴當時嘅買車要求,
係要有三扇車門嘅車身規格, 即係前門上車, 兩扇落車門嘅設計,
雖然中巴隨後接收嘅第二架 Super Metrobus 樣辦車, 中巴編號 ML2,
已經做到呢個規格, 但係基於底盤設計上嘅局限,
唔能夠配置較闊嘅兩扇落車門, 大量嘅訂單於是落入 Dennis Dragon 同 Leyland Olympian 手上,
但係佢地嘅高載客量同運作表現亦獲中巴垂青再增購新車,
令 Super Metrobus 喺中巴車隊數目達 84 部之多,
後來九巴為應付一D唔適合 12m 三軸巴士行走嘅路線,
於是決定引入長度減少一米嘅 11m 三軸巴士,
當中亦有向 MCW 訂講 254 部 Metrobus 11m, 成為 MCW 喺香港嘅最大客户,
三軸巴士喺香港得以發揚光大, 今時今日, 隨處可見各式各樣嘅三軸雙層巴士喺市內行走,
為市民服務, MCW 著實為三軸巴士革命嘅先驅者,
可惜 MCW 喺 1980 年代末因為遭遇財政問題,
最後喺 1989 年正式結束業務, 九巴嘅 Metrobus 11m 亦成為 MCW 嘅最後三軸巴士作品。
今日, 麻帆良市隆重歡迎九巴 MCW Super Metrobus 12m 3M3 登場!!
對市長 Super Bus 嚟講,接觸到九巴嘅 Super Metrobus 12m 巴士嘅機會,
遠遠唔及中巴嘅多, 皆因中巴旗下呢款被編號為 ML 嘅大巴,
數目多達 84 架之多, 而且亦因為佢地擁有高達 170 人嘅高載量,
自然亦成為高客量嘅海隧線清客嘅好幫手,
佢話當年佢住紅磡, 要坐 101、106 同 116 過海, 每逢坐中中巴車都一定會坐中呢款 MCW 巴士,
喺港島區, 佢亦坐過呢款車行 70 同 90 入香港仔同鴨脷洲,
相比起九巴只得三架, 而且佢地當時行蹤飄忽, 神出鬼沒, 接觸到佢地嘅機會自然少得多,
Super Bus 話, 佢印象中第一次見到九巴 3M, 已經係 1990 年嘅事,
當時佢喺紅磡廣場嘅新星酒樓門外, 見到一架款式酷似中巴 ML,
但係係九巴色彩嘅巴士行緊 6C, 當時對巴士認識甚少嘅佢,
完全唔知原來九巴都有呢款巴士, 而且當時 6C 係以三門設計嘅 Dennis Dragon 12m 巴士作主力,
對 Super Bus 嚟講有如開心大發現! 後來有機會睇車主雜誌,
其中一期巴士迷專欄介紹三軸巴士, 先至知呢款巴士九巴亦只係入左三架,
亦因為咁, 每次喺街度見到呢款九巴 3M 經過, 佢都一定會望多幾眼,
始終佢覺得呢批 3M 好特別, 可以話係九巴少有嘅車款, 而且佢地四圍調,
唔係咁易見到佢地, 相比之下, 中巴批 ML 佢又反而冇咁特別在意咁
(Super Bus 按: 不過我都會留意, 基本上乜車我都會留意),
或者就係因為中巴 ML 成日喺 101, 106 同 116 呢啲過海線出現, 感覺上較為常見啦,
直到 1996 年巴士大集會, Super Bus 先至有機會近身接觸呢款九巴 3M,
不過其時已經成為九巴嘅訓練巴士, 車上所有座椅已經拆走,
只有下層保留少數座椅比教官同學員使用
Super Bus 話, 九巴冇再增購同款巴士, 誠為可惜,
雖然後來九巴亦有加訂 254 架三軸 Metrobus, 只係長度減少一米成為 11 米車,
亦係 Super Bus 嘅至愛車款, 但係始終唔及 12 米版嘅 Super Metrobus,
比佢有真正嘅九巴身份之餘但係又有中巴影子嘅獨特感覺,
雖然兩者內裏都有不盡相同之處。今日, 我地呢架九巴 3M3,
將佢地當年喺香港掀起嘅一場三軸雙層巴士革命嘅一代傳說,
再度重現大家眼前!!
隆重歡迎! 九巴 MCW Super Metrobus 12m 3M3, 見參!!
始終係非官方出品, 但係今次有埋水貼比玩家 "貼公仔", 實屬難得
證書編號 373, 限量推出 380 架
貼好 "公仔", 正式落地!!
同九巴首架 Super Metrobus M1 (後稱 3M1) 相會
M1 為多年推出嘅樹脂膠車出品, 同今次呢架金屬版分別有幾多?
來一個對比先~~
(按: 架 M1 膠車經過時間洗禮, 車窗雖然冇變形但係已經發黃,
感覺更有以前部份 "熱狗" (非空調) 巴士嘅啡窗 Feel)
九巴 MCW Metrobus 大集會
中九 MCW 12 米巨巴之相會
真車相, 九巴首架 Super Metrobus 3M1 行走 6F 線, 攝於 1995 年旺角京港酒店 (現稱維景酒店) 外,
呢個時候作為荔枝角廠大後備嘅佢, 十足 "牛雜車" 四圍走!
印象中當時 6F 主要使用 11 米三軸巴士行走, 特別係第一、二代嘅 Dennis Dragon 11m 作主力,
當日竟然出現呢架 12 米大巴, 以依家嘅巴士迷口吻, 已經算係 "特見" 啦,
呢張相拍攝之日, 相信距離呢架 3M1 被改作訓練巴士之日亦應該不遠矣...
(按: 當時本人相機性能所限, 劣相一張, 請見諒)
同樣係 3M1, 已經被改裝成訓練巴士, 攝於 1996 年巴士大集會
Thanks for reading~ |
