本人喺italk第一帖,大家多多指教
高鐵撥款塵埃落定,反既繼續反落去,支持既繼續支持,而比人標籤化既鐵迷就繼續比人標籤化,大家繼續自說自話,我當然好明白身為一個"交通愛好者",知道既一定比其他人深入,了解既一定比其他人多.咁其實呢一類資訊,係咪應該同大眾分享,打破上述既困局?
點解高鐵搞到人神共憤?
雖然反對派提供誤導資訊令大眾群起反對高鐵都係其中一個主因,但最重要都係政府九流公關手法,08年高鐵好似喺地底爆出泥咁,之後就刊憲啦,到左09年就話要撥款啦,中途政府做過d咩?網路宣傳?咪又係路政署嗰幾份冇人睇得明既刊憲文件,立法會多字到唔想睇既檔案,再加埋港鐵一d宣傳單張.
咁大家點面對呢種宣傳呢,比個例子
有人問起高鐵做咩
政府就好似同大家講"快囉,促進經濟囉",
我再問"點解促進經濟,點解快啊? "
政府"快咪快囉...快d咪多d人做生意囉,咪促進經濟囉..."
比人搞到一頭霧水之時,反對派就出現啦
"快咩快啊,福田又要停站... "(我相信冇咩香港人知道高鐵車站可以有越行線,大部份仲以為係地鐵咁行,更莫講話動卧)
"吓,港段升到唔夠200公里又要停車?真係心諗一句做乜乜啦 "
"係啊,仲要洗大家一人一萬,快d同我地一齊反高鐵啦 "
於是政府越宣傳,大家就越反對,因為所謂宣傳跟本冇任何說服力,而流行既媒體平台(如facebook,youtube)又比反對派佔領,動之以情既手法有,說之能理(不過大部份都係歪理)有,最重要就係創意滿分(例如嗰個高鐵計算機),喺咁既情況下,政府真係輸到渣都冇得淨.
睇睇呢個帖,人地政府真係做足功課,資料有齊,問答有哂,唔洗好似我咁去大江南北搜羅中國高鐵資料,搵完之後又太多唔等洗野,我固然因為我既興趣去做呢件事,不過大眾一定冇時間同你咁玩,邊個既資料最簡單易明,邊個就係贏家,
喂,高鐵咁快有咩用啊?有咩生活實例?睇睇JR北海道有咩意見.
高鐵搞大工程污染環境?但係得益仲大WO
人地用一個好簡單既PV,幾張漫畫就解決左香港高官要解幾個鐘既問題,所以唔知熟悉高鐵既你,有冇幾會同大家用相同方法去表達呢個工程呢?
如果可以整一個網站,用知識去介紹高鐵,多圖,生動有趣咁去講呢件事,比大眾了解多些,一定可以消去不少誤解
例如講下世界高鐵發展概況
高鐵有咩效能,依家最興講既環保,可持續發展...
西九龍站咩樣,有咩設施,再預算埋到市區各地既交通時間,方法,車費...(好多人都唔知2015年有東西線,中九龍幹線等)
預計下車票價格..(呢個要搵返海子舊post)
國內新站又有咩規模,咩接駁交通...
高鐵有咩班次服務,一日多少班,主要停咩站...(唔可以再比人以為高鐵只可以站站停 )
咩叫8卡穿梭車,16卡長途車,動卧...
車上又有咩設備,由二等軟座去到高包,由廁所去到餐車..
CRH1,2,3,5型車咩來頭,咩性能,點分工..
仲有train kit嗰類小遊戲比人玩下..
大家睇完之後,條氣一定順好多啦,知道既野一定更多啦
呢件事應該唔太難,已經見過太多電腦高手,整左好多一流既鐵路資訊站(例如mtr365,IC呢一類作品...)
主要問題都應該會喺取材方面
不過小弟不才,唔識電腦野,但資料有唔少,不如各位師兄討論下有冇可能完成呢件事,謝謝 |
