本帖最後由 szeto993 於 2023-4-21 21:07 編輯
香港快運航空 UO820/821 香港<>沖繩(那霸) 體驗
*我黃境澤就算餓死都唔會坐廉航,真香.gif
日期:17APR2023 時間:07:00(07:17)-10:30(10:19) 航班:UO820 機型:Airbus A321 B-LEF
事源係疫情期間各界為咗谷針就推出各種抽獎活動,其中機管局向國泰及香港快運購買數萬張機票作抽獎用,其中一部份機票預留予機場員工抽獎,不幸地抽中咗香港快運沖繩來回機票,等待多時終於成功兌換,喺國泰全資擁有之下香港快運究竟會變成點樣?
廉價航空機票平,但計上稅項、機場服務費、燃油附加費等就未必真係比傳統航空公司多好多,是次費用除咗機票免費外,包含各種必須繳付費用、行李及預先揀位共$1912。如果扣除預先揀位(前排/特闊)費用都好,如非必要我都係盡量坐返傳統航空公司為大原則。 首先係出發日,按一般做法提早2小時到機場報到,07:00嘅航班05:00左右已經排滿托運行李嘅旅客,幸好有買U-First得以安心食埋早餐先出境。 當日坐UO820喺26號閘登機,又再一次無得行接駁客運大樓同北衞星客運廊條天橋。 買得U-First當然包括埋優先登機,對於廉航嚟講都幾有用,可以優先放行李喺頭頂行李櫃。 今次坐12F屬於加錢先有嘅特闊座位,錯就錯在呢個位又係面對空姐會有少少尷尬。 座位右方放埋前面2個位嘅安全資訊卡以及機上免稅品雜誌,亦啱啱好可以放得落11吋iPad及一本書。 首次坐香港快運就無法同過往香港航空年代作比較,就咁睇餐單感覺上選擇不多,飲品選擇都係合理嘅,現場有幾多人買我無留意,但全機上可能有10個左右預先訂餐,呢部份留待回程再講。 週不時都會睇下有冇航空公司自家精品,今次買咗香港快運A321neo鎖匙扣,但感覺上都唔係好見到空中服務員們積極推銷,例如今次買滿超過$100就送舊塗裝機尾型USB手指,是好是壞不評論。 準時降落沖繩,特別鳴謝機上放聲喊嘅小朋友提醒各位乘客起飛及降落。
日期:21APR2023 時間:11:25(11:38)-13:05(12:56) 航班:UO821 機型:Airbus A321 B-LED 離開沖繩嘅呢一日,喺牧志站乘搭單軌電車到機場,抵達機場時會喺JAL及ANA兩大陣營之間,往ANA方向走就會喺國際線客運大樓。 香港快運喺安排喺C區辦理登機手續,呢日比原定時間遲咗咗15分鐘到機場,主要係單軌乘客太多上唔到即班,好彩回程有加購U-First可以優先辦理登機手續節省排隊時間,行李買咗20公斤限額但寄艙行李只係10kg出頭,地勤姐姐問會唔會仲有寄艙行李用埋個限額,我就得返手提行李所以地勤姐姐就“檢查”過後貼上可以上機嘅標籤帶。 呢一日安排喺43A閘口登機,地勤姐姐有特別提示要盡早做安檢,那霸機場安檢絕對係我目前遇到最慢嘅一個機場,國際線得1個入口2部X光機,機場亦有特別要求乘客取出電池及充電線過X光機,就當日所見並非每位旅客都有跟指示做,亦因為有多件手提行李需要重新覆檢所以令人潮難以散去,保安亦需要不停調整排隊位置維持秩序。 喺那霸機場地勤安排分4組乘客登機,除U-Frist外係以最尾數排為先,1-10行安排喺最後登機。另外由於A321客機行李櫃空間有限,地勤會安排部份𢹂帶登機箱嘅乘客免費改為寄艙,但仍無阻手提行李櫃爆滿。 今次坐最頭前排嘅1F,亦係預先劃位中最貴嘅座位,落機最方便,腳位當然無去程12F咁多,但都十分足夠,亦都十分幸運地DE兩個位都無人坐,座椅亦可以稍作調整角度。 回程訂餐就訂咗日式咖哩飯,起飛前空姐會同乘客確認一次,起飛後直到安全帶燈號熄滅後無幾耐就會送餐,每個預訂餐都會送一枝礦物質水,咖哩飯無乜汁所以整體偏乾,調味算可以接受唔難食,$55呢個份量嚟講個人認為偏少,無乜事我下次唔會買
總結:感覺上可能有下次,但未必係香港快運 多得機管局大抽獎令我有機會體驗一次廉航,當我作為乘客嘅時候只要願意畀多“少少”其實都唔係真係特別差,或者我可能真係唔係特抗拒廉航呢件事。
|