巴士滿座飛站 肥哥嬲豬肉臂擋車

前日（15日）張小姐同朋友去西貢遊山玩水，下晝5點搭巴士回程，當時好多人搭巴士，巴士好快滿座。其間懷疑巴士飛站引起等車嘅人不滿，有兩個男人竟然走出馬路，喺巴士前面攔路，車長無奈報警。擾攘咗半個鐘，警察嚟到嘅時候嗰兩個男人已經走咗。張小姐認為攔巴士行為野蠻，「用人身安全威脅其他人，好自私！」


兩名男子站在巴士前攔路，其間念念有詞，舉起手機拍照。讀者提供圖片

擾攘半小時

張小姐前日下晝5點喺黃石碼頭搭94號巴士出返西貢巿中心，去到大網仔路近仁義路嗰陣巴士突然停低咗，坐喺上層中間位置嘅張小姐初時以為塞車，但之後聽到坐車頭嘅乘客議論紛紛，於是走上去睇吓乜事，見到兩個男人企咗喺巴士前面攔住巴士，不停同車長講嘢，但聽唔清楚佢講乜，似乎係投訴巴士飛站，車長已經安撫佢哋話後面好快有車嚟，但對方唔理，繼續念念有詞，又攞手機出嚟影架巴士。

38歲陳姓車長惟有報警，話有兩個男人放咗啲嘢喺巴士前面，阻住去路。其間，張小姐形容現場交通受影響，後面嘅車要逆線抽頭，有車響按，有啲混亂。擾攘咗半個鐘，後面有巴士埋站，嗰兩個男人就唔見咗，相信上咗後面架巴士。警察嚟到搵唔到嗰兩個男人，將案件列作糾紛處理。

張小姐坐嘅巴士終於可以開車，佢話巴士唔係專登飛站，就算埋站都上唔到客，攔住架巴士實在真係好野蠻。



https://hk.news.appledaily.com/local/daily/article/20181217/20570593

第一次去西貢玩？
假期人多會飛站是常識吧

報左差館, 後車成半個鐘先到
竟然比兩條友搭巴屎走左
香港警察都係食.... 既
咁打999 做乜呀?

有無車既車cam影到先？
有既話應該可以拉到人。
警察做野啦！

都話香港應該廢除客滿飛站條款，學外國咁，架車幾爆都要開門上客（而家現代嘅巴士底盤根本已經唔會出現上到負荷唔到嘅情況）。尤其係呢啲郊區，94巴士要成40分鐘先一班，51甚至要1個鐘一班重要係獨市，上唔到車等同被困荒山野嶺。我早前去俄羅斯旅遊，喺夏天嘅週末搭部由市中心去海灘嘅市郊巴士，一個鐘一班車。喺市中心頭幾個站已經看似上滿（我市區第二站上車已經要企閘口），不過之後佢真係可以喺沿線郊區站站停繼續俾人上，而中途無人落過車。

我見到肥哥嬲  豬肉臂  擋車
最重要係入面啲客有冇肯企入啲，係咪真係通道都企滿?

lsc04d11 發表於 2018-12-18 08:46
我見到肥哥嬲  豬肉臂  擋車
最重要係入面啲客有冇肯企入啲，係咪真係通道都企滿? ...

唔清楚當時情況係點，但近年的確唔少車長假頂閘就飛站，甚至更過分嘅，有車假頂閘，落客後無叫人行入去已經急急腳開走。

其實有時所謂滿都係假頂閘，94呢D又要咁鬼疏，又唔係真係可以一面倒怪晒呀豬肉臂

JC8385 發表於 2018-12-18 09:56
其實有時所謂滿都係假頂閘，94呢D又要咁鬼疏，又唔係真係可以一面倒怪晒呀豬肉臂 ...

頂閘真假未有證據知
但塞死道路同打亂既有班次已成事實
唔怪得人地家下一面倒咁追捕佢

巴士的膠 發表於 2018-12-18 09:10
唔清楚當時情況係點，但近年的確唔少車長假頂閘就飛站，甚至更過分嘅，有車假頂閘，落客後無叫人行入去已 ...

叫多兩次都係成堆石柱咁，畀着我都留返啖氣暖肚啦。

該兩位仁兄都去到仁義路，唔係北潭凹那種鳥不生蛋的地方，等唔到車咪call的士囉，綠的出西貢都唔貴，每日大把人返工返學上唔到巴士啦。

DIH 發表於 2018-12-18 10:45
叫多兩次都係成堆石柱咁，畀着我都留返啖氣暖肚啦。

該兩位仁兄都去到仁義路，唔係北潭凹那種鳥不生蛋的 ...

如果叫咗唔郁，車長應停止行車