[多圖] 法國里昂之旅

【巴士篇】

經過一段忙碌既時期，無出post亦無去影日本既火車，一跳就黎到去完無耐既法國里昂之旅。今次去法國係為左參加地球科學界既國際會議，夾埋兩位研究室既同事一齊出發。我就負責安排大家既交通、景點行程，採納埋佢地去瑞士既提議之後，今次旅程就覆蓋法國里昂、安錫同埋瑞士日內瓦。

我地喺7月8號出發，首先從京都站搭281系特急「はるか（遙）」去機場（粉紅色版本圖案）

好耐未踏足過関西機場T1國際線大堂

今次搭開返無耐既漢莎航空KIX～MUC航線

起飛之後既晚餐，以日本時間黎睇就接近宵夜既感覺（忌廉蘑菇通粉、醃菜壽司卷、火腿薯仔沙律、carrot cake、德國啤酒）

有BB不定期細聲喊，訓得唔太好（無得揀正體中文）

降落前兩個鐘左右既早餐（酥皮包三文治、生果片）

一到朝早5點、禁止升降限制解除之後就降落德國慕尼黑，仲可以睇少少日出

整潔但建築無乜特色、印象唔深刻既慕尼黑機場，同10年前中學參加遊學團黎到呢度既感覺一模一樣

過完關之後搭旅客捷運系統。時間上唔方便我慢慢影，所以唯有從兩卡既連接位影過去旁邊車廂（唔連通）

去另一個閘口轉機

落去轉接駁巴士去到飛機門口

一個鐘左右就到達法國里昂聖修伯里機場（LYS）

最初訂機票前仲諗過関西直飛巴黎、喺CDG或者出市區轉搭TGV既方案，但遇上暑假TGV票價急升，出去市中心轉車期間治安惡劣問題等等，最後就揀全程搭飛機。

今次旅程之前為左搞清楚當地鐵道路線、行車路徑等等，我就製作左里昂周邊既法國國鐵（SNCF）路線圖。里昂係奧弗涅-隆-阿爾卑斯大區（Auvergne-Rhône-Alpes）首府，當地近郊列車就以左下logo既品牌營運。國鐵既高速列車TGV分為標準版既inoui品牌同埋平價既ouigo品牌，另外既有線部分城際列車都有用平價ouigo品牌營運。圖中簡單標示主要車站、地鐵轉車站、路線網絡方向、部分班次合辦/營運公司等等。紅線代表高速線（LGV, Ligne à grande vitesse），喺里昂周邊有幾個地方接駁既有路線。

昔日法國鐵道幹線Ligne PLM（Ligne de Paris-Lyon à Marseille-Saint-Charles, 巴黎-里昂-馬賽線）串連法國三大都市，令到里昂半島上面既Perrache站成為重要車站。81年為左配合TGV登場、LGV Sud-Est（東南高速線）開業，原本係貨場既Part Dieu站就變成現代化既中央車站，帶動旁邊商業區發展。另一邊廂，原本只有柴油車行既西里昂線（Lignes de l'Ouest Lyonnais）就喺12年電氣化變成Tram-Train系統（紫線）

因為SNCF官網時刻表唔似日本可以預先睇到全日所有班次既關係，我將主要近郊班次既行車路徑整成下面幅圖，方便到時影車嗰陣即時對返時刻表，知道走向等等（不過無乜點用得著 ）

喺機場既紀念品/旅行用品店悠閒一下，買完交通觀光套票之後就出市區。今次買3日版既Lyon City Card，連埋機場電車Rhônexpress來回飛既套票。左邊Lyon City Card係晶片卡，可以拍卡去搭里昂公共交通（TCL）旗下所有地鐵、巴士、電車、纜車，唔少景點、博物館可以免費入場，同埋有各種店鋪減價優惠。右邊紙卡係Rhônexpress來回飛，上車時比車掌去掃QR Code

拖住行李，曬住行出去車站

為既就係影下呢個Lyon-Saint-Exupéry TGV站（舊稱Satolas-TGV站）

由Santiago Calatrava設計

咁啱有車停緊待避（中間通過線路軌主要比巴黎直達馬賽、南法地區既車通過）

法文Gare意思就係車站

相當宏偉

除左主要TGV月台/車站以外都係得呢種檢票機，不設閘機

大堂

電梯上去機場方向既天橋

北行月台見到ouigo班次

從西邊出口可以見到呢個型格設計

外面有安托萬・德・聖修伯里（Antoine de Saint-Exupéry）同小獅子既雕像。獅子一直都係里昂既象徵，出現喺市徽、旅遊局標誌等等。世界名著《小王子》既作者聖修伯里就喺里昂出生，里昂機場就以佢命名，當然里昂周圍都賣各種小王子紀念品

跟住就落去搭Rhônexpress出市區既酒店check in，佢係獨立公司，喺TCL票價系統以外

採用瑞士Stadler Tango電車車型，喺機場附近一段專用軌道最快可達100 km/h

車內用固定方向既皮質高背座椅，有行李架、顯示屏

半個鐘出到Part Dieu站東邊既Gare Part-Dieu - Villette電車站，沿途大部分同TCL既電車T3、T7線共用路軌，不過唔少車站可以追過前車

左邊就係宜家里昂既中央車站：Part Dieu站，意思係神擁有之地

喺Part Dieu站Villette出口（東邊出口）旁邊既綠色I字頭酒店提早check in、梳洗之後，就去國鐵既大堂搵餐廳午餐，可惜超級多人。於是我地就穿過非常繁忙既大堂去西邊Vivier Merle出口搭地鐵，特別留意堆喺顯示屏前面等月台資訊既人群、車站門口疑似流浪漢、各種膚色較深人士等等，呢個時候我就唔敢攞相機大影特影（之後會有影到）。

搭地鐵B線從Gare Part-Dieu Vivier Merle站去Charpennes站轉A線，一路搭去東邊盡頭既Vaulx-en-Velin La Soie站。呢度喺07年開幕，天花挖空透入陽光，亦有植物

行天橋穿過地鐵車庫去北面既商場

地鐵A、B、D線都係採用米芝蓮開發比巴黎地鐵既膠轆配鋼轆地鐵系統，鋼轆主要喺波口控制架車轉向，平時直路唔掂路軌，膠轆就帶黎強勁加減速

除左餐廳，附近超市、商店都喺星期日下晝開始休息。食完豐盛既意大利粉之後就用Lyon City Card免費參觀Mini World

入去模型場景展廳之前可以見到各大品牌商品展示，呢三部機頭就係法國國鐵標誌性既「顴骨突出」設計（來自日本鐵路界既形容詞「ゲンコツ」 ），法國人就稱佢地係鼻骨骨折（Nez Cassé）

一入去就係阿爾卑斯風格既場景，可以見到經典既馬特洪峰喺背景







有TGV、歐洲各地客車列車行走