2024年，港島巴士應何去何從？

註:下面引用左唔少傳聞，亦用左呢啲傳聞推論左唔少冧法，如有錯誤理解請各消息人士見諒。

前言
係呀年經標題嘛，唔好走住先，今次開帖係因為覺得去到今日，有好多野都已經settle 哂，不穩定因素大為減少，所以想睇下大家點睇。

背景
呢樣野唔使點多講啦，疫情過後就算生活回復正常都好，相信大家都有眼見真係少左人出街，無論係因為慣左喺屋企開餐或者翻工，或者短期長期離港，甚至多左閒錢去投資一部私家車/白牌車都好，大把路線係少左人搭。另一方面失業率大跌，勞動力集中嘅運輸業首當其衝，黃公司專一自己嘅窿聽聞都有三位數。

另外，鐵路網絡發展，經濟重心向北移，甚至係兩蚊優惠，都影響到巴士公司決策。呢啲下面會詳談。

管治
先講下黃公司呀頭啦，新管理層有外國管理經驗，有北水，投資落香港專利巴士行業，為嘅除左係 cashflow同靚朵之外，仲希望可以油電及氫，放手比對家試好電車先(自己一架B記電車都冇入)。事實上有眼見到政府喺氫氣試驗計劃上開嘅一連串綠燈都算係順利，當然氫巴自己嘅成本會較高，但觀乎英國 Stagecoach當年入股ADL後買車有得平，似乎之後要大手入氫巴都唔會太貴，但係短期內就似乎會帶嚟票價壓力啦。個人唔清楚氫巴嘅表現如何，但以港島山多嘅路況下，要氫巴普及似乎言之尚早。

另外，呢一年亦見到呢間公司縮數程度比起對家有過之而無不及，包括喺減少站長數量，減少車長有得收錢嘅時數(加長白衫飯鐘)，減少後備車輛數量(唔到最後一下都唔出新車/將歐四車解凍)，喺帳目上係靚仔啲，但係同前線關係越嚟越差，加上其他地方比到嘅待遇更好，最後咪導致 "工程部缺人導致大批做到生意嘅巴士排隊月檢年檢"，或者係 "新嚟嘅一班新車長齊齊劈炮"嘅傳聞。窿窿補極都唔完，受害嘅當然係比較難賺嘅港島本土線，尤其港島線車型限制特別多，工程部整唔切嘅話呢堆線影響會較大。

道路網及新路線
講真港島呢二十年就係多左嗰條新路，2019年通車嘅中環灣仔繞道，明顯地分流左來往港島東西嘅私家車，雖然因為新路避開左傳統客倉中灣銅而冇咁受本土巴士線歡迎，但受惠於干諾道中/告士打道車流減少，部份巴士車程亦有改善，不過同時亦有唔少位置會塞多左，例如話海港政府大樓一帶。

因為避開客倉嘅關係，暫時使用繞道嘅港島本土全日線得一條18X，外加幾條繁時線 33X 88X，再加半條本土線A12。黃巴曾經將前者改停港澳碼頭，似乎想谷呢條線成為早繁後將西隧客特快接駁至東區嘅接駁線，但係觀乎現時班次(平日大半日25分鐘一班，週末20分鐘一班，1940尾車)同埋缺乏傳統西隧線轉乘，似乎呢條橋已經被掃入垃圾桶。其他線情況亦唔好得太多，88X喺疫情初期曾經加過班，但亦無以為繼，仍然維持兩去兩回嘅班次，連A12今年建議飛西環時候亦冇建議加班補償(即係夠載)。33X之前亦有版友指出客量慘淡，不過同時間競爭對手69小巴都唔好得去邊。至於新嘅快線700，有聞都落埋垃圾桶。

流水線需要大量資源但單價低，中距離路線大多有唔少競爭，亦難免巴士公司會積極投資特快線，加快回車速度同時提高單價 (現時港島路線平均票價對比起對面岸實在太低)。道路網相信到2047前都唔會大改，而港島可以串連成快線嘅地方亦大多已經覆蓋好(700嗰啲青蛙跳 Origin Destination 需求唔見得太高)，似乎唔會再有新線發展空間。

鐵路網
講得道路網又點可以唔講鐵路網。港島巴士以前做開嘅兩個大區，西區同南區，呢十年間各自引入鐵路，打破左巴士公司低價密車嘅 model，令兩區嘅四寶落入苟延殘喘嘅局面，平又唔夠電車平，穩定又唔夠鐵路穩定，快又唔夠小巴快。去到十年後嘅今日，呢四寶減班甚至取消之餘，仍然出現喺RPP上面 (1/5B同埋 90/97)，代表跌勢未止。中距離/價位線情況更差，鐵路價錢唔差，站位就腳因素似乎更被忽視，導致5X 18P 23等線一蹶不振。長距離路線尚可以同鐵路鬥快鬥就腳，但正如上面分析，本身需求唔高嘅，開幾密都係燒錢，開疏啲咪又係落翻地鐵，一陣谷新X線影響到舊有快線(如各東廊線)仲衰。

有影響當然都有機遇，自己亦曾經研究過做鐵路接駁客嘅潛力，理論上又係路線短回車快密食當三番嘅線嚟。先睇比較成功嘅例子 1M，客量我著實唔清楚，但佢成功在價位高，成功 upgrade到用開平價搭1號嘅有錢區跑馬地，仲避開左近年(因為招標)開新線要附送海量無謂BBI嘅魔咒。同站嘅25A因為係舊線嘅關係，似乎未能太受惠於單價高呢一點嚟谷收入。至於眾多東廊線，更被唔少版友(利申我都有份)指出因為由會展站步行至碼頭巴士站路線唔友善、路線早繁避開巴士站導致要行去入境處轉乘、價錢比起全程鐵/繼續紅隧轉隧巴貴，所以相對冇咁受歡迎，隨後亦無緣延續轉鐵優惠。另一方面，43M/48/78甚至已取消嘅82M等駁鐵線被平行小巴線打到落花流水，更成為巴士公司嘅眼中釘，其中兩條今年內應該會取消，著實唏噓，似乎駁鐵線唔夠小巴密係死症。

尤幸今時今日北港島線被無限擱置，但其實呢條線就算點起都好，亦只係 free up到藍線嘅空間，最終令北炮一帶易啲上車咁解，對巴士影響相對冇咁直接(所有線都跌少少客咁)。反而南港島線西段今年內會敲定模式，沿住客源加站直接打擊薄扶林一帶客倉，可見該區十年後路線會進一步精簡。

路面競爭對手
除左鐵路之外，路面都有唔少嘅競爭對手。撇開同樣被鐵路打殘嘅紅van唔講，綠 van同樣因為鐵路網擴張而洗牌，由中長途線 (10/31/55/56)轉而做短途接駁(4M/23M)為主，部份長途線如 56系 36X 甚至上面提到，未有直接同鐵路重疊嘅69系亦有影響。觀乎前述黃巴對大多駁鐵線嘅態度，相信嚟緊十年小巴亦會繼續主導短途接駁生意。

電車票價固然一直為其優勢，但近年因為引入冷氣車廂，對家轉乘優惠，甚至以其優良公關吸引遊客同本地客，亦進一步搶去流水線生意，甚至加到上三蚊亦客似雲來。至於對家，即使海婷以防止惡性競爭為理由，阻止左港島開辦新招標線嘅可能性 (令黃巴無需不惜工本開辦新線)，但近年新增嘅過海線班次(613 673 936甚至部份特登唔減班嘅聯營線等)，加上月票攻勢，亦奪去唔少北岸流水客 (亦尤幸900嘅港島內雙向分段未能進一步擴展)。

供求
前言提到供求問題，誠言經濟下行，消費力下跌，請人難呢啲難處，其他競爭對手都有。為左避免黃巴交牌，海婷呢幾年亦放左唔少水去救佢(係咪屎水就後話)，唔少重組亦順風順水，雖然開關後黃巴生意好轉，北面西面都要人，但係亦代表海婷唔會再咁輕易放水比佢大斬特斬。

講origin，港島呢幾年人口增長地區唔多，包括黃竹坑車廠上蓋、利南道、堅城及西環一帶新樓，亦包括之後華富重建嘅新人口(當然都會有新鐵路)。講 Destination，因為經濟下行同埋Work from Home盛行，商廈人流慢慢跌緊，政府大樓亦逐漸離開傳統商業區，但因為呢啲騰空出嚟嘅商業用地一定會繼續維持商業用途，所以並唔會推高 origin demand，結果就係整體南向/島內需求下跌，同時北向逐漸上升(但係條鐵食得落)，久而久之只會越嚟越難做。

個人睇法
預左被圍剿，但我係悲觀派嚟，我睇唔到投資落港島巴士嘅好處。呢幾年大家覺得黃巴止血止得狠，但其實都有唔少料講過，其實佢係可以斬得再勁啲，係海婷擋左咁解。以南區為例，有聽過呢區大多數路線都見紅，表現最好嗰條竟然係38，代表咩？代表要夠密車先有客(但又有幾多條線值得開密?)，代表要食兩三水客先夠客(唔單只要食長途北銅華富客，仲要食埋短途黃竹坑華富客)，代表要靠榨壓冇鐵區先有客(十年後咪得翻小西灣同耀東)，咁又有幾多條線可以齊哂咁多條件？

整體需求下跌，相信偉大嘅政府都未能逆轉到，要維持收入唯有靠增加 farebox income per person，除左冧辦法全世界加價之外，開多啲過海線做兩蚊客，縮線減低營運成本，將部份佢覺得唔值得做嘅客趕落地底(1號西環 90西邨中環係好例子)，展望將來都係行呢條路。收拾埋 2 5X 27呢啲做又唔係唔做又唔係嘅線之後，相信港島RPP亦再難以發展。

個人而言，仍然相信部份客源仲未被發掘嘅，例如42 42C合併做大數碼港，49X開回程，做大33X 30X谷瑪麗轉乘山道特快，93系拉落金鐘做貴價落山客，23X開西行等等，不過我唔知呢啲客係咪比黃巴歸為"唔值得做"啦，但我相信客係養翻嚟嘅，多一個人上車就係多一筆收入。港島人其實相對肯課金，比到值得嘅服務佢地唔介意價錢...但係前提係每條線起碼有翻廿分鐘一班，係聯合班次嘅就執翻靚啲班次(反正啲線斬無可斬，冇理由要繼續趕客)，執好啲個 branding (有競爭更要整靚自己個名)，應該加轉乘嘅就加轉乘，重點係唔好當所有乘客都係巴膠，覺得唔使做野去吸引佢地，覺得佢地合埋眼都一定會揀你。

如果閣下睇到呢度嘅話，感謝您地嘅時間，希望您地冇覺得累贅啦。咁...以下開放大混戰？

首先23客量一啲都唔差，只係一過咗正街就清晒架車咁滯

咪同小巴一樣隔幾年加價
城巴當年係時勢做英雄
依家就變成有幾耐風流有幾耐折墮

kay 發表於 2024-3-25 10:30
咪同小巴一樣隔幾年加價
城巴當年係時勢做英雄
依家就變成有幾耐風流有幾耐折墮

定會年年找藉口加價?

依家斬唔斬到港島都唔重要
個搵錢位依家去哂關口啦
反而港島越折墮仲好，可以更落力賣慘，可以投到更多線

YUU 發表於 2024-3-25 10:18
首先23客量一啲都唔差，只係一過咗正街就清晒架車咁滯

不如屎水俾23,103於蒲飛路總站加入瑪麗醫院轉乘計劃而優惠跟返40,反正西半山很有多人坐40或40M到薄扶林轉4,7,91,90B到香港仔,鴨脷汌,黃竹坑.(反正遲早華富拆屎水實KO隻40,40M兼只留40 P俾人返放學)

多謝付出寶貴時間！
港島巴士係:
「前無去路，後有追兵」

放心，港島 & 九龍 兩巴都仲有大把cut線空間，當呢兩個地方越黎越少肉食，縮減營運規模，做細個餅唔見得係壞事，反正而家成日話唔夠人。疫情嘅教訓已經話左比大家知，單靠過境客泵水而唔理本土營運劣況，都係冇出路。

第一次見人講連23叫一蹶不振

電車係就有係加到上$3，但至今年12.31用Visa拍卡/手機，或者經支付寶/Payme比都有得減$3，對搭唔夠$400嘅人嚟講仲平過$2.6甚至$2.3年代，同1998年同價