本帖最後由 UE3240 於 2016-8-8 10:10 編輯
日日派D無冷氣的殘舊巴士出街行, 終於見報
呢排熱到人都癲,吓吓過30°C,酷熱天氣警告老是常出現。天文台叫人注意健康,城巴就唱反調,費清就搭到一架熱過熱狗嘅機場巴士。
當日(24日)去亞洲博覽館睇Bigbang演唱會(剩係少女先可以去㗎!),由於係下午場,所以中午最熱嘅時候就要搭車入去。由將軍澳搭城巴E22A,剛上車乘客唔多,都唔覺有咩,但去到觀塘、九龍灣等,越嚟越多人上車,就開始feel到巴士冇冷氣,摸吓出風口,只有熱風(好後悔冇帶廢青風扇),但呢個時候巴士已經上咗公路。
成車人喃喃自語:「咁熱㗎」,車窗外一滴雲都冇,天文台app話室外溫度34.5°C,嘩,巴士入面隨時40°C或更高。司機就話開咗冷氣喎。全車人個幾兩個鐘熱到hihi咁入到去亞博。費清當時打去城巴熱線反映,問吓會唔會了解吓個冷氣係咪壞咗,但職員話係聯絡唔到嗰司機,「唔知有冇事㗎,要等巴士埋總站先知」。吓?巴士公司聯絡唔到司機?如果嗰司機有事點算?
與此同時,朋友Grace搭另一架龍運巴士E32入亞博,佢話都係冇乜冷氣,成車人焗sauna。查實,經常搭嘅都知道,香港啲巴士好高科技,係恆溫㗎,只不過係當冬天開大冷氣,夏天開到好細啫。
城巴調查咗兩個禮拜,終於回覆話架巴士冷氣係壞咗喎。費清聽到火都嚟,點解城巴唔當時盡快瞭解吓?車程超過個幾兩個鐘,巴士又冇窗,期間有乘客因為太焗唔舒服點算?
費清嬲嬲哋,話架巴士註明係「空調」,而家冇冷氣違反《商品說明條例》喎,係咪要退全數或部分車費呀。不過,城巴職員話:「架車送咗你去目的地,冇得退㗎」。明嘅,財到光棍手嘛。
|