hkitalk.net 香港交通資訊網

標題: 日本航空將於9月9日終止廣東話客戶服務 [打印本頁]

作者: HR1377 時間: 2025-7-21 16:52
標題: 日本航空將於9月9日終止廣東話客戶服務
由9月9日起，日本航空將終止廣東話客戶服務，屆時市民只能使用國語和英語溝通

https://www.jal.co.jp/hk/zhhk/info/travelalerts/250715/

作者: 吳宗錡 時間: 2025-7-21 20:12
本帖最後由吳宗錡於 2025-7-21 20:14 編輯

其實市民可唔可以入稟高等法院，要求高等法院提請人大常委會釋法《基本法》第九條，「中文」嘅標準口語形式即係咩

香港特別行政區的行政機關、立法機關和司法機關，除使用中文外，還可使用英文，英文也是正式語文。

同埋要求立法會修改《法定語文條例》，擴大法定語文嘅適用場合

作者: Waiyin12 時間: 2025-7-22 00:27
其實到今時今日，大部份乘客訂機票都係用官方網站 / app 出機票，或者經旅行社網頁，要用到航空公司 call centre 嘅場合未必好多，我會諗到嘅係例如早兩日打風，航班取消，而又未獲自動安排替代航班 / rebook 後的時間不能配合行程，先會打電話去 call centre 處理；如果係去到機場先宣佈航班取消，現場應該會有地勤協助

對一般乘客而言，分分鐘機上有幾多位空姐通曉廣東話，影響大過 call centre 服務語言；以國泰近一兩年員工來源，可能搭 JL 香港飛日本，機上識廣東話嘅空姐，仲多過 CX 日本機

作者: Waiyin12 時間: 2025-7-22 00:31

吳宗錡發表於 2025-7-21 20:12
其實市民可唔可以入稟高等法院，要求高等法院提請人大常委會釋法《基本法》第九條，「中文」嘅標準口語形式 ...

航空公司 call centre 應該無法例規定要提供中文 / 廣東話服務，如果係外籍航空公司，只提供英語客戶服務，確係無咁方便、可能令部分乘客卻步，但應該無抵觸香港法例

作者: tkglobe 時間: 2025-7-22 09:16

吳宗錡發表於 2025-7-21 20:12
其實市民可唔可以入稟高等法院，要求高等法院提請人大常委會釋法《基本法》第九條，「中文」嘅標準口語形式 ...

法定語文只係嗰個語文嘅法律地位，唔代表一定要提供嗰個語言服務，香港任何公司都可以根據佢自身考慮提供任何語言，即使係餐廳都唔一定要提供中文服務

作者: tkglobe 時間: 2025-7-22 09:24

Waiyin12 發表於 2025-7-22 00:31
航空公司 call centre 應該無法例規定要提供中文 / 廣東話服務，如果係外籍航空公司，只提供英語客戶服務 ...

當然冇規定，甚至乎唔一定要有call Centre服務，有啲航空公司根本上連香港服務電話都冇

作者: DIH 時間: 2025-7-22 09:52
本帖最後由 DIH 於 2025-7-22 10:15 編輯

吳宗錡發表於 2025-7-21 20:12
其實市民可唔可以入稟高等法院，要求高等法院提請人大常委會釋法《基本法》第九條，「中文」嘅標準口語形式 ...

《基本法》無明確指明「中文」所謂何物，唔止口語，連書面語都無指明，而且並非採用內地術語（汉语、普通话、规范汉字），就知係故意留有彈性。人地打開道門你就夾硬要去度尺，唔好啦。

日航終止廣東話CS應該都係縮皮，其實由當年破產到而家，佢喺香港個presence都好細，甚至連廣告宣傳都比唔上ANA。

作者: 吳宗錡 時間: 2025-7-22 12:33
本帖最後由吳宗錡於 2025-7-22 12:38 編輯

tkglobe 發表於 2025-7-22 09:16
法定語文只係嗰個語文嘅法律地位，唔代表一定要提供嗰個語言服務，香港任何公司都可以根據佢自身考慮提供 ...

所以我咪個人建議立法會修改《法定語文條例》，增加所有喺香港註冊或營業嘅業務/公司/非本地公司/法團/團體/機構etc.都必須以法定語文（即中文及英文）提供服務嘅規定，當然間公司要按實際需要，額外提供其他語文嘅服務都可以

作者: 吳宗錡 時間: 2025-7-22 12:41

Waiyin12 發表於 2025-7-22 00:27
其實到今時今日，大部份乘客訂機票都係用官方網站 / app 出機票，或者經旅行社網頁，要用到航空公司 call c ...

咁還好，我以為連機艙廣播同空姐服務都冇埋廣東話

作者: tkglobe 時間: 2025-7-22 14:04

吳宗錡發表於 2025-7-22 12:33
所以我咪個人建議立法會修改《法定語文條例》，增加所有喺香港註冊或營業嘅業務/公司/非本地公司/法團/團 ...

點解一定要咁做，我做生意授權選擇顧客，喺自由營商環境之下根本上冇可能有呢啲限制，簡直就係多餘

作者: tkglobe 時間: 2025-7-22 14:05

吳宗錡發表於 2025-7-22 12:41
咁還好，我以為連機艙廣播同空姐服務都冇埋廣東話

如果遲啲cut HK base 嘅空中服務員, 就唔會再有廣東話

作者: s3n370 時間: 2025-7-23 03:17

吳宗錡發表於 2025-7-22 04:33
所以我咪個人建議立法會修改《法定語文條例》，增加所有喺香港註冊或營業嘅業務/公司/非本地公司/法團/團 ...

法定語文只係強調中英文同等/規定官方對市民溝通/立法事宜。

若果真係拓展到其他範圍，官立英文學校會首先中招。

大把香港人去外地網站購物上遙距課程，香港亦有唔少公司專做外地嘅客戶。
咁外地網站咪唔做得香港生意？
香港公司就算做其他國家其他語言嘅客，都要夾硬俾中英文服務？

作者: 吳宗錡 時間: 2025-7-23 08:28
本帖最後由吳宗錡於 2025-7-23 08:30 編輯

s3n370 發表於 2025-7-23 03:17
法定語文只係強調中英文同等/規定官方對市民溝通/立法事宜。

若果真係拓展到其他範圍，官立英文學校會首 ...

我嘅意思係話，喺香港註冊或營業嘅公司必須喺服務語言中提供香港法定語文（中文、英文）嘅選項，唔係話淨係可以用中文或英文同客戶溝通。間公司有權利以其他語言向客戶提供服務。外地購物網站（例如亞馬遜），如果個購物網站間公司有喺香港註冊分公司或者進行非本地公司註冊嘅話，就需要提供中文同英文服務，如果冇喺香港註冊或進行非本地公司註冊嘅話就唔使。同理，海外大學遙距課程同樣視乎嗰個課程是否須喺香港根據《非本地高等及專業教育（規管）條例》註冊或豁免註冊，如果唔需要註冊嘅話，就唔係必須以法定語文提供教學。
就返今次JAL單事件，因為JAL唔係喺香港註冊，所以佢只需要喺往返香港航線提供香港法定語文（中文及英文）服務，其他航線可以淨係提供其他語言（例如日文）服務。而CX因為係喺香港註冊，所以佢所有航線都必須提供香港法定語文服務。

至於學校教學語言問題，因為唔關今次事件，所以就淨係略答。我會建議《教育條例》另行規定註冊學校可以以其中一種或以上法定語文教學，如果因應課程/科目性質，須使用其他語言教學嘅話（例如日文），就需要向監管當局申請批准以特定語言教學（例如高中丙部科目就HKEAA，八大（包括附屬自資學院）同都會大學（包括LPiACE）就校內QF評審部門，私立大學同成人學校就HKCAAVQ）。

作者: tkglobe 時間: 2025-7-23 09:37

吳宗錡發表於 2025-7-23 08:28
我嘅意思係話，喺香港註冊或營業嘅公司必須喺服務語言中提供香港法定語文（中文、英文）嘅選項，唔係話淨 ...

簡直就係多餘嘅無聊, 我開間舖頭鍾意做咩人生意唔得嘅
香港航線要有中英文就更加有問題, 你知唔知大部份航空公司只會提供當地語言同埋英文, 普通話都唔係全部有, 廣東話更加係絕無僅有
好心你諗吓啲有建設性嘅好過啦，成日諗埋晒啲不切實際嘅嘢

作者: s3n370 時間: 2025-7-23 16:22

吳宗錡發表於 2025-7-23 00:28
我嘅意思係話，喺香港註冊或營業嘅公司必須喺服務語言中提供香港法定語文（中文、英文）嘅選項，唔係話淨 ...

分別係政府不能拒絕服務响香港境內/持香港證件嘅人士。

私人公司沒有義務咁做，除了大律師/的士司機等受法律約束外。

作者: kingkonghi 時間: 2025-7-23 16:48

吳宗錡發表於 2025-7-23 08:28
我嘅意思係話，喺香港註冊或營業嘅公司必須喺服務語言中提供香港法定語文（中文、英文）嘅選項，唔係話淨 ...

讀書啦吳同學，上返八大未啊
成日諗埋啲痴線建議

歡迎光臨 hkitalk.net 香港交通資訊網 (https://www.hkitalk.net/HKiTalk2/)