DIH 發表於 2025-10-20 16:07
非常感謝樓主分享，我對美國鐵路只識皮毛，一般印象主要來自長途貨運、Amtrak、幾個主要大城市地鐵，但對散 ...

美國係鐵路大國，全國嘅鐵路總里程長居全球榜首，有咁多奇怪嘢都算係必然。當然成個網絡係貨運爲主，當地鐵路迷都係鍾意追Class I嘅長途貨運列車同埋蒸機，口味同亞洲大部分嘅鐵路迷都幾有出入。其實貨運鐵路除咗Class I之外，全國有無數嘅Class II (regional railroad）同埋Class III (shortline)，用嚟服務比較細嘅客戶、同比較大規模嘅鐵路公司交匯，車型同綫型都好有趣，小弟喺嗰邊都係追shortline多。其中仍然有好多奇特嘅車型，例如之前喺度介紹過嘅電頭、出名嘈+多黑煙嘅Alco、外形奇怪嘅GE同Baldwin、60幾70年車齢嘅EMD，仲有唔少怪型怪樣嘅神獸。平時追嘅時候真係比較少搵到「同業」，資訊點都係比較難攞。不過呢個都係佢魅力所在。
而地鐵/市内列車範疇嘅鐵路迷，真係好少見。但係紐約係一個大大大例外(芝加哥都有)，當地嘅地鐵迷熱誠程度(包括不良鐵路迷行爲)都有香港巴膠/日本鐵膠咁誇張。耐不耐都有保存列車嘅活動，每次都超墟崁，而送殯都係全城鐵膠嘅指定活動。不過紐約地鐵係好有特色，除咗第一印象嘅「汚糟」之外，其實都好多嘢值得研究。小弟超鍾意喺四綫區間搭快車，同埋好重70-80年代風味嘅R46/R62/R68車型。路綫規劃都好複雜，好有歷史印記。最近波士頓地鐵同費城/滿地可嘅近郊鐵路走咗去買CRRC，都係因爲佢喺麻省開咗個廠房。美國嘅鐵路車輛都需要符合Buy America Act，所以設廠喺美國都係必然，而通常都係價低者得...
不過地理係因素，最近紐約MTA都係習慣買喺紐約州設廠嘅川車，西岸就比較多買比較近嘅stadler同siemens。
師兄提及到，歐洲而家都有城際電鐵，當年其實都好似日本噉仿傚美國，一氣呵成噉建造咗好多。而家喺德國都有幾個仍然健在嘅網絡，喺波蘭Silesia更加有一個非常大規模嘅網絡。但係好似美國噉，好多城際電鐵都試過面臨廢綫嘅風險，例如荷蘭都試過一次過廢止晒，全歐洲而家整返落嚟嘅都已經全部收歸咗畀當地政府管理 （注:瑞士除外)。同美國有另一點都有幾分相似嘅(其實係歐洲行呢套先)，就係喺20世紀後期興建咗好多長距離嘅輕鐵(德國叫做Stadtbahn)。喺歐洲邊啲係舊有嘅城際電鐵、邊啲係新建嘅輕鐵就有少少魚目混珠。(相反喺美國，就已經好少舊有嘅路綫，全部都係怪胎，但係好多個城市近呢30年都有新建到輕鐵，營運特色就同舊有路綫好大分別。) 如果講要重拾返Interurban Age嘅黃金歲月，就點都係日本嘅大手私鐵最感覺到，另一邊箱要搵到20世紀初嘅美國Interurban風景都完全唔難(江之電/京福嵐電/京阪京津綫/福井電鐵/熊本電鐵etc)

非常感謝樓主分享，我對美國鐵路只識皮毛，一般印象主要來自長途貨運、Amtrak、幾個主要大城市地鐵，但對散落各地的「奇葩」全然不知，佢地對二十世紀初期城市規劃及技術發展史有重要意義，貢獻不應被遺忘。

我去日本會買鐵路書，書中偶爾介紹外國鐵路，但北美題材唔算多。美國鐵路迷又好似主力追重型機頭，地方鐵路所受關注相對較少，畢竟唔係度度有。

樓主這篇令我諗起德國都有tram-train及城際電車，當年留宿Heidelberg就見識過連接三市的米軌電車系統，一樣有過百年歷史。論列車造型同路線規劃，大西洋兩岸有唔同風格，但我估唔到美國地鐵竟然會買中車 。

theodore.c 發表於 2025-10-18 00:58
陣間抄下啲R32送殯嘅相出嚟跟下先😅😅
嗰日之前都有幾個週末搵咗R32行D綫嘅特別聖誕列車，59街沖上125街飛 ...

三藩巿都仲有無軌電車既

唔講唔知原來 Cleveland 條 Red Line 用架空電纜，年底可能有機會去 Cleveland 出差，到時留意下，如果去得成再上來報告

Seattle 條 transit tunnel 2019 年先再無巴士行，我上個月岩岩去過一轉，呢度貼過文分享。佢地地底留返鐵路專用其實係合理。但 Seattle 起唔成地鐵，其實真係幾可惜

BART 堆舊車退役之前我坐過好多次，一直都印象麻麻，覺得內籠殘舊，尤其是堆軟身座椅同座墊，同埋行車聲浪好大。但好多野都係失去左先會珍惜

S3BL100 發表於 2025-10-18 00:19
我當日送別 R32 經歷

講開波士頓，Orange Line 堆 Hawker-Siddeley 我都好深印象，十幾年前第一次坐已經 ...

陣間抄下啲R32送殯嘅相出嚟跟下先😅😅
嗰日之前都有幾個週末搵咗R32行D綫嘅特別聖誕列車，59街沖上125街飛7個站又左穿右插嗰段企車頭超刺激，好似過山車噉。冇唸到之後去NY讀書，住170街但係喺66街返學，日日都係搭呢條綫噉樣沖，雖然係搭R46/179/211
MBTA Blue Line噉樣要半路中途昇返個集電弓上嚟呢個做法，喺美國就只此一處。(雖然以前喺Norristown High Speed Line嘅直通班次都需要噉）但係喺歐洲呢樣嘢都比較普遍，例如倫敦嘅Thameslink同埋以前阿姆斯特丹嘅51號綫。喺北美，地鐵使用架空電纜都比較少有，除咗喺波士頓會見到之外就只有Cleveland同埋啱啱開始喺Montreal改建/新建嘅Reseau Express Metropolitain
波士頓嘅銀綫BRT其實最近已經將Neoplan嘅dual mode無軌電車/巴士退役，而家全部已經變成NFI嘅電巴。同時間象徴北美只剩返四個城市有無軌電車(費城、西雅圖、溫哥華、俄亥俄州Dayton市)
講起Seattle，以前市中心嘅輕鐵隧道都可以行巴士，如果我冇記錯，好似柴油又行得，無軌電車又行得。不過已經轉咗淨係行得輕鐵好多年喇。（雖然我無緣去過）
BART舊車退役其實小弟都特登飛咗過去睇，超精彩，但係同紐約嘅活動不同之處，就係剩係行得一程，冇得好似R32退役噉可以慢慢玩、慢慢影。都幾遺憾冇日常服務嘅時候搭過，亦都冇機會見到之前已經退役、有貫通門嘅C Car😥不過三藩市嘅交通依然好多特別之處，而Muni Metro嘅Breda制舊車都差唔多冇晒，有機會都值得去追。Caltrain喺最南端嘅一段都仍然用柴頭拖，但係冇曬EMD製造嗰兩批嘅F40同Gallery car😥

theodore.c 發表於 2025-10-17 22:22
多謝師兄支持。R32退役當日小弟都喺度，唔知有冇碰到面呢？😁😁紐約每次有列車退役活動都好多鐵路迷參與， ...

我當日送別 R32 經歷

講開波士頓，Orange Line 堆 Hawker-Siddeley 我都好深印象，十幾年前第一次坐已經覺得幾殘。係估唔到 Red Line 堆六、七十後 Pullman 會玩得耐過 Orange Line 果批八十後。話時話 Blue Line 曾幾何時都係用堆外觀相似又差唔多年歲既 Hawker-Siddeley，但行岸邊銹蝕嚴重，三十年唔到就玩完

不過 Blue Line 一半路段第三軌供電、一半路段架空電纜，去到機場站要豎起集電弓轉換供電模式，呢個設計好似全世界都好少有。仲有 Silver Line SL1/2 巴士當地鐵，行到半路要叉起集電弓入隧道，又係好得意、好特別，其他地方聞所未聞

三藩巿而家 BART 轉晒新車、Caltrain 又變晒新車，就無咁特別了，但 streetcars 同纜車特別程度不減。仲有兩條 BART connectors 又係幾得意（我淨係坐過 Oakland Airport 果條），MUNI 又地鐵又電車個運作模式又同波士頓 Green Line 幾似

S3BL100 發表於 2025-10-17 10:57
波士頓我之前去過無數次（上次係兩年前），Red Line 都坐過好多次，就係咁多次都無去過咁南端 一直都為意 ...

多謝師兄支持。R32退役當日小弟都喺度，唔知有冇碰到面呢？😁😁紐約每次有列車退役活動都好多鐵路迷參與，場面幾墟坎下。不過就係因爲R32退役時有不良鐵路迷搞破壞，唔知有冇下次...最近史丹頓島嘅R44其實靜靜雞退出咗日常服務，都冇退役活動，冇咩人留意。唔知係唔係已經唔再搞，一或係因爲唔係核心嘅地鐵綫、冇人知道佢退役，還是只係未正式搞。當年R32退下火綫之後都試過因爲R179啱啱載客就出現幾次大問題，需要臨時復出行J/Z行咗幾個月，之後過咗成兩年先搞呢個退役活動。
波士頓地鐵嘅車輛都係比較殘舊，例如以前橙綫嘅Hawker-Siddeley列車都超精彩。不過，紅綫1500/1600系咁長壽嘅原因都係因爲佢嘅替代車款搵咗CRRC做，遲遲未交車，況且已經投入服務嘅列車都超多問題。費城同LA嘅交通局都同CRRC訂過車，但係因爲MBTA嗰批嘅表現實在太差太差，最後都cut單甚至取消收場...
不過R32係小弟心目中都幾有感情地位，個人覺得都係比MBTA嘅列車有味道，尤其佢設計超經典之餘，仲係紐約地鐵最後一款設有railfan window(前面展望窗)嘅列車。
波士頓同費城(其實要計埋三藩市)嘅鐵路都好有獨特之處，精彩嘅程度都唔輸蝕比大佢幾倍嘅紐約或者倫敦、上海之類嘅大城市。背後咁複雜、咁「散收收」、咁多唔同嘅系統嘅原因當然除咗地理環境之外，仲有美國早期嘅鐵路史，尤其電鐵/市内電車/地鐵嘅發展全部都係私人公司參與，後來先慢慢過檔畀政府接管。波士頓都好啲，因爲BERy當年慢慢壟斷咗成個波士頓嘅市内鐵路交通，雖然個別路綫嘅設計都唔一致(例如藍綫雖然係重鐵，但係使用以前行駛電車嘅小半徑隧道、地面段更加係窄軌嘅城際電鐵改建而成，仍然使用架空電纜集電，列車要中途升起集電弓)，唔同路綫喺早期私營期間已經值着方便嘅轉車站同埋路綫合拼，都變咗一個比較容易使用嘅network。SEPTA就有少少唔同，因爲費城當年貴爲鐵路公司(PRR同Reading重鐵，同埋唔同嘅城際電鐵)嘅樞紐，每個「路綫群」都使用唔同嘅標準，基本上市内列車都完全冇機會進行整合。簡單如軌距，部分公司使用極罕有嘅Pennsylvania trolley gauge廣軌都係爲咗防止競爭對手(受政府強逼底下)使用佢嘅路綫。不過近郊鐵路就已經喺80年代透過一條市中心嘅隧道，將前PRR同前Reading嘅路綫整合，好似東京或者巴黎噉嘅跨域通勤鐵路就全美國得費城先有。

波士頓我之前去過無數次（上次係兩年前），Red Line 都坐過好多次，就係咁多次都無去過咁南端 一直都為意南端有一條好得意既支線，多謝你終於展開面紗。估唔到 PCC streetcars 都可以裝冷氣

唔講唔知 Red Line 原來仲有 Pullman 行緊，但真係所剩無幾。早年去果陣都坐過好多次。諗返先驚覺經典程度唔係同紐約地鐵 R32 差好遠（三年幾前 last day 果日我咁岩喺紐約，前一晚先知，果日有去送別）

反而 Philadelphia 我兩次去都係路過一日半日咁樣，無行得咁深入，幾條咁得意既鐵路同電車都係聽過未坐過。你仲走去河邊影相真係好有心機。下次我有機會再去都要留多一兩晚了

師兄你介紹咁多條鐵路線，其實都有一個共通主題：就係美國無一套統一標準、規劃同解決問題方法，好多決定交畀地區層面去做，加上資源同財政限制，成個 project 往往斬件左好幾次先做完，於是造就左唔少獨特、有趣而有創意既鐵路系統同車輛。規劃同運作角度當然效率麻麻，欠缺系統性，但又有好多野因而值得細味

期待下回分享