實屬意外之台灣三日兩夜快閃之旅 JX234 CX459

實在無諗過一月份訪台會發生件不可預期嘅事並意外揭發一年幾前嘅事情未處理好，兩個月後再度訪台就係為咗直球對決處理麻煩事。原先預訂中華航空機票，但因為不可抗逆因素去程航班被更改為用737-800執飛嘅航班，當然客服表示可以無條件全額退款當然係先退再講。於是趁機改為去程坐星宇回程用Avios兌換國泰機票。

按照慣例先去環亞貴賓室坐下，指定信用卡每年六次可以免費入，用後只需要六十日內消費指定金額就可以括免費用。今次揀近35閘口嘅環亞貴賓室主要原因係有採光可以睇飛機，其次係當日航班未有指定閘口，呢個中間位就啱啱好。

呢日星宇安排咗去差唔多最尾嘅69號閘口，要預留足夠時間前往。

未夠鐘就週圍行下，呢日幾好彩見到日航大阪世博彩繪機。

泰國亞洲航空彩繪機。

行完一輪就見到飛機已經到閘口準備上落貨。

呢日坐走廊位係航空公司系統自動分配，online check-in派位見無乜大問題就無再改。

呢款座位坐感一般般，如果唔係國泰A321neo行距問題其實張HAECO凳先係最好坐。

呢個行距先係正常嘛。

坐親星宇都正好錯過呢啲IP合作，估唔到完咗咁耐仲有備品包裝未清晒。

細節決定成敗，星宇全機WiFi可以免費使用SNS文字訊息傳送，不過現今世代無乜邊幾個人用通訊軟件只會傳純文字，如果遇上有人傳圖片畀你咁你只會收到通知而唔會真係收到訊息。By the way 星宇無封鎖Discord，好過國泰。

餐飲係我最期待嘅部份，主食份量已經比主流航空公司要大，好難得極短途航班有齊水果小食飲品，呢個叉燒意粉老實講好香港茶記味道，可惜星宇喺香港未能挑戰主流航空公司，如果唔係的話其實係好有競爭力。


IFE內音樂一如以往嘅內容豐富，電影感覺上好似比上次多。


沒有期待就沒有傷害，泰籍Lisa同日本LiSA都係未搞清楚，所謂精品航空也不過如此。



星宇最唔好就係落地桃園之後泊outer bay要坐接駁巴士去返航廈，不過車係佢自己全新嘅。

我個人係幾鐘意呢啲小彩蛋。

汶萊航空50週午塗裝。

台灣虎航樂天猿彩繪機。

四引擎飛機買少見少要好好珍惜，韓亞都就快消失啦，希望出年有時間可以坐一次。入境桃園一如過往體驗極佳，入境大排長龍，機場捷運運力不足，取代香港作為轉機樞紐旨日可待。入境之後就係直球對決處理私人事務嘅時候。

直球對決比我預期中快結束，所以同日南下去高雄住一晚搵朋友食飯，回程安排喺高雄返香港。歡迎回到國泰高雄小港機場，喺呢個機場可以體驗沖繩那霸機場同級嘅安檢體驗，機場只有兩條安檢通道，出境之後就無啖好食，所以建議大家市區食完再去機場會更好。

呢日安排喺23號閘口十分近出境後通道。

熟悉嘅娛樂系統，呢個位都係電腦派位，好處係個位後面無人可以隨意挨後同近廁所啱我呢啲老人家。

聽聞呢個餐係萬年不變，好少由高雄返香港所以不評論，味道正常但沒有比較沒有傷害。

直球對決之旅結束，無乜事暫時都唔會再訪台免得又PTSD。

CI 細機唔坐但坐JX細機

cruisesnet 發表於 2025-5-7 00:45
CI 細機唔坐但坐JX細機

我雖然一向唔鐘意坐細機，但開頭訂CI就係特登揀新嘅A321neo避開啲舊737-800純粹貪有IFE

我上年坐JX234，去台北都有橋出直駁大樓……

我諗橋出定outer bay，應該好睇果日機場繁忙程度。