以下為有關板友的分享:
本人係平日夜晚唔算多人嘅時間,坐金巴 MAN A95 去澳門試坐輕軌,順便睇下未試過對外開放嘅東人工島。
巴士去到香港邊界時,路面逐步收窄,去到內地界線時,得返路肩可以行,全部車都一定要入東人工島,無一例外。
一入東人工島,就見到有大陸公安同特警車輛停泊,當然亦有持槍公安。島上面有個建築物,下面有兩條貫穿建築物嘅車路,呢兩條路分別用嚟檢查細車同大車。
檢查大車條對得一個落客位,巴士要逐部排隊落客做安檢。所以路上會有條巴士龍,係人工島上面用嘅時間主要都係車上面等。等咗20分鐘左右,終於到我部車。另外我留意到去珠海嘅巴士會行另一條線,被公安簡單檢查後就直接走得,唔需要落車檢查。
帶齊所有行李後,乘客要經過一部樣貌辨識機,辨識通過之後,就類似機場咁去前面X光機過行李,同時人就要過探測機,再接受公安用探測器檢查身體。安檢設施入面,唔覺有早幾個月檢查電話內容嘅設備。
之後,乘客就要入大樓入面嘅小型大堂,埋去櫃枱交證件俾公安檢查,同大陸通關一樣。公安無講要邊隻證件,我嘅觀察就係俾香港身分證或回鄉證都得。都係同過關一樣,佢地會將證件用閱讀機檢查,無問題就可以離開,完成成個程序。
同時間巴士亦要接受全面檢查,公安會上車逐個位去檢查,非常仔細。巴士檢查完之後,會駛前去上客位上車,金巴乘客可以上唔係同一部巴士。
之後部巴士就離開安檢範圍,入返隧道。出入人工島前後用咗約30分鐘。提返大家,返香港係無安檢。
另外大家可能奇怪,點解港珠澳大橋要咁樣交安檢,坐船去澳門就無。係一啲蛛絲馬跡上我發現,大橋本身可能有啲「慶祝活動」會舉行,所以當局特別緊張。
最後呼籲大家,除非你好似我咁好想踏足下香港人有份俾錢起嘅東人工島,而又唔介意遇上麻煩,否則呢個星期都係唔好用港珠澳大橋去澳門、珠海。