乘客的候車習慣，是否難以改變？

剛才同板友再次就「新界 <-> 油尖旺線」北行係咪一定要經傳統食糊位——彌敦道，先能夠儲夠客去討論。
其中最主要既論點，就係乘客（或者人啦）做野都有慣性，做耐左就唔想主動去改變，除非有足夠大既誘因。
因為大家都習慣去彌敦道等車，所以亦都造就所有新界線都經彌敦道北行，久而久之，
就變成「唔停彌敦道就唔會夠客」既迷思。

係既，
如果我係低生或者9A，
我都唔敢貿貿然將一條新界線北行改為唔經彌敦道，
但為何連繁時幾班車都唔敢試，
而繼續碌哂成條彌敦道呢？

而家最大問題係，
大家都知道，
巴士公司玩緊「青沙概念股」，
但礙於道路網問題，
如果要途經彌敦道，
無論係佐敦（260X / 269B），定油麻地（280X），定旺角（現時既287D / 281E），
對尖沙咀來講，都唔見得有好大既車程優勢。

******
今次，
我嘗試將話題抽離少少，
暫且唔講「彌敦道客倉」或者「尖沙咀返新東咩走線最靚最快」呢類話題，
而係從幾個真實個案，去探討乘客候車模式，係咪根深蒂固，難以改變。

一、307北行不停軒尼詩道、怡和街
-> 眾所周知，307同一般東隧線既北行走線，
係有所唔同。
其他線如603、681、673等，都係經軒尼詩道、怡和街呢類傳統客倉位來食糊；
但偏偏307當年礙於配額問題（有錯請指正），而需要過金鐘後，兜出灣北，
停入境處同皇室堡呢兩個站，
無哂菲林明道同SOGO呢兩個客倉位。

但偏偏，東鐵過海前，
307於呢兩個站既上客人數，
卻係穩定地多，亦都佔全車乘客一定比例。
當然，我手頭上無數據，
去研究「如果307當年跟603、681行哂軒尼詩、怡和街，客量會否比高峰期更好」，
但至少，憑呢個個案，
我地可以推論，
就算要班客由軒尼詩行去入境處，或者由SOGO行去皇室堡，
只要車程吸引，
依然能夠吸引到乘客去搭。

*不過呢個例子，只能證明就算站位唔係最靚，但車程夠快，一樣吸到客；但就證明唔到乘客等車習慣係咪難以改變，因為307全日無耐（約2個月左右？有錯請指正），已經改行灣北。

*******
二、屯轉、屯碼、黃金
-> 呢個個案同題目有少少偏離，
因為唔單單討論候車習慣，
而係整個乘車習慣。
以往未有屯轉前，
來往屯碼 <-> 港島 / 東九，
又或者青公 <-> 港島，
都係坐962系 / 259D。

但自從屯轉落成，
再加上月票效應及城巴近年加價幅度較大之後，
就出現左呢一、兩年都成日討論既話題。
越黎越多人用59MX / 52X + 61M去屯轉再去轉960/961/2589D。
儘管繁時城巴有962P/S直達服務挽留客人，
但一到非繁，受車程慢及班次相對疏落情況下，
唔少人都選擇左犧牲一程過 / 舒適，而走去屯轉轉車。
可以話係「犧牲舒適度來換取較平價錢 + 較快車程」。

雖然呢個例子對「等車地點」既著墨並唔多，
但都可以見到，
只要有足夠誘因，
乘客既乘車習慣，係有機會改變既。

******
三、68X/268X、旺角街市
-> 原來要搵一個例子去研究候車習慣，都唔太容易。
最後我諗到既，係當日68X分拆成68X、268X。
拉遠少少講，
如果大家仲記得，
當日68X並非全日拆線，
而係下繁同時間有68X同268X由佐敦開出。
我好記得當時268X客量係幾海鮮，
有時可以上爆，
但有時如果68X於前面上客，
都可以試過未坐滿窗口位就上公路。

唔難解釋既。
放工時間，
大家一般對「時間」無咁著緊，
特別如果夏天好熱或者落緊大雨，
加上當時九巴App並唔太準確，
有時寧願上左架68X慢慢碌長沙灣道，
都好過唔知等幾耐先有268X。

268X真正成長既階段，
係68X / 268X全日分拆之後，
加上慢慢儲到客，
知名度增加，
吸引埋天水圍既居民都用268X去欖隧轉車。

而呢個例子最想討論既，就係「旺角街市與旺角北 / 太子南」一帶既關係。
以268X走線黎講，「旺角街市」一站係九龍區最北端既一個站（唔計已經過左旺角心臟地帶既銘基），
而呢個站往往都上到唔少人。
咁呢個站既客邊到黎？
以前68X未分拆前，並無呢個站，
所以呢個站既客，好可能從其他地點行過黎。
大家再睇下68X北行旺角、太子一帶既客數，
分拆後明顯地並不高。
咁都呼之欲出啦，
即係唔少快富街、弼街一帶既客，
寧願改變候車地點，行落去旺角街市上268X直上公路，
都唔想繼續坐68X。
要不是268X長期客量高企，
旺角街市未必上到車，
令到部分人唔敢搏，回流至68X，
我相信268X / 68X 旺角客既比例可以比而家更懸殊。

從呢個例子去睇，
似乎行一、兩條街，
去換取更快車程，
並唔係無可能既事。

******
總結：
-> 而家巴士公司咁識玩social media宣傳，
再配合埋同正線之間既開車時間，
要改變乘客既乘車或候車習慣，
已經比以前容易，
差在巴士公司純粹為cap水，
定係嘗試透過真真正正提升服務去cap水（唔係271X咁加完價但無快過）。

得罪講句，
不論邊間巴士公司，
定線思維上已經足足落後左20、30年，
無論係舊隧堆線，
定係新界 <-> 尖沙咀線，
都已經跟唔上時代步伐。

或者只有靠整個香港社會繼續急速倒退，
先能夠逆向追得上呢堆路線既過時步伐。

HS1588 發表於 2022-6-14 02:47
其實都係睇班次同車程呢兩樣野夠唔夠吸引, 去培養到班客改習慣
香港人搭車都越黎越少睇價錢牌, 比貴幾蚊係 ...

前幾日轉車站等63X，成24分鐘一班車，結果趕走哂客去其他慢線，得我死等。

時間就是金錢，打後我寧願66X美孚轉荃鐵好過，班次疏真係倒走客。

toby_tl10 發表於 2022-6-22 11:40
自從東鐵總站由尖東搬咗去紅磡，乘客要轉一程車，再加埋東鐵過海後，紅磡上東鐵冇位坐，尖東往新界東嘅巴 ...

Exactly
九巴青沙上腦，成日諗住upgrade啲客
但又唔諗下271X/287D有乜嘢條件吸引班客俾多一蚊

根本尖東歸西之後，尖東>馬鞍山/大埔 係好有條件做返好
如果尖東上車，下站恆安邨/廣福道，啲客係會返來
呢啲咁既特快，先值得俾多一蚊上車

甚至如樓上 樂仔 所講，半島直飛青沙，俾多三蚊都會有人搭

S3bl430 發表於 2022-6-22 09:06
早幾年我都有坐開81C,182X,88R,
窩打老道無你講到咁伏, 公主道無你講到咁好,

或者咁睇
1881>尖東>公主道加士居道路口
1881>彌敦道>中郵
行車時間係差唔多

兩架巴士
一架從理大出發，不停站直插獅隧
一架從中郵出發，塞窩打老道，九龍塘站站停入獅隧
點睇都會係前者快

你話快線塞車
反正不停站，可以自由俾司機選擇行快慢線/上唔上橋
上面條片入面架182X，正正就係九龍塘快線塞車
司機見唔對路，cut返入慢線，行橋底停燈入獅隧，最終都做到7分鐘 理大>映月台
當然最繁忙時間，公主道都會慢車
但個啲時間既271廣華段，絕對會如你所講，玩你10-15分鐘
照咁睇，尖東版271X，普遍都會比271快10分鐘，亦會快過宜家條271X到大埔

最後，again，尖東客先係重點

樂仔〞 發表於 2022-6-22 10:49
其實 271X 有無可能好似 3 年前咁用中間道出中港城上青沙 ?
照計應該都夠客 , 個速度亦都吸引 ...

頂盡繁時一兩班
其他時段應該無乜客量條件咁玩
另一個問題係，咁玩會有幾多新客？
廣東道本身已經係271地頭，反而尖東271太慢又唔就腳，市佔率好低，基本上位位都係新客

he_01 發表於 2022-6-21 08:15
泳池站上蓋有8000伙 新增人口都唔細 應該仲多過現有泳池區所有屋苑加埋
分分鐘對一啲同屯馬冇直接競爭嘅 ...

係，冇錯

只不過呢啲直行彌敦道同長沙灣說嘅線始終都係過時。而屯門亦有本錢(夠車，夠客拆線)做多啲特快嘅時候，好應該喺啲資源稍為過盛嘅線上面抽一部分出嚟做啲新式特快，60X就係最佳例子

castanopsis 發表於 2022-6-22 06:33
同意下繁客源比較分散，開一兩班車無乜意思
所以我係建議成條271X掟過去尖東，再延長服務時間，四點幾開 ...

自從東鐵總站由尖東搬咗去紅磡，乘客要轉一程車，再加埋東鐵過海後，紅磡上東鐵冇位坐，尖東往新界東嘅巴士應該係有得做，271X用嚟做尖東客好過收嗰1蚊青沙智商稅

不過九巴對271呢組線似乎唔係好想投放資源，271B都要抽271正班，尖東版271X想開1730-2230會有難度

其實 271X 有無可能好似 3 年前咁用中間道出中港城上青沙 ?
照計應該都夠客 , 個速度亦都吸引

castanopsis 發表於 2022-6-22 06:24
唔係否定你
但之前搭咗幾年尖沙咀車，你俾既行車時間，有啲令人懷疑人生
睇完你個帖，我再做咗少少資料蒐 ...

早幾年我都有坐開81C,182X,88R,
窩打老道無你講到咁伏, 公主道無你講到咁好,

由中間道返大圍,81C印象中絕小需要40分鐘或以上
(塞車隱患最大的廣華到亞皆老街一段窩打老道絕小要行20分鐘以上,通常都係10-15分鐘,講緊已經係成條窩打老道都係車)
窩打老道觀感係差但絕對唔係塞到喊

另外,公主道/窩打老道行快線繁忙時間通常因快得慢
我搭過傍晚7點的88R不下數次trap左在公主道天穚上
182X九龍塘段有時係會仲慢過182小小(快線反而塞車)

============================
通常會有人話灣仔搭182X返大圍只需半小時,
但没有人會話88R由灣北到第一城要45-50分鐘


原因就係公主道天橋有時反而被九龍塘倒灌的車塞死左
(或者因為有車要在窩打老道切線轉入禧福道,因此基督中心堂附近的快線特別容易塞車)

dubbies 發表於 2022-6-21 19:14
尖東特快, 你要當村巴咁做, 好難夠客放工時間唔穩定,
同埋叫多幾飛, 271, 271B, 271X 咩黎都上, 最緊要 ...

同意下繁客源比較分散，開一兩班車無乜意思
所以我係建議成條271X掟過去尖東，再延長服務時間，四點幾開始做到入夜
咁全個夜晚尖東都會有特快返大埔，幾時放工都搭得

至於你話要叫幾飛，我覺得唔重要
有時拆散曬，太多車拖埋一串，仲難等
271X同271做返妥善分工，做尖東新客
會好過單純upgrade 271啲舊客，upgrade唔成就載半車空氣咁