(麻帆良市時報記者高坂 穂乃果報導)
香港嘅雙層巴士自 1980 年代起放寬至最長 12m,
並且配有三條車軸以分擔全車重量, 以達至增加載客量嘅效果,
昔日一架 12m 三軸非空調巴士因為使用 3+2 座位編排,
加上下層以企位為主嘅車廂格局, 使其可以負載高達 160 多名乘客!
但係隨住乘客嘅乘坐舒適要求提高而轉用 2+2 座位編排,
加上新式巴士使用超低地台同直樓梯等規格,
都令現今一架 12m 三軸巴士嘅可載客空間顯著減少,
要增加巴士載客量, 只有將巴士車身加長先至係不二法門。
早喺 2007 年, Alexander Dennis Limited (ADL)
已經推出 12.8m (42 呎) 版本嘅 Enviro 500 雙層巴士,
並且喺美加市場使用, 其後美加地區訂購使用嘅 Enviro 500 新巴士,
都係以 12.8m 版本為主, 呢個新規格終於被香港嘅巴士公司睇中,
時值 ADL 出品嘅 Enviro 500 系列喺 2012 年達轉款之期,
並且命名為 Enviro 500 MMC (Major Model Change),
ADL 喺應香港巴士公司嘅要求發展 12.8m 新巴士時,
自然亦以呢個新底盤作為藍本, 設計出 12.8m 嘅 Enviro 500 MMC 新巴士,
比香港市場使用。
載通國際喺 2013 年為九巴訂購 2 部 Enviro 500 MMC 12.8m 巴士,
佢地配有 Euro 5 標準嘅 Cummins ISL8.9E5340B 引擎,
同 ZF Ecolife 6AP1700B 六前速波箱。首部新車由珠海廣通客車完成組裝車身嘅工序後,
喺 2014年 4 月下旬運抵香港, 並且於兩日後進行首次驗車。
首部新車與另一架 Volvo B9TL 12.8m 樣板車,
一同喺 6 月 2 日喺九巴月輪街車廠參與記者招待會, 向傳媒介紹九巴首批 12.8m 嘅新巴士,
並且稱會安排呢兩架巴士試驗行走 43X、49X、277X 同 279X 線, 以收集行車數據。
其後喺 2015 年 分批加訂合共 150 架同款巴士,
令呢款巴士喺九巴車隊嘅總數達 152 架。同首兩架巴士一樣,
佢地由珠海廣通客車負責組裝車身, 並且於 2015 - 2016 年間全數付運。
佢地被編號為 3ATENU 1 - 151, 係九巴首次以六個英文字母混合數字作為車型代號,
另外一架巴士更付用四輪轉向功能, 九巴亦為呢部巴士另配編號為 3ATENUW 1,
成為九巴車隊中, 車型代號最長嘅巴士。
由於車身加長左, 載客量亦有所提升, 達 146 人之多,
有部份巴士下層低地台區座椅被拆除, 以增加車廂空間容納更多企位乘客,
令呢批巴士嘅總載客量提升至 155 人, 成為目前九巴車隊中載客量最高嘅巴士車款,
另外亦有一批 3ATENU 下層車廂設有行李架及多用途空間, 主要行走 B1 線,
以紓緩該路線擠逼嘅問題同縮短候車時間。由於呢款巴士車身較長,
駕駛呢批巴士嘅車長都要經過特別訓練; 為方便車長區別車輛,
所有 Enviro 500 MMC 12.8m 巴士嘅駕駛室內,
更貼上 "此巴士 12.8 米長, 只供已受訓人員駕駛" 標示,
而呢批巴士亦只會行走指定嘅路線。
今日, 麻帆良市正式歡迎九巴 ADL Enviro 500 MMC 12.8m 巴士登場!!
對 E500 巴士系列情有獨鍾嘅市長 Super Bus,
特別為呢款 E500 MMC 12.8m 巴士起左一個稱號叫做 "大長金",
佢話大家千祈咪以為佢將呢款車同 N 年前嘅人氣韓劇 "大長今" 相提並論呀!
叫得佢做 "大長金", 就係因為佢有多個九巴之最 --
九巴最長嘅巴士車款、九巴載客量最高嘅空調雙層巴士、
以及九巴車隊中擁有最長車型代號嘅車款,
再加上佢地嘅金色車身塗裝, "大長金" 呢個稱號實在係實至名歸,
Super Bus 仲話, 雖然佢地嘅對手,
Volvo 都出左同樣係 12.8m 嘅 B9TL "大長威" 比香港試用,
可惜佢地嘅車重加上沿用尾軸驅動嘅設計,
唔單只喺載客量同操控性都令佢地輸比 E500, 更喺驗車之時遇到阻滯,
令到 E500 可以喺 12.8m 嘅長度極限上獨領風騷,
原本曾經一度係香港巴士市場一哥嘅 Volvo, 依家都要靠邊企啦!
佢仲話, 雖然 12.8m 嘅巴士咁長好似好難操控咁,
特別係轉彎可能會更高難度,
但係如果睇番喺外國啲巴士, 13.7m 或者 45 呎長嘅大客車,
喺一啲好似香港咁多橫街窄巷嘅地方都可以行走自如,
只係比 12m 巴士長唔夠一米嘅 12.8m 就更加應該唔會老鼠拉龜,
當然要安全地操控呢啲巨無霸巴士, 足夠嘅訓練就點都唔可以決少嘅,
無論如何, 12.8m 巴士可以喺香港落地生根,
唔再只限最長 12m, 算係香港運輸署對巴士長度限制嘅一個放寬嘅態度,
而唔係墨守成規, 亦算係一個進步啦~
隆重歡迎! 九巴 ADL Enviro 500 MMC 12.8m 巴士, 見參!!
SV1175 @ 73X, 證書編號 159, 限量 900 架
TU9317 @ B1, 證書編號 426, 限量 900 架
正式落地!! 九巴大長金駕到!!
SV1175, 車隊編號 3ATENU1, 係九巴首架 12.8m 版嘅 E500 MMC
打開引擎蓋
TU9317, 車隊編號 3ATENU11, 真車車廂内設有行李架,
用作行走來往天慈與落馬洲鐵路站嘅 B1 線
車頭兩側設有閉路電視鏡頭, 亦係九巴新車嘅標準配備之一
車內行李架特寫
當九巴 12m E500 MMC 遇上九巴 12.8m E500 MMC
來一個對比先~~
差 0.8m 嘅分別
九巴水貨快線
日日都有咁多水貨客搭 B1, 難怪九巴都要為呢條線加碼啦~
九城新 12.8m MMC 集會, 幾時出埋龍運同九巴仲有 Cityflyer 嘅 Facelift 版 12.8m MMC 呢~?
真車相
Thanks for reading~ |
