高鐵未通車,所謂實測其實係記者亂咁黎,計高鐵時間就左加右加,排隊上車、出站入站、地鐵買飛等車都樣樣計凸時間,但計直通車時間就幾乎淨計直通車車程... 廣州東站入境唔計、廣州東站去目的地時間唔計... 唯一記者估岩係一般情況西九龍去廣州南都迫近60分鐘
以下小弟將記者的錯誤逐一擊破:
1. 記者假設西九龍站淨係過關都要花20分鐘,原因係落馬洲過關要20分鐘...
2. 記者假設尖沙咀出發到西九龍站上高鐵的時間共60分鐘 (尖沙咀到西九龍站入站假設要20分鐘+過關又假設要20分鐘+買飛安檢上車又假設要20分鐘,係爭在未計去廁所開大時間),但神奇在尖沙咀出發到紅磡站上直通車的時間卻只計30分鐘(記者並冇說明)?? 明明程序幾乎一樣,除非西九龍站入面大到要比紅磡站花多30分鐘浄行路,但首先西九龍站入面唔係真係咁大同埋站入面一部分腳程已包含在過關程序內,所以個記者真係亂咁黎
3. 直通車去到廣州東站竟然唔計入境出站時間?? 個度至少15分鐘先出到站,另一邊廂西九龍站/廣州南站就乜都計多
4. 計高鐵時間,就以上下九路、天河市中心為目的地,但計直通車/廣深和諧號時間就以廣州東站做目的地,事實上廣州東站去就近的天河市中心(體育西路站)都要再搭地鐵6分鐘,去上下九路(長壽路站)更要24分鐘,記者完全唔計,死未!!!
5. 因為廣州南站大所以轉地鐵過程要30分鐘?? 記者又亂咁吹,廣州南地鐵站係同高鐵站共構,地鐵站打橫在高鐵站中軸貫穿28個月台的地底,高鐵到達區有成4個地鐵站入口,不論邊個高鐵月台一落就見到地鐵站入口,然後一落就係地鐵站大堂,由高鐵站月台到地鐵站月台只需5分鐘(如果死要計埋買地鐵單程票的時間,唔該廣州東都要計埋)
6. 記者將廣州南站到廣州市區的時間定為1.5小時,轉地鐵過程30分鐘上面已踢爆,廣州南站到廣州市區的地鐵車程真係要60分鐘?? 根據官方時間及個人經驗,對比一下由廣州南站或廣州東站前往廣州市區各地所需的時間:
往公園前站(廣州傳統市中心):
- 廣州南站29分鐘、廣州東站17分鐘,分別只有12分鐘
往廣州塔站:
- 廣州南站33分鐘、廣州東站15分鐘,分別有18分鐘
往珠江新城站(天河新市中心):
- 廣州南站35分鐘、廣州東站14分鐘,分別有21分鐘
往體育西路站(天河舊市中心):
- 廣州南站37分鐘、廣州東站6分鐘,分別有31分鐘
無可否認廣州南站離天河區的確較遠,但真係唔明記者點樣作大到60分鐘,而且亦可以見到,廣州東站前往廣州傳統市中心只比廣州南站快12分鐘
綜合以上各點,利用高鐵由尖沙咀上廣州市區的時間被記者發水60-70分鐘至3.5小時,實際上2.5小時連天河都能輕輕鬆鬆去到(45+60+45),而利用直通車由尖沙咀出發到行出廣州東站2.5小時其實非常非常趕,已經唔計再要地鐵接駁的時間
最後結論,尖沙咀出發,如果係去廣州傳統市中心及珠江以南,高鐵一定完勝直通車
|