本帖最後由 VocaloidMikuBus 於 2017-8-14 21:39 編輯
(麻帆良市時報記者高坂 穂乃果報導)
位於香港島嘅山頂道, 係所有來往山頂嘅車輛,
包括來往中環碼頭及山頂嘅新巴 15 號線巴士嘅必經之路,
由於沿途除左狹窄多彎之外, 更要經過加列山道天橋 (又稱渣甸橋) 嘅橋底,
而該橋底嘅高度只有 4.1 米, 因此行走呢條路線嘅巴士,
除左無法使用超過 11m 長嘅巴士之外, 更要使用矮身版本嘅雙層巴士行走,
喺中巴年代, 行走15 號線嘅雙層巴士款式, 計有最初使用由單層巴士改裝而成,
車隊代號 LS 嘅矮身版佳牌阿拉伯五型 (Guy Arab V) 雙層巴士,
1970 年代引入嘅 30 架短陣版 Daimler / Leyland Fleetline (SF 2-31),
同喺 1980 年代引入嘅 6 架 Dennis Dominator (SD1-6),
一直到 1998 年新巴接手中巴嘅專營權, 當時由中巴過檔嘅 SF 巴士已經年事已高,
為針對渣甸橋橋底嘅高度限制, 新巴於 1999 - 2000 年間,
特別引入 40 架由 Duple Metsec 提供車身, 全長只有 10.3m,
高度只有 4.17m 嘅 Dennis Trident 低地台三軸空調雙層巴士
(3301L - 3340L, 其中 L 代表矮車身 Low height 以資識別, 後來已取消) 行走呢條路線,
其後喺 2002 年再增購20架同型號巴士 (3341-3360)。
踏入 2015 年, 隨著呢批 Dennis Trident 年事已高行將退役,
新巴於是同英國 ADL 接洽, 合作打造全新嘅矮身雙層巴士,
新巴士以兩軸設計嘅 Enviro400 10.6m 底盤為藍本,
並且縮短頭軸跨距, 令巴士全長只有 10.4m,
以靈活應付山頂道沿途狹窄多彎嘅路面環境。
由於頭軸跨距縮短, 雖然巴士依然保留使用全闊前門,
但係車門使用兩扇一闊一窄嘅設計, 以便秩序混亂時可以控制人流,
輪椅乘客亦同上一批嘅 Trident 巴士一樣由中門上落,
在在都係呢款矮身版 Enviro400 嘅特色。
新巴士同標準版 Eviro400 一樣使用, 使用由 Cummins 提供,
有 320 匹馬力嘅 Euro 5 標準 ISL 8.9 E5 320B 引擎,
連接由 Voith 提供嘅 D864.5 四前速自動波箱,
並且配上 Facelift 版嘅 Enviro400 MMC 車身設計,
車頭上層特別嘅樹擋設計成為呢批 E400 嘅最大特色。
新巴合共訂購 60 部百份百度身訂造嘅矮身版 Enviro400 巴士,
首批新車喺珠海廣通客車廠完成車身裝組嘅工序後,
於 2016 年 11 月抵港, 並於翌日進行首次驗車,
其中一架新車更於同年 11 月 20 日獲配編號為3800。
首4輛巴士 (3800-3803) 於 2016 年 12 月 22 日出牌並且投入服務。
隨住更多矮身版 Enviro400 巴士完成車身裝組嘅工序並且運抵香港,
新巴車隊內現役嘅矮身版 Dennis trident 亦將會喺未來一兩年內陸續功成身退,
並且由呢批新進接捧, 繼續擔當舊巴士嘅吃重角色。
今日, 麻帆良市正式歡迎新巴 ADL 矮身版 Enviro400 巴士登場!!
Enviro400 呢款巴士, 對香港嘅巴士愛好者嚟講都應該唔會陌生,
皆因九巴同城巴, 以至後來嘅港鐵巴士部, 都先後引入一定數量嘅 Enviro400 巴士,
以替換車隊內年事已高嘅各款 10.6m 三軸巴士,
但係矮身版嘅 Enviro400 喺香港出現實屬首次,
配上 Facelift 版嘅 MMC 車身, 更令大家眼前一亮,
再加上佢係為香港嘅新巴百份百度身訂造, 同英國嘅 Enviro400 MMC 相比,
香港版嘅矮身版 Enviro400 無論由內至外都顯得格外獨特,
再加上佢同香港嘅標準版 E400 相比, 無論車長同高度都差一截,
更令呢款矮身版 E400 顯得嬌小玲瓏,
難怪連身為 Enviro 巴士系列粉絲嘅市長 Super Bus,
見到呢款巴士之後都不禁講一句: "卡哇兒呢~!"
隆重歡迎! 九巴 ADL 新巴 ADL 矮身版 Enviro400 巴士, 見參!!
證書編號 0164, 限量 1083 架
正式落地!!
行走 15 號往山頂嘅 E400, 正好發揮佢矮車身過橋底嘅最佳本領
車頭上層樹擋特寫
兩頁闊度不一嘅上車前門設計, 成為新巴矮身版 E400 嘅特色之一
因應九巴曾經發生乘客意外撞破車門玻璃跌出車外嘅事故,
新巴 Enviro 400 嘅滑動式落客車門設有橫鐵作為欄杆
同城巴 Enviro400 相會
來一個對比先~~
當新巴 Enviro400 遇上新巴 Enviro500 MMC Facelift 12.8m
又再來一個對比先~~
呢個角度睇, E400 的確矮身好多, 名副其實嘅 "小矮人"
Thanks for reading~ |
