本帖最後由 Charon1999 於 2018-3-21 19:43 編輯
《290及798之未來～難離難捨之北南戀～》
先係一D樓盤廣告：
- 天晉IIIA+IIIB：1,289個單位，2017年入伙
- 嘉悅：372個單位，2016入伙
- The Parkside：591個單位，2017入伙
- 帝景灣：536個單位，2016-2017入伙
- 海天晉：628個單位，預計2018年入伙
- CAPRI：428個單位，預計2018年入伙
- SAVANNAH：804個單位，預計2018年入伙
- MONTEREY：926個單位，預計2018年入伙
- 海翩滙：840個單位，預計2019年入伙
- 藍塘傲：605個單位，預計2018-2019年入伙日出康城首都：2,096個單位，早已入伙
- 日出康城領都、領峯及領凱：4,272個單位，早已入伙
- 峻瀅：1,777個單位，早已入伙
- 緻藍天：1,648個單位，2016年入伙
- 峻瀅II：872個單位，2017年入伙
- 晉海：2,172個單位，預計2019年入伙
- MALIBU：1,600個單位，預計2020年入伙
- 寶盈花園：3,200個單位
- 怡明邨：2,059個單位
- 將軍澳廣場：2,880個單位
- 將軍澳中心：4,542個單位
- 天晉：1,028個單位
- 富康花園：3,966個單位
- 尚德邨：5,600個單位
- 廣明苑：4,256個單位
- 寶明苑：1,476個單位
- 唐明苑：1,920個單位
- 維景灣畔：5,728個單位
- 善明邨：2,000個單位
- 健明邨：7,000個單位
- 彩明苑：2,800+1,920個單位
- 都會駅：1,679個單位
- 城中駅：2,096個單位
- 清水灣半島：1,959個單位
再係一D歷史：
- 日出康城整個發展計劃分為一至十四期興建，預計於2025年全部完成，屆時將建有50幢樓高46至59層的樓宇，提供25,500個住宅單位，可供63,000名居民居住。
- 將軍澳南發展計劃於2000年展開，規劃為高密度住宅區，當時唯一已落成的住宅為寶盈花園，其後因被批評密度過高而重新規劃為發展低、中密度住宅。到2005年，政府順應大眾要求，物業地積比率會由原來的6.5倍，降至2至5倍，發展高度以階梯式向海旁遞減，住宅項目圍繞政府設施、中央大道、市鎮公園及將軍澳南海濱長廊而建。預計居住人口，由原來的13.1萬人減至9.8萬人。到2012年11月，政府為增加私人住宅供應，放寬將軍澳南4幅住宅地發展密度，將地積比率提高0.3至0.4倍.....
所以呢？
00年代雄心壯志嘅新巴，最終係將軍澳區去到一個甚至要聲稱取消大部分路線嘅地步（雖然我哋知係技倆，但當年真係少人到可以直接Cut），主要原因係因為將軍澳市中心南部嘅住宅用地實在拖住咗太耐。
睇住怡明邨、善明邨同天晉相繼入伙之後，好明顯將軍澳南各條路線嘅客量都有所提升。而踏入10年代，受惠於將軍澳市中心人口正常增長，同埋寶琳坑口都越嚟越多新居民遷入，亦都相繼開辦咗往返沙田區嘅798同埋往返荃灣區嘅290。
我哋都好清楚兩間巴士公司經歷過十年痛苦回憶之後，開辦新路線時以將軍澳南作為起點，途經比較多人嘅將軍澳北先至上路係合理嘅。我哋都唔敢奢望可以自己有一條路線出去呢啲地區，尤其是睇住當年空位多到就嚟可以跳舞嘅796B 796C 796S 296D同692。
然而隨著將軍澳新市鎮一直發展，除咗將軍澳南已經越嚟越多新樓宇之外，令人心曠神怡嘅日出康城亦都愈來愈多樓宇相繼落成。咁究竟今時今日呢兩條路線其實係咪仍然需要繞經全個將軍澳先至上路呢？
其實我哋可以睇到，即使呢兩條路線行到2046先上路，將軍澳廣場同尚德仍然有唔少人等候，入新寶城嘅時候亦都有唔少人喺車上面。可見其實將軍澳市中心嘅居民都係坐車嘅。如果呢條路線能夠更加直接咁樣上公路或者去寶琳北路，理論上應該可以再吸引多更多人去乘搭。
然而，人口一路增長，但巴士公司冇打算去吸引依批乘客。
即使290X出到九龍區之後仍然要途經安達安泰，市中心上車其實同坐290有冇分別呢，但至少提出咗全日。另一間公司？好似已經完全遺忘咗798係佢咁，只係早上繁忙時間有一班完全時間唔配合任何上班人士嘅798B，兼且唔經調景嶺。
究竟將軍澳南同埋日出康城合共咁多人口，係咪連一條正常出去沙田又或者荃灣嘅路線都唔值得擁有呢？定係巴士公司有特殊癖好鍾意南北搞埋一齊？
一件事要培養成習慣其實好容易。當佢哋發現樓下嘅巴士路線要坐好一段時間先至出到市區，又或者完全唔方便自己，久而久之習慣咗坐地鐵，到時你用任何方法吸引佢哋，都未必可以令到佢哋回心轉意，尤其是將軍澳區坐地鐵其實尚算方便。
而家已經入咗伙嘅樓宇唔算多亦唔算少，今年內亦有大量樓宇將會相繼落成。如果巴士公司仍然希望將軍澳南係有人會坐巴士嘅，我真係希望你哋可以趁住呢個時間去考慮清楚究竟將來嘅路應該點樣行。要記住將軍澳市中心同埋調景嶺已經有唔少人係比你哋嚇走咗，好彩嘅係出旺角同埋土瓜灣嗰兩條路線仍然係調景嶺做尾站，都仲有一批人會行落去巴士站睇下。
當然，假如你真係唔希望做呢班客人嘅，都希望你可以明確地比個表示出嚟，唔好整條不倫不類嘅796P，或者唔知有冇快到五分鐘嘅290X，擺個站牌係人哋屋企樓下就以為自己好似做咗好多嘢咁。
（部份内容曾在新巴18P 19/3起調整班次提及，為免OT故出新Po）
|
樓主
