荃灣好唔好住？

「衣」「食」方面，荃灣有海量商場，由西樓角路一帶嘅地道小商場，到如心、荃新天地呢類中高檔商場，豐儉由人，任君選擇，完全足以滿足居民嘅購物慾有餘。除咗商場嘅食肆，又有路德圍呢類食街，提供港粵臺日韓星馬越泰西等各國美食，令居民大朵頤快。

「住」方面，荃灣傳統受歡迎嘅住宅區包括荃灣站一帶、海濱花園、荃景圍，甚至再遠啲嘅西約。而隨住近年推行市區重建，更係出現咗區內全新指標屋苑萬景峯，以及荃灣東（德士古道以西，馬頭壩道、聯仁街、關門口街以東）一帶嘅新盤。當年，近來最受矚目嘅，莫過於荃灣西一帶新樓盤。呢啲屋苑唔少都鄰近荃灣西站，亦可享開揚海景，所以備受追捧，帶動荃灣樓價屢創新高。而講到住樓想平嘅話，更係有唔少人租住工廈嘅劏房單位；當然，想貴嘅，荃灣半山各豪宅，如朗逸峯、寶雲滙，亦可作心儀之選。而現時興建中項目（亦可能係短期內最後一個），就係億京楊屋道商住項目喇。


「行」方面，荃灣係市區前往大西北嘅重要中途站，座擁橋頭堡優勢，亦以城隧同沙田接壤，所以有海量巴士線，再加上設港鐵荃灣站及荃灣西站雙站優勢，又有完善交通網絡（應為荃葵青中最佳），出行可謂極其方便。而荃灣嘅天橋網絡更為聞名遐邇，由荃灣西站出發，喺全程有蓋嘅情況下，居民可以輕鬆抵達荃灣站一帶，甚至再續前往愉景新城，甚或係更遠嘅熊貓酒店。所以話，荃灣唔單止車輛交通方便，連行人交通都便捷不已。


就業方面，荃灣座擁柴灣角、德士古兩大工業區，更係有荃灣站一帶嘅寫字樓區，得天獨厚。值得留意嘅係，透過改劃用地，兩大工業區近年出現唔少新型商貿大廈；而即使喺舊式工廠中，亦出現咗唔少新行業落戶，由精品餐廳到室內滑板場，各式各樣，超乎想像。而荃灣亦有如心海景酒店、熊貓酒店等酒店。正正因為咁，所以荃灣區內已可提供大量工作機會俾居民，呢點相信比其他新市鎮更為優勝。


娛樂方面，荃灣市中心發展悠久，有大量娛樂設施提供，包括保齡球場、K房等室內遊戲設施。而荃灣廣場、荃新天地兩大戲院，亦係唔少居民喜愛嘅假日去處。如果想親親大自然，荃灣市肺荃灣公園、毗鄰嘅海濱長廊，亦可以俾居民如願以償；而如果想深入自然，荃灣山上更係有大欖同大帽山兩大郊野公園，郊遊資源豐饒。


最後，社區配套方面，以公眾泳池為例，荃灣就座擁城門谷同胡忠游泳池，一區二池，非區區可享。而圖書館、體育館、政府合署、法院等設施齊備，堪稱一個社區配套成熟嘅區份。


當然，荃灣區亦有唔少問題，比如話，市容較混雜，空氣較差，綠化空間不足，環境唔夠其他新市鎮好等等。但總括嚟講，我仍然認為荃灣係一個好住嘅社區。


唔知各位又點睇呢？歡迎討論~

圖書館空間比其他新市鎮少，經常無位坐

andy92 發表於 2018-7-31 13:59
圖書館空間比其他新市鎮少，經常無位坐

同期既沙田區，圖書館資源遠比其他新市鎮好

近年夏天TW區氣溫跑贏大市，那怕個站其實係山上都跑贏......

咁明顯的熱島效應既區域，好唔好住就自己諗

DGCNYO 發表於 2018-8-2 19:44
近年夏天TW區氣溫跑贏大市，那怕個站其實係山上都跑贏......

咁明顯的熱島效應既區域，好唔好住就自己諗 ...

實際數據好似唔係你講咁囉

講鐵路真係兩睇，講站數，荃灣近32萬人，3個站；沙田近66萬人，唔計馬場站，12個站，遲D 13個站。

就咁睇，沙田屈晒機係咪？咁又未必，講可達度，荃灣D鐵就好好多，不過(拖足幾十年既)沙中線起好之後，沙田就係另一番景象。