尋找無軌電車的故事 Trolleybus Museum at Sandtoft

尋找無軌電車的故事Trolleybus Museum at Sandtoft Running Day 15/10/17

--- Preamble ---

小弟之前聽過係約克郡南部有個專收藏無軌電車既博物館, 唯一直因為開放日子不合而去唔到其博物館參觀。 到十月中小弟終於完成曬前半個學期既Project, 又有香港既電車迷朋友剛好由香港來到英國遊玩, 小弟當天就買了兩張即日來回 Doncaster 既火車票,便搭上呢個尋找無軌電車之旅。

--- Route 20 & 126 ---

當日為 Isle of Axholme + Trolleybus Day, 除了排出無軌電車行走之外, 亦會展出其他 Onmibuses 及其他被私人收藏既巴士。 大會亦安排左兩班車由 Doncaster Station 開往 Sandtoft, 並使用佢地既收藏利蘭亞特蘭大 - Sheffield 1357 行走。

留意翻呢兩個班次係有同當地既市政府申請開辦, 呢個接駁巴士甚至係有正式既路線篇號。 雖然個車程係免費,不過可以使用呢個班次既乘客並不限於前往無軌電車博物館既人士, 而當日有大約兩三位街坊使用呢個服務, 前往此班次既一個中途站 Epworth。

雖然當日既派車車齡高達五十五歲,不過部亞特蘭大既表現依然非常出色。 駛出 Doncaster 既市郊之後, 司機就踩盡油門, 以每小時55英里開往 Sandtoft。 雖然巴士取道不少鄉郊路徑, 不過其避震性能依然好高, 小弟坐在上層配上有厚氈既座位既時候, 車輛除左有少少 '浮' 之外, 避震甚至比得上香港既紅蛋。

係大約四十分鐘後, 該車就到達呢個係鄉郊既無軌電車博物館。 博物館既入場費為每位八鎊, 並於入場時支付。 (學生票價為六鎊) 呢個票價係包曬全日任搭無軌電車同行曬所有展覽館。



之前 #1357 既行車片段可以係度睇 - 個司機手勢係非常之好 - 佢肯踩之外亦同時間對個波箱好溫柔, 撻 '波子' 轉波時個聲都好清脆 (我會建議大家 10:35 開始睇 - 由於頭半係用手機錄, 後半既 Audio 相對上係靚d, 不過畫面就震少少~~)


--- The Trolleybus Museum at Sandtoft ---

無軌電車博物館既建築比較分散, 並沒有一個主展覽館。 博物館中間有一個俾無軌電車行走既圈同其附屬設備, 而呢段設有架空電纜既路段旁邊就係個車廠。 係呢個車廠附近有不少 Caravans, 而呢d流動房屋入面就裝滿英國近代既物品

無軌電車既走線可以算係充分試盡無軌電車既性能。 首先,無軌電車會以逆時針方向行走個路段一次。 到達起點前, 個售票員會下車啟動電纜既駁口, 確保集電弓連接上左邊既支線電纜。 售票員登車後,司機就會 U-Turn, 並以順時針方向行走個行車圈一次, 最後再次 U-Turn 入站,結束大約八至十分鐘既車程

當日館方分批派出共四架無軌電車行走, 分別有 Cardiff 203, Manchester 1344, Wellington 82, 及 Bournemouth 297. 館方亦開放無軌電車既車廠供參觀 - 相信對香港人黎講呢度最有親切感就係呢部 Alexander 車身既 Dennis Dominator - 呢部樣板車係由 South Yorkshire Passenger Transport Executive 擁有, 並於 Doncaster Racecourse 附近試行 - 可惜計畫於1985年試行一年後便遭取消, 而呢部樣板車則由博物館收藏。

後來,小弟同博物館其中一個有參與無軌電車復修既人士閒談 - 佢表示當年無軌電車既摩打設計比較簡單,而摩打既散熱性能係同摩打既轉速掛勾, 變相部車長期慢駛既話其實係會加速損耗無軌電車既摩打 - 佢亦表示官方亦有意礦大架空電纜既規模, 唯博物館資金有限, 因此呢個計畫係被無限期壓後。

今日亦有唔少巴士參與是次活動 - 而當日 Doncaster Omnibus & Light Railway Society 亦派出唔少車輛參與此活動, 例如 原屬 Doncaster 既 Leyland Tiger Cub 及 Royal Tiger Cub 等。 私人展品方面則有部原屬 Magic Bus 既兩軸版 Dennis Dominator Dominator 15032 (算係少量內銷既 Dominator之一), 而 Stagecoach 亦派出一部掛上 Hull Tigers 特別色既 E400。











--- Wrap Up ---

轉眼間已經係離開既時間 - 雖然博物館係六點先關閉, 不過由於 Sandtoft 開往 Doncaster 既最後一班穿梭巴士係於 1700 開出, 小弟只好提早同呢個博物館道別。總括小弟今次呢趟旅程, 呢個體驗係非常豐富兼獨特。 個體驗係完全值回票價 (就算剩係搭兩程 Atlantean 都抵啦), 而有得乘搭呢個五六十年代既交通模式係真係幾難得。 如果閣下係英格蘭南約克郡, 不妨周末抽空拜訪呢個博物館~~

順帶一提, 全英國係有三個運作既無軌電車系統, 分別係 Black County Living Museum, East Anglia Transport Museum, 同上述介紹既 The Trolleybus Museum at Sandtoft。雖然無軌電車既種類同數量應該係 Sandtoft 最多, 不過呢個博物館應該係最難就時間去個個 - 如果閣下係 Birmingham 或 Norwich 附近, 不妨考慮參觀埋當地既交通博物館~~