香港搭巴士咁貴又難等，係唔係想鼓勵人揸私家車？

點解話香港搭巴士貴又難等，鼓勵人揸私家車呢？

例子一（貴兼難等）：住淺水灣道沿線，返南島中學。夾埋搭唔夠2公里，但俾足兩程全程車費，每方向盛惠$11.3（6+76），重要41A 76都係疏。住得嗰啲豪宅區嘅富有人家本身已經有養車，咁真係揸架私家車接送重好。除非學校強制要人搭校巴，否則唔怪得學校區一返放學必塞車。
例子二（貴，供不應求）：住上環，喺大口環海皮返工。自己揸車就6.5 km，20分鐘內必到，但係搭車嘅話呢？搭城巴就搭到天荒地老，重要域多利道行落去；如果搭港鐵轉小巴？兩程加埋連轉乘優惠，返工已經$11.4，收工就$10.0，上到即班小巴就話同自己揸車時間差唔多，但係繁忙時間就要同班數碼港嘅返工客爭車搭，分分鐘要等返幾班先上到，咁真係寧願買架錢七自己揸好過啦。
例子三（三舊屎任你揀）：鄉下佬住林村比較入嘅村屋，喺荃灣返工（唔近西鐵）。揸車就經大帽山大約17公里，半個鐘內到。咁養車要牌費保險，搭公交又點？
選擇A：64K轉51（每方向$14.7），但係51一個鐘一班，點就？
選擇B：64K轉73X（每方向$15.9），但係兜到天荒地老重要塞馬場。
選擇C：欖隧，但係要多重轉車，等完64K重要等251A（每方向$15.9）。唔想幫襯九巴251A？去到路口同時等埋78小巴，但係三程加埋結果變成天價，每方向$24.7。不過可以買九巴月票，起碼頂咗程64K同出荃灣嗰程，睇下中間駁轉車站嗰程等中251A定小巴78。但係交通費都成千一個月，住鄉郊泊車成本低，隨時同養車差唔多。

盧森堡明年暑假起免費搭車
不如你移民啦

住鄉郊泊車成本低？你問佐村長未呀

油錢?出到市區又要泊? 牛肉乾每月預算?   如果等到有張月票出 你會唔會即刻覺得巴士唔貴 兼相對冇咁難等(乜車都上左先)

公共交通工具本身就好難覆蓋所有人需要。你提及果堆例子都係特殊情況。使唔使整條繁時線，龍鼓灘直達黃石碼頭，九龍唔停站? 或者林村去梅窩，荃灣區唔停站?有無人坐都成問題。

lsc04d11 發表於 2018-12-10 10:21
油錢?出到市區又要泊? 牛肉乾每月預算?   如果等到有張月票出 你會唔會即刻覺得巴士唔貴 兼相對冇咁難等(乜 ...

當然啦，人哋北歐搭一程巴士3歐，但係有齊各式各樣月票迎合通勤客需要呢。

最起碼應該要整區域月票先啦。

咁你可以試下去外國住.

香港搭巴士貴同難等？ 你去外國搭雨車先返黎講啦！

你唔提下白泥去清水灣呢D例子！林村一帶已經算好方便啦！64K轉73X 51 甚至西鐵一樣得﹐你係要用社山黎講咁冇辦法

不如再絕D,蓮麻坑去蒲台島