點解巴士公司放排隊欄亂咁放

巴士公司放排隊欄，無明顯關係嘅線放埋一齊，幾乎一樣嘅線，甚至係分支路線就整兩條隊：

好似旺角彌敦道南行嗰度咁，970同971嘅排隊指示放埋咗一齊，但係970X就放咗站牌嘅另一邊。實際上970同970X除咗最後幾個站之外根本就一樣，十居其九都唔會理個字母，而行下路嘅971根本就係做緊完全另一班客。結果就係一有970／970X就兩邊同時上車，有971嘅話就得少數乘客喺970／971條隊插出來上車。

另外，欣榮花園嗰邊，完全毫無關係嘅12A／61X又一齊排，睇返巴典呢張圖：


5C其實都去到黃大仙，3B都去到新蒲崗，應該同21 106放埋一齊，再加埋11K，因為去黃大仙／新蒲崗嘅客實際係五條線都會上，咁咪可以空個位俾12A做獨立一條隊，唔使同完全唔相關嘅屯門路線一齊排。

全港重有無數個車站啲排隊位係亂來，出現唔少插隊嘅情況，包括由隊尾跳出來上車（因為前面嘅人想搭唔同路線），或者兩條隊互相一齊上車（因為相似路線分咗兩條隊牌）。

另外，有時甚至出現一個情況，即使條隊上面只得一條路線（例如960）都好，有對應路線埋站隊頭啲人都唔上車，結果我排隊尾就要跳出來上車，完全解釋唔到點解會咁。究竟呢啲排隊線／欄係唔係真係有效可以維持上車秩序？！我去外地（包括外國同大陸）甚少見到有呢種排隊欄，除咗喺巴士總站之外，全部都係堆喺站頭，有車到就上車：想搭嗰部車就行埋去，唔係搭嗰部車嘅人就自動識行開俾人上車。

另外，無咗排隊欄亦都有另一個好處，只要個站夠大夠長，埋到站就可以上客，唔使理路線善用車站空間：因為啲人唔使排隊，全部企哂喺個站嘅範圍之內，只要打開上車門，乘客就自己識去上車；除咗喺遇到殘疾人士唔方便走埋去嘅情況之外，基本上上完客，望一望條柱嗰度已經無哂人，咁可以直接開車走，唔使逐部車排隊上客。喺極端情況下，幾部相同路線巴士埋站但個站又好多人，咁無排隊嘅情況可以幾部一齊上客，減少停站時間。

喺咁嘅情況下，排隊欄呢樣嘢，搞到除咗乘客要排隊之於，連巴士都要排隊入站，喺講求效率嘅香港重有咩存在價值？

排隊欄嘅存在意義，係分流同埋排上車嘅先後次序

如果你嘅講法成立，咁紅隧東行唔駛排隊欄啦

有架104黎咪成條隊50個擁埋去迫上車咪得囉

Ming@5119 發表於 2019-2-16 10:30
排隊欄嘅存在意義，係分流同埋排上車嘅先後次序

如果你嘅講法成立，咁紅隧東行唔駛排隊欄啦

紅隧嗰度最低限度起碼104同301應該排返同一條隊先啦，而家咁嘢樣，無論係104定係301到站，104同301條隊兩者就互相爭上車。

冇左排隊攔/指引  港人每日爭執必大增  雖則宜家有都有好多人排錯或排得唔啱   最常見排得唔啱就係啲atm喇  或者啲人排隊疏到中間攝多一兩個人都得 但排隊買演唱會拎報紙嗰啲又好親密。。。。

有時都要睇本身個站唔同線既人流~ 前者970/X一樣多人排而971就少好多, 如果970/X放一邊條數會好長影響到其他線/行人而放1條陪971排可以分流少少~
而後者如果5線放一齊如果一齊到時就會頂死條路, 始終一條隊好多車長真係會慢慢排去上客~ 而分散佢地其實前方21/106拉前少少上落咁3B/5C都可以同時間上落, 大家可以快黎快去~ 而12A無同路線其實放邊無咩特別關係~

而家好多地方無晒排隊欄，攪到啲人亂咁排。新移民中國人十個都無一個跟足嚟排

wally 發表於 2019-2-16 11:04
有時都要睇本身個站唔同線既人流~ 前者970/X一樣多人排而971就少好多, 如果970/X放一邊條數會好長影響到其 ...

但係實際情況係絕大多數乘客都係當970／970X係一樣（返港大、醫院同職訓局），結果啲客見車，一係就互相插上車，一係就其中一條隊成條消失，完全失去咗排隊嘅意義。

西隧口嗰邊就好啲，兩條隊向同一個方向排，結果有時去到隊尾就變成一條隊，一見車到就成條隊自己識走位。

Quanta 發表於 2019-2-16 11:05
而家好多地方無晒排隊欄，攪到啲人亂咁排。新移民中國人十個都無一個跟足嚟排 ...

因為啲排隊欄亂咁放，都唔知應該點排好（想搭嘅路線組合一條向東，一條向西），結果啲人咪亂排，甚至唔排。

排隊欄set得唔好=>懷疑排隊欄既存在價值
真係goodest logic

近排去過幾次澳門，搭102X係黑沙環轉車，d站係無排隊欄ga，d人係一有車就堆上去，但係結果呢？就係反應慢少少都會比人打尖上左，自己就因為客滿頂閘上唔到車，焗等下架 (好彩通常起碼都叫2飛)

近番少少係香港，係日間元州街既車站 (尤其係發祥街)，只要有6/6C/6D埋站，d人就會堆上車，全無秩序可言。

學上面版友所講，排隊欄既作用就係維持秩序。係大型轉車站，例如屯轉、紅隧，甚至沙市等，排隊欄/排隊標示係呢方面既存在價值就更大

我都好同意有d隊係有改善空間。我都想35A同238X分開兩條隊，唔駛下下你眼望我眼咁睇下有無人上車，免得有打尖既嫌疑。但係唔應該為此直接質疑排隊欄既存在價值，而係應該想辦法去解決當下存在既問題

Haydn 發表於 2019-2-16 11:26
排隊欄set得唔好=>懷疑排隊欄既存在價值
真係goodest logic

就以沙市做例子，嗰度整哂排隊欄，48X又咁鬼密，結果當第一部48X上緊客時（一部48X由空車上滿嘅所需時間比班距更長），下班48X已經到站，但因為欄住哂條隊，搞到後面部48X要等前面部48X開走先可以上客；而成條隊嘅乘客就死迫到部前面部48X絕對頂閘，前面部48X先有得走；後面部48X隨時未企滿就上咗城隧。
如果無咗啲欄杆，淨係劃線嘅話，咁後面部48X一埋站就可以即刻打開門上客，兩部同時上客，打散客量，咁已經可以幫助清客。