171討論（個人經歷、宣傳、客量、定線、班次等）

我呢幾年來經常要出入南區，喺南港島線通車之前已經係咁。但係當年唔知點解，定係我先入為主，基本上係唔會喺旺角搭任何紅隧線嘅，包括線王級嘅171（當年繁忙時間係5分鐘一班），基本上都係搭荃灣線去金鐘轉6／6A／6X／66等線。最初當時我重係學生嗰陣當然會搭特惠價港鐵過海，夾啱時間嘅話，由旺角出發搭荃灣線轉6A去赤柱大約係50分鐘嘅事。6同6A繁忙時間快起上來可以30分鐘內由金鐘片到赤柱，到我畢業之後都重係咁搭，但係過咗上午繁忙時間之後，皇后大道東經常塞車，金鐘上車30分鐘可能只係足夠去到淺水灣。到下午繁忙時間回程，搭6／6A／6X／66返出金鐘條路可以話係相當漫長，行山路固然速度慢，行隧道都唔好得去邊，重要慢慢碌條皇后大道東出金鐘。至於260呢，就堅拿道天橋拉手掣。
去到近年，南港島線通車，因為皇后大道東經常塞車，我順理成章，去到金鐘就落多幾層搭落海洋公園轉車去赤柱。回程就更吸引，搭港鐵由海洋公園同金鐘入閘，去旺角出閘係一樣價，而73有個短途分段，赤柱去海洋公園$4.9，淺水灣去海洋公園更低至$2.9，抵搭程度冠絕全港，而且上咗地鐵，嗰啲乜嘢皇后大道、堅拿道、香隧、紅隧塞車已經WFC。結果我有一段長時間都係咁樣多重轉車來往南區。

我喺2014年底開始喺電腦記錄我搭嘅每一程車（其實早多幾年我已經有喺簿仔記錄，不過之後無處理過，而家電腦記錄係2014年底開始嘅），最初用一個spreadsheet，到舊年發展到整咗個 SQL database 再加埋一張 web form 俾我喺車上實時記錄直入 database 。我睇返資料庫，而家有69條171系列嘅記錄，按上車時間順序排列，只有一條係2015年嘅，之後到2019年先有再搭171啦。而且2015年嗰條記錄係搭九龍流水，無過到海嘅。而2019年第一次搭係喺紅隧口上車，2019年2月先開始有來往旺角嘅車程。第一次我搭171來往旺角係平日21:01由香隧口上車去山東街落車，用咗20分鐘。當時我喺黃竹坑上面嘅南島中學練完水落山搭車，唔知點解唔係太想搭港鐵，又見紅隧唔塞咁就上咗171啦，到頭來結果即使要停銅鑼灣同經紅隧，原來時間上唔輸蝕過港鐵。之後同一個星期日，我就轉用171轉車去淺水灣，結果快到無法想像！14分鐘就由旺角片到香隧口，係正宗特快線咁快，遠遠快過保鐵入南區！

最初我都係只係喺入夜後同星期日朝早呢啲紅隧塞車機會唔大嘅時間搭171，但係之後Citibank信用卡搭城巴新巴有15%信用卡積分回贈，港鐵變咗黨鐵，之後太子831，封站更變成常態，重重因素令我搭171嘅次數越來越多，亦都唔限於晚間同假日，甚至開始係繁忙時間搭呢條線。尤其係舊年10月5日，嗰日係星期六，我要去赤柱參加比賽，但係黨鐵早一晚被嚴重破壞導致全線封閉，我就搭171去海洋公園轉6A去赤柱，而嗰班171最後係頂閘飛咗油麻地幾個站去到紅隧口先再停。嗰陣雖然係繁忙時間，但紅隧亦都無塞，17分鐘就由旺角片到香隧。

但係自從搭多咗171之後，我終於向現實低頭，原來條線唔係想像中咁美好，由旺角搭去海洋公園，星期六中午搭往往要22分鐘左右，睇ETA去搭都無用，個ETA唔準，由睇嗰刻到見車有時會加成5分鐘，繁忙時間回程香隧口去旺角更加有時甚至要成半個鐘。再加上171站位差，我住旺角道，喺正彌敦道隔最遠嗰兩個站正中間，我5分鐘已經可以落到黨鐵月台，但係去隧巴站要7分鐘，回程落73之後，黨鐵站就喺隔籬，轉171更加要過天橋，再加埋本身171北行明顯慢過南行，呢度更加可以話係毫無優勢可言。我最近試過早上繁忙時間搭同一班08:40開嘅73，去香隧口轉黨鐵或者171過海，搭黨鐵嘅話，09:15已經到咗旺角。搭171？重係堅拿道西。咁呢度可以話等171等得太耐。好，我搭早一班73，08:20開，去到香隧口好快會有171A同171P同時到站，我搭過兩次，一次09:04太子落車，一次09:06落車，唔使等車早上繁忙時間由香隧去旺角都同樣慢過搭黨鐵大約5分鐘。

而至於客量方面嘅總結，以我搭過嘅時段計：
南行：
一至五清晨（06:05-06:30之間旺角上車，城巴尾車到九巴頭車）：大約15分鐘一班，至少坐滿窗口位，有時多客嘅話紅隧口會上到企人（視乎有無其它南區線清客）
六中午（13:25-13:45左右旺角上車，城巴時段）：大約11-13分鐘一班，大約坐滿窗口位再多少少。
假日早上（07:30-08:00左右旺角上車，城巴時段）：13分鐘一班，吉車遊街，小巴客量過海。

北行：
一至五上繁（08:35-09:00香隧上車，啱啱入城巴時段）：最疏15分鐘一班，密起上來連九巴時段尾車5分鐘內有3班車，好嘅話窗口位差唔多滿，出車海嗰陣小巴客量唔夠過海，堅拿道係白停。
一至五晚間（21:00左右香隧上車，城巴時段）：大約13分鐘一班，入香隧窗口位唔滿，堅拿道上幾廿人過海
六下繁（16:50-17:50左右香隧上車，九巴轉城巴）：大約8-11分鐘一班，坐到窗口位左右，堅拿道執到十幾件
日中午（11:50-12:30左右香隧上車，九巴時段）：大約10-12分鐘一班，坐滿座位，堅拿道唔多客

呢度我帶出幾個討論重點。

第一，171本身係特快線，尤其係南行唔使15分鐘就由旺角片到入海洋公園，同新巴嘅東區走廊特快一樣理應係對抗港鐵嘅最佳武器。點解新巴嘅東廊特快2X、8P等同單一地鐵完全重疊都可以做得咁風生水起？呢條171就喺地鐵通車之後不斷減班跌客。只要條隧道唔塞嘅話，171的確係明顯快過黨鐵。

第二，171係唔係宣傳不足？東廊特快條條用「特快」兩字大肆宣傳，但係171南行連銅鑼灣都唔停，已經明顯係特快線，不過從來都唔見真係有特快兩隻字出現過，亦都唔見城巴係豬紙，紅隧同香隧之間寫「9分鐘直達」等嘅字樣。

第三，171班次係唔係恰當？企滿人嘅時段開13-15分鐘，吉車時段又係開13-15分鐘。上繁北行最離譜，開到平均5分鐘一班（08:25海怡特快、08:29利東九巴尾車、08:30海怡特快城巴頭車、08:40利東、08:36海怡），班城巴尾車同九巴頭車總係拖住行（有時班九巴重會爬頭），堆車海走咗之後就差唔多15分鐘先一班（08:51海怡）。我今朝喺旺角搭171南行，九巴頭車，ETA最初報06:22，最後加下加下加到06:24先到，而前車喺城巴尾車喺06:08已經過咗旺角。結果我搭嗰班九巴要企人過海，去到香隧兩班車隔成18分鐘（唔知點解城巴總係好似特別快咁，有時13分鐘就已經由旺角片到海洋公園，重要兜埋銅鑼灣添，平時搭開感覺城巴都係快過九巴嘅，15分鐘內由旺角片到海洋公園唔係幾多部九巴做到）。

第四：171定線有無任何改善空間可以增加客量？定係而家咁行已經最理想？而家嘅行法由旺角去海洋公園係特快，由深水埗甚至長沙灣上車去海洋公園同黃竹坑都唔慢。但係兜一兜利東就註定海怡無客。而171同鐵路重疊，如果改去華貴，換107入鴨脷洲再同671重組會唔會更理想？香港仔無鐵可以俾條過海線去有鐵嘅地方，鴨脷洲有鐵就換返條過海線去無鐵嘅土瓜灣同九龍灣。

171而家有唔少減班空間,晨早應該進一步cut到全日12-20,甚至將171A/P取消合併返正線
改動空間就唔大喇,同107調站走去做香港仔同華富/貴只會被970/X打殘
同埋武肺之前落堅拿道西仲快,又冇話白停嘅

其實住得南區嘅都無邊個唔知「171=快」呢條公式，但自從開咗970，變埋970X，再加埋黨鐵通車，基本上171嘅生存空間係一次比一次細
但巴士公司可唔可以加但「特快」畀佢？我睇又未必得
東廊線、30X之類有特快，係因為佢真係行緊公路，171明顯唔係，而且南行好多時受鵝頸橋堅拿道落橋位影響，好多時都未必有特快效果
另外，班次果度，以前的確好密車，雖然未到118嘅車海，但都已經差唔多唔洗點等咁濟（密過官方班次）。但係有咗黨鐵之後，北行真係少咗人搭，始終返工嘅人真係好睇時間，可以瞓多五分鐘就瞓盡佢，呢個情況下減班係必然嘅事嚟。至於放工時間，171確實有足夠客量支持
BTW，而家嘅班次基本都係6-12左右，其實都唔算真係好疏

取消171A/P分拆安排
另外返九龍而家都係靠銅鑼灣客
應該非繁15,繁時10

你唔諗下頭班車都會有兩蚊雞上上落落 梗係會拖慢行車時間啦

上面幾位都提議取消171A/P，但其實上繁係靠P仔食糊 (我住海怡 無留意A仔)
未有武肺之前，上繁0730-0815時段 P仔可以坐滿甚至企人過海
利東一向都令海怡客卻步，如果無左P仔 我諗海怡客落晒地底啦

一句講晒，都係塞車+班次呢d不穩定因素
假日我經常中午時段過海，北行就算兜利東堅拿道 快既可以30分鐘內到旺角
但近來呢個時段九巴都cut到20分一班，見到都唔開胃

夜晚北行仲過份，我係另一個post講過 九巴30分一班，見到即上970啦
未有瑪麗 bbi 我已經見過有人970X轉595，而家有更方便
試過幾次970X轉595/90B 都快過架171到海怡

S3BL448-CTB2289 發表於 2020-4-8 18:23
上面幾位都提議取消171A/P，但其實上繁係靠P仔食糊 (我住海怡 無留意A仔)
未有武肺之前，上繁0730-0815時段 ...

970X咁慢都快過171返到海怡？旺角上車，970X快極都要11分鐘先到高鐵站，去到瑪麗已經差唔多半個鐘。

171係得到九巴城巴眷顧既線

呢個世界有X970 我諗樓主唔好FF 啦

miklcct 發表於 2020-4-8 18:34
970X咁慢都快過171返到海怡？旺角上車，970X快極都要11分鐘先到高鐵站，去到瑪麗已經差唔多半個鐘。
...

當然要天時地利人和既
通常我見 eta 10分鐘以上先有171，我先會上970/X
瑪麗夾到5分鐘內有90B，避開置富/利東 就一定快過171

你話快好多又唔係，通常同171一齊上鴨橋或者啱啱上左利東咁