904、905研究

904同905係我近年搭得最多嘅兩條過海路線，由我入HKU開始一直搭到而家，睇住地鐵通之後904由可以頂閘變吉車遊街，905由線王級淪落到非繁20分鐘一班，覺得好可惜。呢兩條線係特快線，由旺角來往西環遠遠快過地鐵喺中環轉車，快嘅話喺旺角上車，10分鐘已經去到過海後頭站，15分鐘已經由旺角去到堅尼地城，而且又唔似得紅小咁得有限嘅地方上車，遠遠比紅小方便，車費又最平，我真係好想呢兩條線可以重現昔日光輝。
首先分析904。904喺西環嘅覆蓋範圍喺嘉安街以西，同18X以及西行嘅18P一樣。呢三條都係特快線，西行客量最好嗰條叫18P，由北角開，經炮台山，灣仔北同中環，以半直通模式運作，當中灣仔北離地鐵有一段距離。呢條線日間非繁12分鐘一班，對比未有地鐵到西環嘅10分鐘一班唔算差，但其實有唔少係由東區貢獻嘅，東行喺西環更加係吉車遊街。而18X更可以話係由頂閘變載空，尤其以東行為甚，而家只係靠西行改行咗中環灣仔繞道之後，中環落車嘅客，同埋中環上車嘅18P兩飛客頂住條線。可以話地鐵對呢三條巴士線嘅打擊唔細。

但係地鐵喺西環，以我嘅分析，其實根本優勢唔大，尤其對904而言。首先地鐵站位唔理想，堅尼地城站好啲，近街市；香港大學站更加係主要為香港大學而設，山腳只係配菜，入口離月台勁遠（尤其係嗰個不可C2出口）。如果我喺西祥街／堅尼地城游泳池／荷蘭街／卑路乍灣公園附近想過海，我基本上已經無視咗條地鐵。反而係喺士美菲路街市出發嘅話就會納入考慮。

第二，地鐵過海要喺中環轉車，其實一啲都唔快。喺904沿線，唔計總站，非繁去到太子計，如果幾分鐘內有車嘅話，只有喺聯邦新樓上車先未必快過地鐵，由爹核士街開始已經係904佔絕對優勢。不過可惜嘅係，904北行要兜大角咀，去深水埗嘅話隨時喺中匯街落車行過去會快過部巴士，咁樣兜一兜，兜走哂深水埗以北嘅話去碌地鐵。至於南行904優勢非常明顯，旺角上車15分鐘已經可以到堅尼地城，深水埗太子亦都有一定捧場客，所以南行條線吉車情況唔嚴重，如果出單層嘅話非繁可以企人。

904重有另一個競爭對手：紅VAN。呢條紅VAN唔係一般紅VAN，佢嘅管理十足十成條綠VAN咁，有固定班次唔會無止境等客，又收八達通，固定價錢，俾乘客信心保證。不過呢條紅VAN嘅缺點係上客位有限。南行只可以喺弼街總站上，非繁加多個奧海城分段，北行亦只可以喺北街總站上。亦即係話佢大部分客源只限單向。先講北行。紅VAN嘅優點係開車直上干諾道西天橋，明顯比904快過海。但係過咗海之後佢唔係行彌敦道直去旺角，而係經油麻地廣華醫院，喺旺角東兜一大輪去弼街，總站去總站其實速度唔快得過904。亦因此呢條紅VAN好受去油麻地同旺角東嘅客歡迎，甚至可以用來轉火車返新界東，呢點係904做唔到嘅。反之去旺角西北，例如豪華戲院、太子站附近，就真係搭返904好過。

至於南行方面，弼街開車之後就直出亞皆老街去奧海城，開分段執客再過海。但係條線過海之後係向東行，經東邊街、高樂花園再入皇后大道西（即係跟A10去西環）。呢點已經明顯兜過904，但係可以換到去水街、石塘咀街市附近嘅客。而由於南行上車位只有弼街同奧海城，所以對904影響有限，起碼904可以做到最旺嘅西洋菜街，而旺角街市打後亦都未必有位上到分段紅VAN，要靠904過海。

亦即係話，而家904有明顯優勢嘅位，北行介乎爹核士街至太子之間，南行就由深水埗甚至長沙灣一直去到底。

然後到905。905同904喺九龍行法幾乎一樣（只係南行差一個站），而港島就服務唔同嘅地方，905就嘉安街以東，904就嘉安街以西，而嘉安街附近嘅客實質上就一齊等。

我又用地鐵比較。由港島出發，地鐵向東，905向西，換句話說越往西嘅地方，905就越有利。而地鐵西營盤站嘅位置亦都唔理想，主要係服務西營盤街市一帶，遠離電車路。所以話呢條地鐵主要方便中上環乘客搭去西環買餸為主，因為中上環無乜地方買到餸。而以去到旺角計，威利麻街以西基本上係搭905快，但係喺上環電車總站以東已經一定係地鐵快。而905重有個大角咀，但係大角咀亦都有東涌線直駁中環，車程只係5分鐘，再加行返落電車路嘅時間。所以由上環以東上車過海，905無可能快得過地鐵。至於南行雖然兜少個大角咀，但其實咁樣兜西營盤法，去港澳碼頭以東亦都唔會比地鐵快，所以905唯一有優勢嘅位就係港澳碼頭以西。

而中環以東嗰段，去灣仔方向行新政總同灣仔北，其實某程度上係做返以往18嘅角色，呢度有幾多客我就唔清楚，但只限單向。至於西行，喺灣仔嗰段基本上係無作用，去邊都好都遠遠慢過地鐵金鐘直接過海，去大角咀都好搭地鐵喺中環轉東涌線都遠遠快過905碌西環（重有條914，不過佢亦都要兜渡船角，到大角咀嘅時間同905相差無幾）。

905係少數九巴服務質素好過新巴嘅聯營路線，喺下午繁忙時間，905九巴會出車海，而且重有3班中途載，反而新巴就疏到8-9分鐘一班而且經常收車搞到頂閘。

而905近年亦都開咗兩條支線，905P同905A。905P係上繁過港島，喺九龍行深水埗西，大角咀同旺角西，但條線反智到兜入柏景灣總站，然後折返櫻桃街過海，而唔直接喺油麻地交匯處入隧道，到頭來由荔枝角起計，過海嘅時間同正線一樣慢。905A就下繁過九龍，主打特快去長沙灣，重要一開就5班車，非常進取。905A比905的確快好多到長沙灣，但同地鐵相比，同樣只有西營盤上車有優勢，而同時段嘅905，西營盤上車去旺角亦都未必快過地鐵。而我觀察所得，905A載客率同905相比非常差，入隧道嗰陣905可以企滿人甚至頂閘，同時之905A只係坐到窗口位。

分析完之後，咁可以研究點樣改善呢兩條線。首先睇港島段，904同905嘅分工而家已經係最理想，任何令到905（包括905A同905P）唔經西環嘅建議等同將條線送死，因為成個905服務到嘅九龍都有地鐵直達中環（一條叫荃灣線，一條叫東涌線），而灣仔過海亦都有更直接嘅紅隧線104（雖然條線只到旺角，唔到深水埗以北）。而任何令到904服務水街以東嘅建議亦都係等同將條線送死，因為唔會再有水街以西嘅乘客搭。至於大角咀去灣仔，呢度其實應該改善914，甚至可以借條W1過橋重組，905專心服務西環好過，成條線應該最基本縮落香港站。

904喺西環優勢相當大，但可惜基本盤不足，單靠西環來往大角咀旺角係養唔起條線。同時間西環亦都有條線叫971，主打旺角以南，但如果兩者合併之後一條線掃哂佐敦至荔枝角又係等同叫條線送死，因為到時連旺角嘅話都嫌慢，唔會搭，油麻地同佐敦亦難以同地鐵同北行紅VAN競爭。

如果開拓港島新客源，亦即係延長條904。呢度有兩個選擇，可以考慮經域多利道落數碼港，會快過垃圾970去旺角同深水埗，不過咁做只限兩繁有客，或者經士美菲路去薄扶林至香港仔，但係非繁吸客能力亦有限，因為快唔過970去旺角同深水埗，只係可以新增到長沙灣以北嘅客。

而如果將904再提速，來回西祥街上干諾道西天橋，同時將905南行改A12咁出，咁雖然全部乘客仍然係喺合理步行範圍之內，不過904無咗石塘咀嘅客（被逼搭905），單靠堅尼地城新增嘅客我亦唔睇好可以幫到幾多。

如果唔喺港島搵客，而改為睇九龍嗰邊。而家北行嘅904係因為兜大角咀兜走哂啲客，如果放棄大角咀叫佢哋全部轉905，學X970咁出旺角可能會係一個出路，咁樣深水埗長沙灣可能會有客回流。因為堅尼地城去大角咀嘅乘客唔似會流失去巴士以外嘅方法（因為即使係西隧口轉車都遠遠較香港站轉東涌線理想），所以對整體客量一定有幫助。但係呢度又可以研究好唔好飛埋旺角直出深水埗啦。飛埋旺角嘅話，咁旺角嘅客應該無哂全部紅VAN見，但係深水埗以後嘅乘客應該唔會再考慮904以外任何其它選擇，一定904一車到底，配合埋同905免費互轉嘅BBI甚至可以吸引埋西營盤上車嘅乘客喺西隧口轉條線去深水埗。如果重驚唔夠客甚至可以延長條904入新界上麗瑤，嗰度唔近地鐵站亦都無過海巴，直接搭到西環仍然係理想選擇。

呢度大家又有咩意見？大家對呢兩條線有咩睇法？

904近年兩巴都已經開始陰乾，兩條線嘅客量明顯跌好多

延長904到麗瑤?麗瑤那帶住幾多人?多得幾多客?

904開得好似唔夠密，同埋同971，905好多時都夾唔到班次，搞到山道走車904同905互相追唔到(追到905都可能留後)。惡性循環之下緊係陰亁
同埋西隧口轉車過石塘咀堅城如果唔密車又係好難等(不過971都係難等)，904偏疏最後好多客都係會搭鐵

904拉長冇所謂，問題係唔好再拉疏，如果唔係大西北/長深荔來回西區都係慢。905班次ok,但夜晚可以考慮開特車解決山道留後問題

Anonymous 發表於 2020-4-11 22:12
904開得好似唔夠密，同埋同971，905好多時都夾唔到班次，搞到山道走車904同905互相追唔到(追到905都可能留 ...

905/971有$9.8分段, 904冇分段仲係$10.4; 904/905均益大廈個站仲要對面方向! 本身904/905就係一條105拆出黎

905P 根本唔應該兜入柏景灣，大角咀道直出
905A 唔應該兜入大角咀，直插麗閣仲著數
另一方面改灣仔北學以前 18 咁直出匯豐縮短行車時間

904/905 北行如果學X970 就倒哂轉東涌線既客同埋大角咀客，最近都係停新九龍後面



904 當年想改西九龍走廊已經知唔想做，一係就改行荔枝角道，做返四小龍同麗翠苑既客

至於 905 灣仔東行做緊以前 18 既野
西行修頓都有客仔慢碌過海
來縮短都難，每度都執到客仔難攪

開返917咪唔駛由905做中區西隧過海

shakugan2005 發表於 2020-4-11 22:27
905/971有$9.8分段, 904冇分段仲係$10.4; 904/905均益大廈個站仲要對面方向! 本身904/905就係一條105拆出 ...

價錢好多時都唔會係首要考慮因素。搭巴士通常會考慮1.)舒適度，即係幾大機會唔駛企
2.)速度，即會唔會慢過地鐵，同班次
所以佢幾多錢我唔會太care

喺石塘咀，904走左可以搭905，有時仲唔駛等，因為905停燈多。反而905走左好多時都追唔到(應該係話冇得等)904/971呢個係問題。

如果走左一班，過到西隧可能要等10分鐘先有一架大西北線走，咁就會嘥好多時間，當然咁啱唔駛等車咁轉係極速，50分鐘屯門/元朗(係屋企樓下，唔係嗰區嘅尾站)去到石塘咀堅城。就算你目標係九龍西，走一架904/留後上唔到905就好大機會慢過地鐵。所以904稍為加密可以分流905，大家都可以快啲去到目的地

Anonymous 發表於 2020-4-11 23:06
價錢好多時都唔會係首要考慮因素。搭巴士通常會考慮1.)舒適度，即係幾大機會唔駛企
2.)速度，即會唔會慢過 ...

但有左鐵路後少左客係事實, 收費平吸唔到客, 而巴士公司又寧願趕客都唔想用班次/舒適度去留住班客, 未話到要取消既, 但可見904只會愈做愈差

904 就算未開地鐵非繁都係蝕錢
根本只做堅城同石塘咀客源唔夠
18P 同5X一樣道理  就算未有鐵非繁條數都係好差
本身塊餅已經唔大  你服務再好都好難做得起
再俾鐵分薄啲  蝕上加蝕
有資源既點解我唔放喺其他區要辛苦維持住條唔知做唔做得起既904?