九巴計劃開辦天水圍至屯門區內線

ccchhhuuunnn 發表於 2020-9-30 17:29
講10架巴士係講緊對比輕鐵3/6門同時快速上落客呢個效果
你有10架巴士都未必做到近似效果
就算你話新區巴士 ...

都無計燈位上輕鐵本身享有唔少先天優勢

都係果句，上年11/12月嘅時候
真係住咗廿年天水圍先第一次感受到
原來撘巴士係可以咁快

ccchhhuuunnn 發表於 2020-10-1 10:13
一個屯門差唔多成個九龍半島咁大，屯門去元朗其實只係短過去荃灣少少。成日用區與區嚟比較，其實睇少咗屯 ...

屯門市中心出荃灣，快過入元朗康樂路

出荃灣搭 58M 25 分鐘到眾安街
入元朗搭 68A 剩係去到元朗廣場 30 分鐘，西鐵屯門站去朗屏 11 分鐘但未計要行同駁腳

其實，元朗去荃灣搭 68M 都快過入屯門

天空之神 發表於 2020-10-2 10:18
屯門市中心出荃灣，快過入元朗康樂路

出荃灣搭 58M 25 分鐘到眾安街

呢個就巴士行公路或繞路優勢
亦都印證咗盲目崇尚巴士，認為輕鐵廢

實情快嘅係條快速公路，唔係巴士
如果巴士行元朗公路，甚至輕鐵可以中間唔使停站，自然可以快返

ccchhhuuunnn 發表於 2020-9-30 17:29
講10架巴士係講緊對比輕鐵3/6門同時快速上落客呢個效果
你有10架巴士都未必做到近似效果
就算你話新區巴士 ...

無錯，我諗你開始知道個重點。
TLDR：每個point最尾嗰段

1. 之前都講過，輕鐵上落客速度快唔快，根本唔重要，因為屯天/屯元客唔多，而且全日嚟講比較平均，唔同返工線咁，所以唔需要咁多道門去快速上落客。輕鐵喺上落速度上嘅優勢，只會同客源多/集中嘅巴士比較先可以顯現出來。

具體啲嚟講，而家個站得十個人上，就算巴士得一道門，上落速度都唔會慢；反之輕鐵話之你有100道門都好，開門，「請勿靠近車門」，嘟嘟嘟，都用咗啲時間啦。

再具體啲嚟講，假設巴士上第一個客係1秒，每多一個客就要多0.5秒，輕鐵就係10同0.0001。
客觀上，輕鐵上多一個客快過巴士，巴士上第一個客快過輕鐵。

第1個客  1                    10
第2個客  1.5                10.0001
第3個客  2                    10.0002
.
第19個客 10                 10.0018
第20個客 10.5              10.0019
.
第n個客   1+(n-1)0.5   10+(n-1)0.0001

以上只係好粗略咁計，當然可以再嚴謹D，但係我都唔想變數學/經濟po
總之可以見到，愈多客嘅話輕鐵優勢愈大，但係以呢D區內線(用途同客量分佈，你當好似上面十幾個客嘅情況)嚟講，上落客速度快慢唔係咁緊要。咁幾時上落客速度係重要呢? 就係好似277X 268X 118咁同一個站有好多人上，或者客量分佈好集中

所以對屯天/屯元呢D全日客量分散嘅車嚟講，輕鐵呢方面嘅優勢唔會便利到區內客 (同樣，我係講緊實際上，即係啲師奶買餸等日常生活，唔係十八區)

2. 無錯啦，我諗你都同意巴士青公係慢，雖然輕鐵唔使停燈，但係唔好忘記輕鐵站站停，唔同巴士；所以可以抵消
同埋我好懷疑輕鐵幾時可以行到70km/h? 如果話深夜嘅，咁我都無話可說。但係喺日間，我就無試過啦。呢個po有人已經講咗，屯碼去天水圍全輕鐵要45分鐘 (仲要轉車)，我自己都睇唔到輕鐵快喺邊到。當然，兆康係屯門一不可分割嘅一部分，如果話天水圍去「屯門」20分鐘，咁我都唔可以話係假嘅。

但係上面唔係重點。輕鐵同電車無可比性，但係同行青公嘅巴士比，就絕對比到。而家個實際情況係，巴士連青公都唔行，一上直上元公，當架巴士到咗屯市，架輕鐵分分鐘仲未行完青公。

具體啲嚟講，我呢幾個po其實係想表達一樣野：
輕鐵 ~ 行青公兼站站停嘅巴士
行青公兼站站停嘅巴士 ＞＞＞＞＞ 行元公嘅巴士 (以速度方面嚟講)
－＞ 輕鐵 ＞＞＞＞＞＞ 行元公嘅巴士

3. 巴士站嘅設計有彈性得多，而輕鐵站嘅設計好難改動

以大棠道站做例子，雖然而家巴士主要係行大馬路，但係元朗起碼仲有好多路未用。大馬路塞極有個譜，更何況屯元線不太可能行東行去屯門，所以條線同其他巴士相比，係行緊逆向。反之輕鐵，要加長好大陣仗，一有意外，分分鐘成條大馬路都癱瘓。

我再舉多另一個例子：天水圍等巴士夠舒服啦掛? 加個巴士站容易，定係加長輕鐵月台容易?

所以無論幾多人都好，加條巴士路線，總容易 (同少意外) 過加長輕鐵月台。


所以咁多人要求開大西北區內線，絕對係有原因，唔係無野做撩是鬥非。

ccchhhuuunnn 發表於 2020-10-2 10:34
呢個就巴士行公路或繞路優勢
亦都印證咗盲目崇尚巴士，認為輕鐵廢

我好想知道香港有邊啲人係 「盲目崇尚巴士，認為輕鐵廢」？

咁輕鐵嘅性質，就係站站停，同埋站與站之間好近 (咁仲有好多元素)；呢兩樣，無其中一樣就唔係輕鐵啦(世界上有樣野叫西鐵/巴士)

香港人生活係非常忙碌，我諗無人有精力寧願扔走舊金，執起舊屎。所以如果輕鐵真係發揮到佢嘅功用，無人會屎忽痕爭取區內巴士線。
如果巴士廢，就自然會被淘汰，如果輕鐵係正，就唔會引起咁多聲音同爭議

AV296 發表於 2020-10-2 21:13
我好想知道香港有邊啲人係 「盲目崇尚巴士，認為輕鐵廢」？

咁輕鐵嘅性質，就係站站停，同埋站與站之間 ...

新界西屯元天，輕鐵一個網絡貫通曬
成日畀人有個錯覺，屯元天呢幾區明明係近親，隔離區咁近，輕鐵都要搭咁耐車
屯門碼頭（甚至屯門市）去元朗市仲耐過（唔塞車）行屯門公路出荃灣
去荃灣，大家會覺得係好遙遠嘅事
但當話比大家聽，去元朗嘅距離，其實只係短過去荃灣少少嘅時候
大家就會覺得好驚訝
可謂成也輕鐵 （貫通三區以為好近）敗也輕鐵（其實搭好鬼耐）受輕鐵專區及後輕鐵專區影響，跟本無乜相若巴士路線比人體驗。
就算相近路線唔行輕鐵，而去行巴士，亦都會差唔多速度，淨係覺得輕鐵慢。

重點之前已講，輕鐵站站停，巴士一樣亦有機會站站停，快嘅係行公路唔停站，唔係因為佢係輕鐵定巴士。
當然，現實上要輕鐵唔停站近乎冇可能，巴士路線較有彈性，可以定線行元朗公路。
上面有提及，巴士快唔快取決於有冇公路、繞路或者道路網絡本身設計。

具體例子
- 青公藍地至元朗，現實仍然係輕鐵稍為快過巴士，當然輕鐵本身就贏在起跑線（例如：燈位優先權）。就算撇除燈位優勢，兩者速度相若。
- 上面有板友都提及屯門市去元朗搭68A都要30分鐘，仲耐過經屯公出荃灣一般要20分鐘。其實當近乎半個近郊鐵路嘅西鐵屯門去元朗都要15分鐘，輕鐵站站停一樣係30分鐘左右唔算唔正常。之前輕鐵未出事前會再快少少。相近例子，元朗68M出荃灣又快過輕鐵或巴士68A去屯門市。
- 屯門市至兆康/虎地，如果係行屯公，巴士無燈位站位亦較少，自然快過相若嘅輕鐵
- 青公藍地至元朗，沿路都有啲燈位，輕鐵自然會快過巴士
- 返返去屯門市至兆康嘅例子，如果唔係屯公，係計青公，614鳳地去何福堂快到，67M/X連輕鐵尾燈都睇唔到，可能仲等緊鄉事會路，甚至景峰個燈位
- 再返去屯公嘅屯門市至兆康，如果巴士要停青麟路嗰邊，亦都會同輕鐵差唔多
- 如果話鳳地至何福堂青公行巴士慢係因為輕鐵阻住曬燈位，其他唔少冇輕鐵交滙嘅巴士路段一樣可以好慢（例如屯門鄉事會路（新墟-市中心-安定-兆麟-三聖），青山公路（屯興路-置樂-三聖-黃金海岸））
- 拎返巴士贏輕鐵最多嘅例子 58M/X 良田建生來往屯門市，除咗屯公三站係公路同繞道級數，停站少。本身輕鐵定線就不利，唔講停站，良田建生出市中心無論經山景定兆康都一樣兜咗半個圈。
- 506/K73巴士，亦都係活生生嘅例子，巴士要慢可以幾慢，班次可以塞到幾唔平均。相反，K76巴士行繞道可以快過輕鐵幾多。
- 再考古少少，A73雖然經元朗公路，但如果要去市中心、置樂、碼頭，一樣搭到人都癲。K1X來往良田兆康-元朗或K2P/X來往天水圍-屯門市/碼頭就好快。

輕鐵固然本身有唔少缺點，兩者亦在不同地方有優勢。
正如我一開始就講，中長途或有公路/繞路幫助下一定係巴士有優勢。
巴士絕對有需要喺上述或其他條件發揮作用，例如本文一開頭講緊屯碼（＋屯市？）<->天水圍/天水圍北，亦都應包埋屯碼（＋屯市？）<->元朗
但唔係全部代替輕鐵
當北區/大埔區內線70K/71K之流都要講緊45分鐘一單
幅員更大嘅屯元天講緊隨時要10條（其實輕鐵路線都承繼自巴士路線，加埋近30年發展，10條走唔甩），每條30-60+分鐘一單嘅區內線
（試想像615要行巴士，連埋青公要站站停，E33P由兆康去到兆山都30-40分鐘，要經青公去埋元朗仲唔過1個鐘？）

AV296 發表於 2020-10-2 21:03
無錯，我諗你開始知道個重點。
TLDR：每個point最尾嗰段

同意，亦都係我贊成嘅地方，一直強調巴士同輕鐵係互補，特別係中長線而同時西鐵盲點嘅，應該留快巴士做
雖然輕鐵而家個efficiency本身就低到無倫
例如無用盡月台長度，淨係停一卡車，兩卡長嘅月台都無用盡，唔好話3/4卡月台
大棠道西行月台，其實月台前面同後面都係只係企等車乘客嘅空間，唔係用嚟排隊上車
又例如614/5/P呢啲chi住行，或者其他線單/拖卡混走


另外，青公輕鐵行70km/h其實一向都有

ccchhhuuunnn 發表於 2020-10-2 23:19
同意，亦都係我贊成嘅地方，一直強調巴士同輕鐵係互補，特別係中長線而同時西鐵盲點嘅，應該留快巴士做
...

青公 70 km/h 有就有，但其實多數都行唔足
尤其而家一個月台唔比有多過一班車，同埋交匯處速度越減越慢
而家輕鐵已經越嚟越碌 ... 行 60 km/h 已經算比面啦

青公（藍地至屏山）嘅巴士而家會輸嘅因素得三樣
一係頻密嘅巴士站，平均一個輕鐵站有兩個巴士站，停足實慢過輕鐵
二係藍地大街盞燈，正常青公同輕鐵平排基本上係順燈
但藍地大街係車停輕鐵唔停，呢個又係一個大路口，車係好容易輸呢個位
三係洪福邨 ... 入一入無 5 分 ... 呢個唔洗太詳盡解釋啦
所以真係要開線，基本上得兩種選擇：
跑元朗公路、或者青公但只停大站（藍地、洪水橋）

不過咁講，天水圍同屯門，兩個區人口分佈都好似沙田咁散
想用一條 269 做哂基本上係好困難
就算用埋轉乘都好，都實有一兩個區漏咗，同埋件事會變得好唔吸引

樂仔〞 發表於 2020-10-4 13:39
青公 70 km/h 有就有，但其實多數都行唔足
尤其而家一個月台唔比有多過一班車，同埋交匯處速度越減越慢
而 ...

咁點解唔試下290模式呢？大家兩邊總站相同，快線到天水圍站直上公路去紅橋，慢線到天水圍站跟住K75S咁到洪福再跟68A甚至53咁去屯門又得唔得？

樂仔〞 發表於 2020-10-4 13:39
青公 70 km/h 有就有，但其實多數都行唔足
尤其而家一個月台唔比有多過一班車，同埋交匯處速度越減越慢
而 ...

另外其實天水圍唔散架，不過係東西分界得太明顯（276A/B咁）
751得276B嗰邊有，屯天線可以學276A/B咁，276A(無751)嗰邊做青公,276B(有751)嗰邊做元公，可以喺天水圍站免費互轉