首次經歷五車串燒，涉及5053 >>>>> 已加相<<<<<

人生第一次坐巴士經歷撞車，仲要係五車連環相撞。

話說今朝約十時三十分，我坐104由紅磡去上環，我坐的係NWFB 5053，坐在上層車頭右邊。

當時巴士剛過左紅隧，正選線往告士打道的道路(未到伊利莎伯大廈巴士分站)，前方一部大貨車，不知甚麼原因突然減速剎停，其後之的士即收掣不及，加上路面係微斜同彎位，我看著部的士撞向大貨車的尾板。(我當時已目瞪口呆)

我部巴士緊隨的士的後面，車長見狀亦立即剎車扭o太，三車的車速其實不快，但車多距離近，我部巴士勉強剎停，我亦因此被趴前，只好觸緊前面扶手...... 點知不足一秒，我部巴士突然衝前，撞向的士尾部，再將部的士在壓向大貨車的車尾。

我當時唔知咩事，以為巴士車長停唔切部車，我同其他乘客都魚貫落車，(幸當時巴士乘客不多，僅20-25人)，齊齊步向伊利莎伯大廈巴士分站。

紅隧的職員亦都趕到，但因為當時車禍，塞住左出告士打道的道路，連出銅鑼灣都受影響，交通警察未到，紅隧職員已開始清理現場，肇事的車輛亦慢慢泊埋去巴士分站，部摺左之的士亦由紅隧職員推埋巴士分站。

但部肇事巴士駛埋來時，我望望車尾，疑惑點解連車尾都撞凹左...... 點知原來巴士後面都被兩部5.5噸貨車撞左，唔怪得當時部巴士勉強剎停，再突然被推前撞向部的士。

交通警察同救護車都陸續來到，警察就向紅隧職員查詢當時情況，救護員就逐一問我地有無需要睇醫生，而肇事巴士車長就幫我地安排過車，不過見佢都有點不知所措，最無辜就係佢，夾在中間。

不過作為曾考過醫療輔助隊first-aid的，遇到車禍，竟掛住影相...... 的確有點內疚，不過幸好所有人都無受傷，連最慘的那部的士，司機都無事(雖然佢需要d時間才能離開部的士)。













[ 本帖最後由 pstommy 於 2006-9-16 00:23 編輯 ]

個的士司機真係無辜喇 又幾日冇得開工
兩年幾前搭29M返學果陣又係差不多同樣情況，三車連環撞，不過的士畀我搭果部29M隊尾，架的士個車尾摺晒，而29M車頭只係甩左盞燈  個的士司機想響個車尾寫野，點知摺晒寫唔倒，即時大「唉」左一聲 個差人叔叔都望住佢呆左
可惜當時返學唔帶相機  如果唔係又會學樓主咁影相

原帖由 pstommy 於 2006-9-15 14:38 發表
不過作為曾考過醫療輔助隊first-aid的，遇到車禍，竟掛住影相...... 的確有點內疚，不過幸好所有人都無受傷，連最慘的那部的士，司機都無事(雖然佢需要d時間才能離開部的士)。

咁既然唔係撞得太犀利，又無人受傷，識唔識急救都無乜分別....
最緊要唔好阻住人做野~