下一步應該點做？

下一步應該點做？

小弟又有感情問題想請教下大家喇....

前題
話說小弟今年響大學上莊，最初上莊既決定完全都係因為自己
想做，都無話有邊個拉我去做或者因為知邊個想做而上。傾莊
傾到咁上下，大家開始要傾職位分配既問題喇。呢個時候，我
有一位響大學開學前已經識既女仔 (下稱 B 小姐) 就已經傾掂
左做內務副主席(下稱內副)。而我本身係想做外務副主席(下稱
外副)，不過就同期有另一個女仔想做呢個位。搞左好耐都搞
唔掂，結果用到莊友互相投票響我地之間二選一，但結果係平
手.... 當時 B 小姐不在場，因為平手關係結果我地要搵埋佢果
票..... 即係話其實係佢決定邊個做外副。結果佢揀左我。咁我
地就做左拍擋喇。

正題
之後我問 B 小姐點解佢唔揀果個女仔要揀我做外副，其實果個
女仔既條件仲好過我喎。佢既答覆係：因為覺得佢同我夾 D。

其實果時都唔太明佢既意思。不過後來做做下野又覺得大家既
思維模式同價值觀都幾夾。同佢都幾熟下，差唔多全莊人入面
我同佢就最熟架喇。不過果時都無諗過之後同佢會點。

話說上年十二月某日，莊友既生日 party 未完我就藉口約左人
早走。其實當日我有事所以幾唔開心... 亦唔期望會有莊友知我
做乜。不過當晚 B 小姐竟然問我係咪唔開心，仲估到我大概因
乜事搞到咁，跟住我話同佢講電話，講左成兩個鐘.... 果一下真
係好感動，點解佢可以察覺到我收得咁埋既情感，又咁留意我....
而之後大家見面都用 d 幾親密既叫法叫大家。

然後平安夜本身想試下約佢出街，不過佢話唔得閒 (睇到佢本
schedule book 又真係寫左要同屋企人過)，之後改話除夕夜晚
出黎，佢就應承左.... 結果除夕同佢出街，一齊倒數，幾開
心..... 之後同佢去尖東傾計，佢成晚好多時都挨落我搏頭....
(其實開會佢坐我隔離都有時會咁) 好似好 close 咁。

過左年之後，有一次開莊會佢響會上俾人鬧得幾應，果時佢就扮
無事，但一出左去之後就捉左我去公園傾計，仲攬住我喊....
原來佢之前仲同另一個莊友嗌過大交，好傷佢心.... 其實我幫唔
到佢 d 乜，只可以聽佢呻，同佢傾左成三個鐘.... 果陣已經開始
覺得對佢有 d feel，亦相信佢對我有一定好感...... 再之後幾日亦
試過約佢出去傾下計，講左好多心事，好開心下

不過之後就好似有事，班莊友開始察覺到我地既來往同行動，
包括除夕夜晚一齊出街，就有人傳話我地兩個「有野」.... 然
後我又察覺到 B 小姐對我冷淡左，少左計傾，對我無咁熱情，
有一次，我前一晚話想佢之後個日同我上堂一齊坐，點知
佢第二日就無同我坐，事後佢搵我解釋話見唔到我坐邊，但
我前一晚講過話我會坐邊幾排位....

而家大家好似除左莊務野外少左好多計傾，再加埋呢期見佢同
另外一個男仔來往多左，個心幾唔安樂.....

B 小姐本身讀左十幾年女校，響大學都幾常同男仔玩，但比較
熟既就唔多... 佢之前無拍過拖，而從識佢咁耐所知，
佢以前會選擇迴避一切感情事，之前有唔止一個男仔鐘意佢都
俾佢拒絕.... 佢話上左大學要開始諗呢方面既野...... 而佢為人
同做事都係，乜都諗情諗楚曬，諗到合理同說服到自己既理由
先至會去做，係一個好有原則既人.....

各位可唔可以幫小弟分析下現時情況，指點迷津...?


[ 本帖最後由 fokck 於 2007-1-23 23:56 編輯 ]

都係果句﹕順其自然la

悲觀d睇，我相信你對個女仔有好感，主要都係因為你覺得佢對你有意思
咁既然而家有跡象顯示佢對你既熱情退卻，咁我諗你都應該收返埋你d好感
當返佢係你既一個好朋友好拍檔
而佢同其他男仔多左來往，亦可能只係因為你比以前更加留意佢所致

但如果向好果方面諗，話唔定佢真係對你有意思，只係而家o係度15/16緊
佢同其他人來往多左，係想試下自己係咪冇左你唔得，去畀自己一個同你拍拖既理由

我會覺得你最好短期內一切正常先，睇下究竟係以上邊個情況再做決定

[ 本帖最後由 ~誰@359~ 於 2007-1-24 22:26 編輯 ]

之前仲見佢好似避下避下我咁...
前兩日我問起佢，問佢係唔係無返學，佢應左一句：「係呀，原來你真係好留意我喎...」
之後聽到佢同另一個女仔講左句：「我好煩惱呀」....

不過尋日又見我地之間好似親密返....

原帖由 fokck 於 2007-1-27 22:31 發表

之前仲見佢好似避下避下我咁...
前兩日我問起佢，問佢係唔係無返學，佢應左一句：「係呀，原來你真係好留意我喎...」
之後聽到佢同另一個女仔講左句：「我好煩惱呀」....

不過尋日又見我地之間好似親密返 ...

如果佢果句係同你有關既話就死得
因為煩惱都有好多個解釋，仲要係好極端：
1.佢唔鐘意你，但知道你想追佢，所以煩
2.佢自覺鐘意左你，但唔想拍拖（即係欠自己一個拍他既理由）

當然，呢句亦可以解釋好多野
例如屋企野、自己野、生理上心理上都可以好煩惱
所以呢句實在代表唔到d咩

祝樓主好彩啦...

女仔, 五時花六時變...
小弟呢半年, 就一直活在痛苦中..愈來愈苦, 愈來愈痛.....

情緒愈來愈受困擾, 甚至有時覺得唔死都冇人會珍惜我...
好多時寧願自己無情tim...

希望樓主唔會好似小弟咁啦..good luck!