[往事齊追憶] 兩年前的今日‧九鐵巴士A59的最後一日

九鐵135(EA6393) @ A59



九鐵136(EA9572) @ A59


九鐵406(GM3534) @ A59

大家仲記得兩年前既今日嗎？兩年前既3月6日正正就係九鐵巴士路線A59最後一日提供服務，當日九鐵共派出四架車行A59，當中有兩架係短都城(#135及#136)，兩架係單層空調巴士(一架係富豪B10M，車隊編號係406/GM3534，另一架係三菱巴士，車隊編號唔記得左係唔係307/EZ783)。

鐵巴A59由開辦到取消都差不多成十六年，九鐵短都城可以話係A59既象徵。A59於1989年11月13日開辦，當時只係行走山景至青山灣，後來為配合良景村同埋田景村入伙先至延長路線為良景村至青山灣，當時良景村既總站位於田景村田樂樓近良景村巴士總站(即而家258D所停既巴士站)，到左2000年第三季，配合寶田村入伙，再延長路線為寶田至青山灣，並改以循環線既形式運作。九十年代既A59真係十分『賣座』，有唔少人黎乘坐，但之後就受到其他交通工具既競爭，客量大不如前，到左西鐵通車之後客量更持續處於偏低既水平，最終o係K58拍板開辦之後A59就正式取消。

A59一向都係提供全非空調巴士服務既，全線用晒短都城行走，o係九十年代初更曾經用過二手都城(#140至少159)行走，我細個既時候曾經坐過其中一架九鐵二手都城行走A59，當時坐既時候，感覺同坐一手九鐵都城都D唔同。九鐵二手都城全退之後清一色用晒九鐵一手都城(#101-#139)行走，不過A59全熱既局面卻突然o係2005年消失，因為A59既派車安排o係臨取消前最後一個幾月由四熱改為兩冷兩熱，冷馬用單層空調巴士(主要用三菱，B10M就極少見)。講番A59出冷馬，o係九十年代全熱既A59出冷馬可以話係非常罕見，我當時曾經坐過B10M同埋飛鏢行A59，但就冇留意到當時係收熱狗價定係收冷馬價。

最後講到影A59喇，我三年前先開始影巴士，但就冇點樣影九鐵都城行A59既，直到九鐵都城開始步入退役潮之後先開始影A59。第一張九鐵A59既相片係九鐵117(DS7665)，不過影得好差，矇晒，至於最後一張九鐵A59既相片就係九鐵136(EA9572)，呢張亦係我最後一張九鐵都城行屯門區九鐵巴士線既相片。



多謝觀賞～