那有一間這麼混帳的公司！

成件事係咁既…

30/04：收到和記寬頻寄黎既信，叫我一個月內去旺角或者銅鑼灣既換領中心換取超市現金券，
清楚睇到呢封信係 24/04/2007 出既。


01/05：晏晝過開港島果邊，就由灣仔行過銅鑼灣（三點半，同遊行班條龍撞口撞面），
去到金百利樓下，個 secure 唔俾我上去，我問佢點解，佢話間換領中心由 01/05/2007 起更改辦公時間，
平日開 11:00 - 20:00，紅日唔開。
（張通告仲要寫住「由 2007 年 05 月 01 日起生效」）
我就即刻拎番封信黎睇…24/04 出既信，星期一至六開 11:00 - 20:00，
紅日同埋公眾假期前夕就開 13:00 - 18:00。

一間公司更改辦公時間咁大既決定，會唔會係一朝一夕既事？
就算唔係，我諗都起碼一個星期前已經知掛？
如果知道既話，係咪好應該立即通知有份代理換領禮品既公司呢個決定，
等代理公司係封信度即刻改番個新既辦公時間呢？

換禮品通常都係紅日唔駛返工放假既時候先會去，而家間中心齊齊同我地放假，
佢地真係好「偉大」囉…

02/05：我而家就出旺角，睇下佢地點解釋。

題外話：估佢唔到，「精美禮物」係電磁爐一部！

好老實講句
呢間野我個寬頻用到夠期我就唔會再續

呢間野基本上我唔係唔滿意佢寬頻既表現
而係佢既customer services實在太離譜

初初我申請佢既服務
仲安排埋師傅上黎裝
但之前佢夠膽死打黎話同我取消安裝
我裝都未裝就取消？
跟住佢竟然咁同我解釋
話我座樓唔知乜乜物物就所以裝唔到
呢句又係廢話黎既
響我住果座樓已經有大把朋友都裝哂
佢夠膽話唯獨是我唔得
結果我條氣唔順叫佢再安排過人黎裝
結果...裝到不特止
個師傅仲反問番我話點解會「裝唔到」

之後其實都用得好地地
但係真係又係果句
你冇事由自可
有起事上黎你打去customer services... 祝你好運啦

記得我續約之後冇耐
我個寬頻又係有事
我打去問
點知去到話接駁去顧客服務主任果陣...收我線！
如是者幾廿次同任何時候打都係咁
初初我用屋企電話打既
跟住我要用手提打先得過一兩次
但後尾連手提都係咁
結果我要返公司打去剷佢先掂！

呢間咁既野
我下次打死都唔同佢續約
你有乜野優惠都係咁話
我寧願用now好過...

係時候講係今日去到呢間公司係點…

一開始我都好好聲氣去換野，個 staff 都幾 nice。
換完野，就係時候出火喇，同呢個 staff 投訴個辦公時間無端端改左。
佢就話番我聽，間公司係三月中已經出左通知，話五月就會改辦公時間，
佢又帶我去睇下張通告，右下角又真係寫住 15/03/2007 喎。

道火發唔到係度，又死無對證…不過算囉，超市券都換到手喇。

講開呢間寬頻公司，我係 05 年中係網上申請左 50Mb 額外相簿儲存量，
到左舊年四月，我開左個 domain 黎用，呢 50Mb 變左冇咩用，
我就向呢間寬頻申請 cut 左呢 50Mb，
打左三次電話去，得到既答覆竟然係完全唔同：
第一次：個 CS 話我可以係網上 cut 左佢，咁岩果陣隻 modem 死左
（用左呢間公司既短短兩年半，已經死左三隻 modem！），
結果係屋企做唔到佢叫我做既野。
第二次：返到公司搵極都搵唔到邊度可以 cut 左佢，就再打電話去。
打左三日至有人聽（每日打左起碼五次），佢就話要有份 form 要填，
填完份 form 之後 fax 返去就得，過左幾日收到份 form，就信佢多一次啦。
第三次：填完份 form 係公司 fax 左去，激氣既係之後三個月既單，
仍然收緊我呢五蚊一個月既 charge！
我就再一次打電話去嘈，個 CS 竟然同我講，我 fax 左份 form 去之後，
要打多次電話去 CS 度，睇下佢地收唔收到我張 fax。
（個腦精少少既人都諗到，邊會有咁大個笑話架！！）

跟住我就好嬲咁即刻收線，將份 form 即刻撕爛，然後拎張 CF card 出黎，
將我可以 upload 上網既相全部 upload 上去，去到 99% 先至收手。
固然你唔俾我 cut 左佢，我就同你用盡佢！！
（到而家我仲每個月送緊 $5 俾呢間公司，養住呢班咁識做野既 CS）

呢間公司，我都十分不滿意。

數年前我搬新屋，當時只有PCCW同和記提供固網電話及寬頻服務，
由於PCCW太貴，所以兩項服務都選了和記。

先說固網電話，我入伙前已經登記了，並約好了和記入伙當日來安裝，
結果和記爽了約，害我整天呆在家期待他上來。
之後，再約了另一個日子，又再一次爽約。
如是者，我不斷約和記，和記卻每一次都爽約，總共達十二次之多！
忍無可忍之下，我決定不再約他上來安裝，免得再受氣。
結果我就經歷了兩年多沒有固網電話的日子，直至另一間公司來鋪線為止。

再說互聯網，登記服務之時推銷員說得天花龍鳳，
我最記得她向我說了一句：「日後有咩問題可以隨時落來找我」
安裝上網當天，兩個師傅實在不知所謂，我間屋只得二三百尺，佢竟然留下了三十米長的接駁線。
我之後打電話去熱線，投訴師傅未搞掂，要求佢上來剪線，
佢竟然話要收$500上門費，結果我要自己處理這堆蘇州屎。
之後，上網質素也非常差，下載速度如56K，上載更加經常0 bit per second，又經常斷線。
我打去熱線投訴，但佢根本唔會理。
有一次我在樓下見到那個推銷員，我向她投訴，佢唔幫我不特已，還反鬧我阻住佢做生意。

自此之後，我對和記已經完全失去信心，於是我就開始唔交月費，以欠交月費換來與和記提早斷約。

原帖由 ChickenTong 於 2007-5-3 08:53 發表
呢間公司真係好混帳,唔用佢既服務都可以俾佢煩住~!!!

話說我手機用Peoples既..
響半年前開始,成日有d有number既電話打黎,

"喂,請問係咪9XXXXXXX既機主?"
"係呀"
"您好呀,我地係和記電訊打黎既,
而家有個新既 ...

小弟近期有個3仔的電話合約接近期滿, 但小弟已想cut左佢唔用, 佢地打來, 我話左我太多電話
計劃緊合約滿就停機, 點知佢地竟然每日打來煩我一次.

小弟女友醒目, 合約滿前一個月走左去數記轉台, 等佢唔放人都唔得.

原帖由 ChickenTong 於 2007-5-3 08:53 發表
"喂,請問係咪9XXXXXXX既機主?"

呢D咁o既電話擺到明唔係有心搵你架啦(連搵
邊個都講唔出),俾我就費事同佢o徒口水啦