本帖最後由 VocaloidMikuBus 於 2021-4-22 10:53 編輯
(麻帆良市心跳巴士迷俱樂部會長 Monika 報導)
今日港鐵嘅東鐵綫, 前身係於 1910 年 10 月 1 日通車嘅九廣鐵路 - 英段,
並且由當時成立嘅九廣鐵路局管理, 全程以單綫行車,
早期行走九廣鐵路嘅列車係由蒸汽火車牽引, 直至 1962 年由柴油機車全面取代蒸汽機車。
隨住港英政府喺 1970 年代喺鐵路沿綫興建新市鎮, 連接新界至九龍之間嘅交通需求亦大幅增加,
九廣鐵路為應付未來嘅發展, 於是喺 1970 年代末,
斥資 35 億港元進行現代化計劃, 將現有路綫作出改良, 包括改為全綫雙綫行車、
重建及加設新車站, 並且實行電氣化, 而管理部門亦作出重大改革,
由原來嘅政府部門改為一個公共法定團體 -- 九廣鐵路公司 (Kowloon - Canton Railway Corporation, KCRC);
列車方面, 九鐵使用由英國都城嘉慕 Metro - Cammell 提供嘅近郊型電動列車,
並且喺 1982 年正式投入服務, 因為佢地黃色嘅車頭外觀, 因而被稱為「黃頭」列車,
亦係九鐵電氣化後首款使用嘅電氣化火車。
呢批列車喺 1996 年起進行中期翻新工程, 並且稱為中期翻新列車
(Mid-Life Refurbishment Train, MLR), 翻新後嘅外觀,
車頭擋風玻璃改為三片及增大面積, 配色亦改為銀灰色, 因而得名「烏蠅頭」嘅稱號。
隨住 2007 年兩鐵合併後, 呢批列車全數租予港鐵公司作鐵路營運之用,
並且由港鐵公司進行日常維修及清潔; 隨住呢批列車年事已高,
除左其中一列火車因為喺 2019 年 11 月反修例示威運動嘅「三罷運動」期間被大肆破壞而要報銷退役外,
呢批列車喺今年 2 月已經開始陸續退役, 並且由韓國製造嘅現代 Rotem 列車 --
東鐵綫現代列車取代。因為九廣鐵路有相當長嘅時間係使用蒸汽機車同柴油機車行走, 形象深刻,
所以儘管東鐵電氣化已久, 香港市民口中仍然習慣將其稱為「火車」,
而佢地嘅車站亦稱為「火車站」, 部份九巴路線目的地名稱曾使用「火車站」一詞,
例如「沙田火車站」、「旺角火車站」等, 至今仍然有部份小巴路線使用「火車站」一詞作為目的地名稱。
今日, 心跳巴士迷俱樂部隆重歡迎九鐵黃頭列車登場!
作為一個老香港, 黃色車頭嘅電氣化火車絕對係眾多香港人嘅集體回憶之一,
特別係對於市長 Super Bus 嚟講, 呢款黄頭列車更加係佢成長嘅一部份...
 (Super Bus 亂入, 雙眼呈三角狀): 依家我好老咩大嬸?!!
 (Monika) Ahaha...我冇話你老啵 Super Bus, 仲有我唔係大嬸哦 OK?
Anyway 我地依家上緊鏡㗎, 唔好咁失禮啦...
(Super Bus 滿面通紅中): O...OK...
(續) Super Bus 話, 雖然佢「牙牙仔」果陣, 佢家人都有帶過佢坐帶住綠色車身,
由柴油機車牽引嘅九鐵火車, 但係印象始終模糊,
直到八十年代初佢讀幼稚園果陣, 喺電視睇到九鐵賣廣告,
內容係九鐵列車使用電氣化火車, 來往九龍同新界新市鎮嘅時間從此比以前大幅縮短,
片尾更以唱「九廣鐵路電氣化 新界港九成一家」為結尾, 令佢留下深刻嘅印象,
之後又有「齊齊搭電氣化火車, 方便、快趣、好野!」等宣傳廣告,
宣傳電氣化火車嘅好處:
Super Bus 話, 以前細個亞嫲有時都會帶佢去坐九鐵黃頭列車入沙田同大埔行,
佢對當時列車車廂使用橙色嘅塑膠座椅, 同埋列車臨閂門前,
會有一下連續嘅「嘟嘟嘟嘟嘟嘟」聲響警示乘客, 在在令佢記憶猶新,
佢話自己雖然係一個巴士迷, 但係有時如果趕時間或者工作上嘅需要,
都會選擇坐火車去沙田大埔, 始終的確比巴士更快到目的地。
1996 年九鐵推出左一款「黃頭」列車模型,
而且車門亦可以打開, 本來令 Super Bus 為之心動,
奈何當時佢已經人在美國, 面對模型相片亦只有望車興嘆,
由果陣開始, 佢一直期望有朝一日可以擁有一架「黃頭」列車模型,
廿多年後, 佢嘅期望終於都成真啦! 最近港鐵推出左呢款「黃頭」列車模型,
連同最新投入服務嘅現代 Rotem 列車模型一齊推出,
造工亦比上一架更精緻, 雖然車門唔開得, 「唔開得都冇所謂啦!
我玩呢啲模型唔洗要求咁高嘅, 太多活動野玩仲更易整爛野呀~」
不過市長 Super Bus 話喺入手呢架「黃頭」列車嘅過程中,
亦都遇到一番波折, 或者係因為呢架列車太受歡迎, 加上有關方面嘅銷售方法,
莫講話身在美國嘅佢, 就連喺香港想入呢架列車嘅朋友,
都唔係咁易入到, 更要面對炒價硬食嘅情況,
令人唯有無奈噗句: 「呢啲機會唔係屬於我嘅...」之言,
但係對於 Super Bus 嚟講, 九鐵黃頭列車就係佢喺香港成長嘅回憶之一,
加上呢批電氣化火車已經開始退役, 代表住英製電氣化火車嘅時代行將結束,
「1996 年九鐵出嘅『黃頭』列車模型我入唔到, 今次我點都要圓左個心願,
已經唔係千金難買心頭好咁簡單, 炒價都照殺啦!!」
喺得到香港嘅朋友幫助之下, 今日 Super Bus 終於得償所願啦!
今日我地收到呢架「黃頭」列車模型,
Super Bus 形容有如將佢時光倒流帶回八、九十年代, 香港最美好嘅時光,
以前搭火車嘅回憶依家全部返哂嚟,
「錢洗左仲可以有辦法賺返嚟, 但係回憶呢啲野唔係用錢就可以買到返嚟㗎!」
睇到 Super Bus 一收到呢架「黃頭」列車嘅時候,
感動到眼角有淚光嘅一刻, 我地都已經感受到佢對呢款列車果種難以言喻嘅情意結啦
(Super Bus 按: 呢個就真係信不信由你啦,
不過玩左咁耐交通模型以來就真係未試過一次好似呢架「黃頭」咁癲就真嘅~)
Anyway, 今日 Monika 就同市長 Super Bus 一齊,
同大家一睹呢架九鐵 Metro - Cammell「黃頭」列車嘅風采!
隆重歡迎! 九鐵 Metro - Cammell「黃頭」列車, 見參!!
收到呢架黃頭火車模型固然既開心又感動,
不過同上次收到橙頭輕鐵一樣有一種美中不足嘅感覺,
雖然都知九鐵同地鐵已經合併為港鐵良久,
但係以港鐵嘅名義同 Logo 去出呢兩款列車模型,
個人總係有一種講不出嘅違和感,
難怪有人話想用辦法冚左盒上面嘅港鐵 Logo 啦...
(Monika) 但係至少都如你所願可以擁有一架黃頭列車喔 Super Bus,
而且仲比好耐好耐之前出果架精緻好多啵係咪? 💓
(Super Bus) 咁又係~
證書編號 0258, 限量 2000 架,
對上一次九鐵推出「黃頭」列車模型, 相隔廿多年,
據知當時推出左 5000 架, 依然全數估清,
到依家都一架難求, 今次只出二千架,
除左老香港嘅情意結之外, 佢地行將喺香港鐵路嘅舞台上消失,
會否同樣係令眾人追捧嘅原因之一?
正式落地!! 副會長 Sayori 都鍾意呢架黃頭九鐵呢~~
都城嘉慕 Metro Cammell, 一個我地曾經熟悉嘅名字,
除左出鐵路列車之外, 亦曾經出過巴士,
仲記得以前九巴、中巴、同九鐵巴士部使用過嘅 Metrobus 嗎?
大家仲記得呢個標誌嗎?
內籠特寫
友人陳鴻輝相片, 1996 年推出嘅九鐵黃頭模型
就咁睇相感覺有啲粗糙啵...
以當時嘅技術同水準嚟講已經係好好㗎啦,
果陣佢話呢架模型賣 150 蚊, 而且車門又開得,
所以果陣就算出左 5000 架都全部賣哂, 依家都唔係咁易揾到添啦!
代表八、九十年代嘅香港鐵路列車 -- 地鐵白頭、九鐵黃頭同輕鐵橙頭
同樣出九龍, 九巴同九鐵, 你會坐邊架?
加: 1990 年嘅九廣鐵路八十年, 由李學儒作旁述,
可以令大家了解九鐵由 1910 年至 1990 年間嘅發展,
值得一睇喔~
Thanks for reading~💓
|
樓主