[多圖] 法國里昂之旅

里昂公共交通（TCL）既地鐵站都係用同款閘機，防止入閘跨欄逃票（本身出閘唔需要出示任何車票就可以直接行過）。左邊寬閘機有兩度閘，要先撳掣開門入中間位置拍卡

增值機、售票機。售票機唔係輕觸式螢幕，要用下面滾輪同埋撳掣選擇

車站位於隧道之間

好快入閘搭返車離開。F1線採用1000 mm軌距，88年登場既呢款車同F2線一樣既生產商製造，19年大翻新

控制台

Vieux Lyon站月台有展板介紹呢條纜車

位於舊城區南邊既呢個舊里昂站配合地鐵D線91年通車而大改造，興建長電梯連接地鐵月台

地鐵月台

D線係世界首條用CBTC信號系統無人駕駛既地鐵，一直無月台幕門/閘門，月台上得車卡連接位有欄桿

全自動既MPL 85膠轆列車，兩卡之間唔連通

之後嗰日朝早至中午都喺會場聽講座，聽完就搭主幹巴士C1線去到里昂半島山丘上既Cuire站轉地鐵C線

呢條線採用對應齒軌路段既MCL 80

外觀設計同膠轆列車MPL 75好類似

坡度平坦既Cuire～Croix-Rousse站之間無齒軌

搭一個站去到Hénon

昔日呢度既絲綢紡織工業造就里昂既發展，而附近路口就係著名既壁畫Mur des Canuts（紡織工人之牆）

沿住紡織工人大道（Boulevard des Canuts）一路行，途中既Place des Tapis都有壁畫，附近就係地鐵C線既Croix-Rousse（紅十字）站

保險公司既玻璃，唔知係咪同早前騷亂有關？

大岸坡道（Montée de la Grande-Côte）最頂位置有觀景台

途中有啲玩味壁畫

大岸坡道經典打卡位

最後行到去Croix-Paquet站搭返C線。從外面馬路行入公園呢個入口途中無乜指示牌，有啲難搵

C線又被稱為世界坡度最大既地鐵，因為佢本身係從纜車系統改建、延伸而成，呢個站斜度就有17.4%（=174‰）



對應齒軌既MCL 80慢慢入站

搭返落山

臨到總站之前唔知點解架車熄曬燈，喺隧道停好耐先入站，又唔係等對頭車駛過。C線既Hôtel de Ville（市政廳）站分開上落車月台，不過落車月台嗰邊要就柱位配置

月台牆上有舊塗裝既MCL 80模型


唔睇旅遊指南都唔知里昂被稱為美食之都，有唔少平價、實而不華既傳統菜色，我地晚餐係舊城區既傳統里昂餐廳體驗下馳名既Bouchons Lyonnais。

梭魚蓉焗批Quenelle，配忌廉薯仔

甜品係Saint-Marcellin芝士配黑醋（寫著Merci）

經過星期三全日參與學術會議之後，我地就走出里昂，搭火車去瑞士日內瓦、法國安錫遊覽。

我地提早一日喺售票機買飛。最初選擇旅行人數、年齡、適用優惠、目的地等等個陣都好容易，不過去到比錢前仲有得揀數目，搞到差啲中伏 。原來除左最初旅行人數之外仲要喺最後揀印飛張數，例如兩者都揀3既話就會變成三人車費再乘以三張飛既價格。我地最後就揀三個人都係用圖中同一張飛，除返開既二等正價車費就係31.9歐元

食完酒店早餐之後就喺六點三左右去到Part Dieu站，可以見到其他月台已經好多旅客

搭6:38開出既呢班車去日內瓦，其中既CFF就係瑞士聯邦鐵路SBB CFF FFS既法文簡稱（Chemins de fer fédéraux suisses）

發車資訊屏，每班車既月台資訊通常都喺廿分鐘前先顯示

為左理解月台廣播、資訊顯示等等，我喺出發前從YouTube啲教學片上面學左字母、數字、時間既法文讀法，同埋一啲法文鐵道用詞。

以下呢條片係法日對照既車站廣播，都幫左我唔少：


鐵路相關既主要法文詞語，建議了解埋讀音：

chemins de fer：鐵路
SNCF, Société Nationale des Chemins de fer Français：法國國家鐵路公司
TGV, train à grande vitesse：高速列車
TER, transport express régional：法國大區快速運輸，泛指各地既有路線各種列車，TER讀音類似英文tea where
gare：車站
voie：軌道，喺資訊屏/廣播入面通常指月台編號
quai：月台
sortie：出口
va partir：即將開出
partiront/partira：從...開出
il dessert/desserviront：本身係服務既意思，喺廣播入面指中途停靠...站
prochain arrêt / arrêt：下一站 / （現時）停站
correspondence：轉乘
à l'heure：準時
perturbation：服務受阻
retard：延遲
supprimé：（班次）取消

一啲串法同英文類近/一樣，意思亦一樣既詞語就唔列出黎啦。

旁邊月台停左呢列B 82500雙動力源列車，有柴油引擎之餘亦對應直流1500V、交流25kV 50Hz電氣化路段

呢款車每卡得中間有門。左邊係高地台位置既一等座位，右邊低地台空間既二等座位就同法國普遍既矮月台差唔多高度，入面仲有單車位

TER 1998既深藍配灰色塗裝，車身貼有AuRA大區既TER品牌標誌

當時只係聽到列車即將通過既廣播，原來係我地要搭去日內瓦既TER班次到站。用車係只對應直流、交流電氣化路段既Z 27500。

我地坐喺高地台位置既二等座位

里昂～日內瓦呢段路既前面展望

兩個鐘車程一路穿越山區，途中只有查飛而唔係查護照。就到之前停左好耐等入站，不過都差唔多準時到達Genève-Cornavin（日內瓦-科爾納萬）站

瑞士聯邦鐵路著名既時鐘，特色係簡約設計同埋秒針「Stop to go」既運行方式：用約58.5秒不停頓地繞一圈之後短暫停喺00秒位置，方便乘務員對準時間發車

旁邊月台咁啱就有InterRegio（IR）區際列車入站，呢班車從日內瓦機場開去Luzern（琉森），由Re 460牽引IC 2000雙層客車

來往法國既中長途列車只會停喺呢邊既7、8號月台

後面都有Re 460機頭，而呢班IR後半係VU IV客車，德文又名Einheitswagen IV（標準客車IV），同法國國鐵Corail客車及歐洲各國既Eurofima客車一樣規格