日本航空 東京(羽田)>福岡 頭等艙體驗

日本航空 東京(羽田)>福岡 頭等艙體驗


日期：26MAY2024
時間：19:40(20:01)-21:40(21:45)
航班：JAL335
機型：Airbus A350-900 JA09XJ


其實明明星宇都有福岡直航，點解要由東京特別再搭飛機再倒頭去返福岡？一來係唔想坐窄體機，二來早就想坐JAL國內線，由於先前一連串訂錯飛事件，呢程原本極平嘅內陸機一下子由經濟艙最優惠票價變成頭等艙，以警剔自己飲咗酒就唔好去做緊要事。

喺成田機場有巴士直達羽田機場，如無意外一個鐘內可以到，所以一般係唔建議用鐵路出市區再轉乘。

車會先停羽田T2先到T1，最後係T3。

中途因為交通意外導致塞車，比原定時間用多咗起碼30分鐘，但總算係趕得切之餘有時間可以坐下。


頭等乘客有專用check in 櫃檯，經過安檢就可以直接上到貴賓室。

貴賓室有窗就最好，可以睇飛機就更好，可惜窗邊都坐滿晒人。

食品總類極少，零食類同麵包為主，飲品嚟講就合理乜都有啲。

閘口安排喺11號，早一班333就喺12，其實時間夠我係唔應該再改坐呢班335。應該幾多人知道JAL係有臨櫃付費upgrade，但JAL已經改咗起飛前3小時喺網上自己安排。

今日坐2D中間位，原因係老人家我怕成日行嚟行去阻到人，呢個位對比國際線大約係區域性商務艙product 高級少少，亦係我當初專揀787/350坐嘅原因。
IFE屏幕大細合理，觸屏反應流暢，至於內容就唔係好多，兩小時都唔使嘅行程係夠用嘅。

座椅調整全電動，會移動嘅只有腳托同椅背，功能係單純嘅震動，當無好過啦。

遙控、耳機插頭同電源收得幾埋。

拖鞋準備好喺前方空間。

耳機係Sony on-ear款式嘅主動降噪耳機。



是日餐單及飲品list。

餐檯喺扶手抽出嚟，大細都算合理。

是日晚餐，主菜係雞肉漢堡排，飲品呢杯係JAL白桃特飲(蘋果味)，甜品係米粉芝士蛋糕，JAL餐飲水準都仲keep到。食飽之後空姐嚟收嘢，順便問乘客有冇需要多一杯飲品，我就請佢哋畀多杯咖啡我，就此結束短暫嘅旅程。


今次坐JAL都係無遇到日藉空姐怕服務外國人嘅問題，亦都感受到佢哋嘅服務熱情，亦十分感謝佢哋為我送上驚喜，希望出年可以再坐。玩埋幾日之後會仲有一篇飛行報告，過幾日見。