港鐵已逐步移除部份車站的車費表

eternalflame 發表於 2025-6-24 01:42
古洞站個票價係北環線主線通車前，都仲可以當係現時行車線上加站
所以係外面討論區都係話以上水同落馬洲 ...

其實西鐵票價的釐定唔止VoT(時值票價)，而係包括埋綜合西鐵/輕鐵票價策略 (Integrated WR/LR Fare Strategy)，即係西鐵票價入面其實暗盤係有幾蚊用嚟補貼輕鐵及提供免費轉乘，只不過呢樣嘢唔可以直出公海，只能夠在當時的九鐵文件得知。因此將東鐵票價水平提升到同前西鐵一樣就會相反地對東鐵乘客不公道，但提升到接近前馬鞍山鐵路相若水平是值得探討的。

kei_hk 發表於 2025-6-23 17:56
當北環線開通﹐MTR 難以砌到份新票價﹐出現大量不合理的收費時﹐這就係MTR的誘因。而北環線最大影響係大 ...

講遠少少，可行方向係整份類似巴士嘅車費等級表
港鐵同其他營運商都要根據呢個等級表訂定車費
但入面會唔會提供優惠令車費跟返宜家個隻玩法就交返俾營運商決定

tonyng 發表於 2025-6-24 01:56
其實西鐵票價的釐定唔止VoT(時值票價)，而係包括埋綜合西鐵/輕鐵票價策略 (Integrated WR/LR Fare Strateg ...

用撇除綜合票價策略（即係唔再免費轉輕鐵）做屯元天個車費基數
似乎先可以拉近返西鐵同東馬鐵個收費差距
我覺得咁做似乎簡單過提高東鐵路段車費去同馬鐵睇齊


為左避免乘客混亂
輕鐵車程轉屯馬線可以劃一收$4-5
貼近現時收費結構
不過咁做壞處係會益左唔需要輕鐵接駁嘅乘客

tonyng 發表於 2025-6-23 16:56
釐定荃灣線車費的基礎：
「由荃灣至尖沙咀與觀塘至尖沙咀就是其中一個例子。雖然乘搭車站數目相同，但由於 ...

唔係觀塘線平哂嘅，比較下旺角去荃灣（$7.4）同旺角去彩虹（$9.2）？

tonyng 發表於 2025-6-23 17:56
其實西鐵票價的釐定唔止VoT(時值票價)，而係包括埋綜合西鐵/輕鐵票價策略 (Integrated WR/LR Fare Strateg ...

東鐵定價有冇考慮埋大埔同舊日條K11呢？

eternalflame 發表於 2025-6-23 17:42
古洞站個票價係北環線主線通車前，都仲可以當係現時行車線上加站
所以係外面討論區都係話以上水同落馬洲 ...

古洞响啟用時跟羅湖落馬洲特價證無話唔得嘅。

只係到北環線一通，個人估計最少係收錦上路嘅價位，咁新田同古洞嘅差距，會仲誇張過鑽石山往返馬頭圍同何文田。
問題係接唔接受到啫。

至於你話用核准機俾甜頭，係咪指北環線通車後，往返古洞站嘅車費要大幅加價？
最大問題係純東鐵線嘅車費太低水，反而一轉去其他線，差距細好多。
仲有就係紅磡站出發呢？加唔加都係問題。

s3n370 發表於 2025-6-24 08:07
唔係觀塘線平哂嘅，比較下旺角去荃灣（$7.4）同旺角去彩虹（$9.2）？

旺角去葵芳已經索價$9.2喇。

tonyng 發表於 2025-6-24 09:11
旺角去葵芳已經索價$9.2喇。

美孚-葵芳段、彩虹-九龍灣由地底升地面，行車距離較長，打後車站去界限街以南車費升1級理由尚算充份。所以我都唔敢舉呢個例子

s3n370 發表於 2025-6-24 08:09
東鐵定價有冇考慮埋大埔同舊日條K11呢？

東鐵定價是由九廣鐵路局釐定（作為巴迷的你應該都清楚知道K巴邊年先至出現），九鐵在公司化後直至兩鐵合併前，已一直貼近通脹率調整票價。

上面提到將東鐵票價加到與西鐵相若水平是不公平，是西鐵票價本身已有綜合輕鐵收費的因素，以及九鐵公司需要收回西鐵高昂的建築成本以及營運成本 (比較東、西兩鐵的車站的規模及設備)。至於可行解決方案，本人以及上面 eternalflame 板友已有提及，在此不贅。

LimCl203 發表於 2025-6-21 23:10
留意到呢個新張貼的車票資料中，現時$30一天任搭的「屯門 - 南昌全日通」已經沒有了，唔知發生咩事 ...

T&C #7: 全日通乃推廣活動。推廣期由2024年6月30日至另行通知為止。

屯門系全月通免費轉95K小巴都響2星期內即將壽終正寢，繼經鐵個人八達通優惠之後，應該都有可能逐步為九鐵優惠斬纜……