關西長崎行-CX566>JL2373>JL2374>CX507

今年五月例牌去旅行選定咗大阪世博為主軸，再加上去年長崎行落雨做唔到啲乜所以今年再去咗一次。好難得嘅係用Avios換到來回程國泰商務艙仲要係靚時間，所以去程就揀凌晨機。適逢國泰航空重返SKYTRAX全球最佳航空公司第三名，可以睇下究竟值唔值得咁高排名。

收咗工返屋企再攞行李出發，時間係相當充裕。

去程行李重12KG皆因係俄羅斯套娃，大喼內仲有一個細喼。

適逢國泰重開THE BRIDGE逸連堂，就算遠都好都要去，btw 多咗簡體字老實講好唔夾好似降咗級。


裝修風格一如過往國泰貴賓室，主色調偏深色然後用燈光造成空間明亮

坐到好入，就算我着長袖都感受到冷氣凍得有啲過份。


飲品同過往差唔多，自家品牌啤酒任飲真係正，但因為後續行程要揸車就唔飲得。


國泰貴賓室餐飲真係唔差，今次就試晒主打新品，不過要分開兩個唔同地方攞。

今次喺1號閘口，真係傻嘅先至會去3X閘口坐到夠鐘再行15分鐘返登機閘口。

恭喜，今次國泰又双叒換成舊款商務位A330執飛，用Avios換真係無仇報，行程又排得好緊湊只可以硬食。

餐牌一早已經放好，每個位都會有枝法國名牌天然水。

時間差唔多就有人送上迎賓飲品，我揀咗想飲好耐嘅Cathay Delight，由奇異果同椰奶打成非常啱口味。

Red eye餐飲選擇就得返兩款一中一西，點餐時會問埋乘客需唔需要用餐。

以宵夜角度嚟講份量偏多，芝士拼盤我已經要求唔好上，味道就合格有餘，不過甜品我無食到因為空少見到我停咗手就先收走可以盡快休息，我反應慢只答佢唔食就畀佢收走先。

天光就代表差唔多到，年紀開始大真係唔應該坐red eye，飛日本時間太短訓唔到幾耐，食得太飽又難入睡。

落地後就急急腳去轉機，呢個時候先發現咁早係無直達巴士去伊丹機場，呢個就係自己無做足功課嘅問題，職員建議先去梅田再轉巴士去伊丹機場會好啲。當然啦，的士錢都夠買一張新嘅內陸機機票，最[backcolor=rgba(255, 255, 255, 0.9)]後都係嘗試下車駁車。

本來預計有三個鐘轉機時間，但好可惜車程佔用咗接近2/3時間，去到伊丹機場已經得返一個鐘多少少，啱啱好趕到托運行李嘅死線。無人想做死線戰士，我係做咗兩次咁解。

我本身用電子登機證，入閘會有張紙仔寫晒航班資料同登機組別資料。

伊丹機場有免費嘅電動輪椅代步用，時間關係無試用。

767開始越來越少客機，可能出年搵次坐坐。

今次係第一次坐波音巴士以外嘅飛機，呢次坐E170缺點係全Y。

空間都算唔錯啦，不過人太多唔係好方便影相。




安全資訊卡同機上販售catalog。

JAL機上有WiFi，不過呢架就係用作inflight entertainment 用，如果我無記錯內容係無咩更新，又寧捨有一集孤獨的美食家有中文字幕。

機上有最基本嘅飲品服務提供，不過要咖啡就唔係好似星悅咁會畀一粒朱古力。

一個半鐘唔使嘅航程就到長崎，行李都出得快，拿咗行李就去租車公司櫃檯報到。唔係好明佢哋擺人坐機場櫃檯標準係咩，係咪有外國旅客而又唔識日文就會安排員工去機場等人唔使個客打去又溝通唔到？不過確實初次使用ORIX印象有加分會再考慮用呢間。

長崎連同雲仙溫泉留咗3日2夜，回程一樣係坐返日航，揀日航最主要原因係價錢比ANA平少少同自己本身係Oneworld 嘅人儲返伙伴航空里數。長崎機場係有國際線，不過可惜嘅係香港快運仲未復飛，我暫時唔抱任何期望。

入到機場見到指示牌寫大型購物中心，其實機場本身就唔係好大邊得嚟大型？

適逢長崎機場50週年官方擺相片展覽作為興祝活動。

細機場都有觀景臺，喺Starbucks 附近有通道通往，相反香港機場嗰個喺禁區內嘅吸煙區咋。

出觀景臺之前有擺放機場車輛介紹同飛機模型。


可以無阻礙咁影飛機係一件好事。


時間尚早加上天口熱返入屋內搵個地方坐下，Starbucks 日本開始使用App Clip小程式點餐就唔使怕語言溝通，類似微信小程序嘅功能。

比較可惜嘅係酒吧未開，如果唔係就應該飲返杯先再出發。

機場仲有模礙飛行駕駛遊戲，都唔錯。


回程都係E170，坐返同一個位，都係飲咖啡，日本招牌營業笑容都係不變。

唯一唔同係今次有派糖仔畀所有乘客。乘客

到埗伊丹機場，因為無分開到埗同登機乘客所以係可以喺禁區裏面稍作逗留，咁啱就見到世博彩繪737。

攞咗行李出機場就係惡夢，伊丹機場往梅田嘅巴士班次遠比關西機場少，所以好快打爆一架車係唔意外，但日本高速巴士係有助手席，意思係座椅傍有張摺凳拉出嚟坐，來都來了上咗車就無得揀。

雖然巴士係去梅田但落車地方有唔同，都會喺大阪/阪急梅田站附近。

最後一日返香港，今次終於打破坐A350無商務艙坐嘅宿命。回程一樣係機型變更，不過係A359變A35K，所以坐HARUKA綠色車廂賀一賀佢。

到大阪關西機場，國泰喺E區報到，見到最多人一定係經濟艙，商務去無人嗰邊就得。

今次櫃檯地勤係外藉實習生，不得不讚賞佢已經具備獨立工作嘅條件，好迅速完成手續。


關西機場有Fast Lane畀某啲乘客，不幸地今次用呢張卷入去安檢仲耐過普通隊，前面起碼有兩組乘客由地勤帶過嚟塞住咗。

關於KIX DUTY FREE，雖然官方聲稱為咗方便旅客而且首度採用快餐店自助點餐機方法購物，但其實如果喺好似我咁只買酒係可以直接喺櫃檯結帳。

買完酒就去貴賓室坐下，關西機場喺國際線部份翻新工程後將航空公司貴賓室整合為兩個貴賓室KIX Lounge Kansas及KIX Lounge Premium，目前只招待航空公司會員及指定艙等乘客，暫不招待信用卡客人。

兩個貴賓室位置就係相鄰，分別只係Premium只招待頭等艙及指定級別航空公司/聯盟會員，其他乘客只可以去Kansai。


KIX Lounge Kansai分開兩邊，比較多人提及嘅係光猛啲嘅一邊，其實有另一邊係比較暗而且人比較少啲。

酒水飲品選擇都係合理數量，不過神泡任飲係正。


食物選擇唔多亦都唔係難食，叻過環亞嘅。

呢日班機算係準時嘅，同埋都多人。

恨咗好耐已經變咗第二新嘅國泰商務艙，個人感覺上升級嘅地方真係屬於追上時代嘅更新。

空間大小我覺得算正常，可能我比較瘦。

一樣有名牌水，耳機插頭終於正常，不過依家先知呢代國泰商務艙都係用非一般飛機插無得用自己耳機。



是日餐單飲品單。

時間差不多就送上迎賓飲品，今次就無Cathay Delight啦就飲橙汁。


對於國泰重返SKYTRAX 全球最佳航空公司第三名或多或少都感到高興，然而呢啲就係第三名嘅質素。

到咗指定高度就開始餐飲服務，第一輪有飲品同零食，今次唔飲酒飲返好難有機會飲到嘅Cathay Delight。

晚餐時間，一樣都係上機時點餐，今次除咗中西式之外會多個日式，睇餐單好似日式比較啱口味所以就要日式，頭盤部份精緻度未必輸日航太多，係好食嘅。

主食老實講呢個外觀就真係差啲，味道都係正常好食，不過多多少少你會想畀得呢個價錢就應該有更好嘅餐點。

諗起自己從未飲過國泰自家啤酒，一飲就不得了飲咗兩罐，呢隻淡啤酒好啱口味。

甜品就係哈根大師雪糕無也特別，回想喺星宇做到差異化就真係懷疑國泰究竟值唔值得高排名。

返到香港，入境快自然等行李時間會耐啲，日本入境耐反而大家接受到就奇怪，反正追到一個鐘一班巴士就算啦 。

最後，對於國泰航空獲得全球十大最佳航空公司殊榮我係感到高興，即使呢間公司向政治低頭向小紅書低頭甚至識廣東話嘅人越來越少，我都仲係會坐佢。但自問要求唔高，綜合近期嘅乘搭體驗我都係認為排名名不副實，拿高排名唔係你進步而係因為人哋退步，感覺多多少少都有啲唏噓。

2025飛行報告暫告一段落，如無意外就係明年再見。