【由視覺違和感開始】
喺福岡天神街頭，識得睇嘅你，會發現一種極其矛盾嘅視覺衝擊。
我嘅視線，總係被一種老派嘅「四摺門」巴士吸引。喺現代 Non-step 低地台巴士清一色採用滑動「趟門」嘅今日，呢種需要上一級樓梯（One-step）、開關帶住清脆氣動聲嘅四摺門，係 西工（西日本車體工業）96MC 呢類 2000 年代老兵嘅最後風骨。
但令我百思不得其解嘅係，呢啲充滿「蒼老感」嘅老車身上，竟然貼住代表未來科技嘅黃色綠色葉片貼紙（Electric Bus）。甚至，你會發現旁邊一架一模一樣嘅 96MC 經過，但佢身上一張貼紙都無。呢種違和感，令我由 21/3 抵達福岡起，心入面就一直好想知呢部嘢到底係咩料。
【24/3 與 25/3：西工主場嘅驚喜紀錄】
西工車身喺福岡簡直係一種信仰。24/3 我由博多站上車去日田途中，經過天神高速巴士站，見到一架行「筑紫野特急」嘅西工 B-I 型（特急仕樣，俗稱 B-High）。
最值得留意嘅係，呢批 B-High 正好展現咗西工 96MC 車身嘅「百搭性」——雖然市內線多數係 UD (Nissan Diesel) 嘅天下，但呢批特急老兵好多係裝喺 日野 (Hino) 底盤上面。雖然車身已經極殘，甚至仲保留住全福岡極罕見、充滿懷舊味嘅卷布（路線牌），但嗰種高地台老兵嘅氣勢依然好強。可惜當時我搭緊車移動得太快，呢份咁有味道、結合咗「西工殼 ＋ 日野心」嘅特急遺珠，最終遺憾影唔到相。
直到 25/3 10:38，我終於喺天神今泉正式影到第一張 96MC EV 版嘅相。影完相之後，我喺心入面許咗個願：「如果今次旅程可以搭到呢款改電版，摸下佢底細就好喇。」
點知翻查資料，佢底盤型號係將2010年西工倒閉前嘅UD PKG-RA274TAN 底盤進行電動化。即係一個末代西工 96MC 續命矩陣。
西鐵巴士UD PKG-RA274MAN改 EV版福岡200 か 20-45@113 今泉
https://youtu.be/Rlo1OcGEJOk?si=9i3y1R12LaNVZhiI
【技術背景：點解唔攞最先進嘅 Non-step 去改？】
好多人會問，既然要改電，點解唔攞最新嘅 Non-step 去改？呢度體現咗西鐵嘅理性決策。對於追求實務嘅男士嚟講，我哋好明白「舊嘢改裝先係最穩陣」：
1. 結構優勢：正因為 96MC 係 One-step，地台高咗少少，空間剛好形成天然嘅電池艙。電池平整鋪喺車底，降低重心之餘，更確保車內全平坦，唔使好似 Non-step 咁為咗避開摩打而犧牲車尾空間。
2. 風險管理：呢批 2005 年老將殘值接近零，攞佢哋嚟做實驗「唔用得，可以直接拆」，對主力車隊嘅資產價值無損。
【技術清白論：台日友好嘅演化史】
2022 年，當各地引入比亞迪（BYD）新車時，西鐵揀咗一條成本較低，更有「誠信」，但更難嘅路：台日技術交換。佢哋無搵大廠全套輸出，而係搵咗台灣華德動能（RAC）合作，喺呢個「變質前」嘅清白期，將台灣三電系統塞入日本老骨架。
* 2022 年：西鐵將2005-2007 年式 嘅UD ADG-RA273MAN改。運去台灣，由華德動能（RAC）進行初步改裝與技術對標。
* 2023 年：技術成熟後，由 EV Motors Japan (EVMJ) 接手，喺北九州廠房進行自主改裝。
* 2024 年：西鐵認為實驗成功，正式為呢批「老殼新心」嘅老兵貼上黃綠色葉片貼紙，投入營運。值得留意嘅係，一旦呢批老兵完成「能源轉生」，佢哋喺營運紀錄上就會徹底放棄原本嘅 UD 底盤名稱，而係統一標註為 「西鉄型レトロフィット電気バス」（西鐵型改裝電巴） 或者簡單叫 「EV」。
呢種名份上嘅斷捨離，象徵住佢哋已經由舊時代嘅柴油先鋒，正式轉生為福岡綠色運輸嘅新軍。呢款 96MC 同後來大阪萬博嗰啲掛名 EVMJ、實質威馳騰（Wisdom）嘅事故車完全係兩回事，佢係台日友好「清白期」嘅結晶。
【奇蹟還願：四度衝上都市高】
影完相幾個鐘之後，因為 AI Perplexity 俾錯櫻花情報，我反而喺當日完成咗場電力與柴油嘅終極對標。我全日竟然連續四次上落都市高速：
* 13:02 (302 號 EV 版)：跳上呢部台日混血 EV。換咗摩打後，喺都市高爬升時極之安靜、穩定。完全無大陸電車嗰種刺耳電機尖叫，反而聽到明顯嘅轉波聲。起步同上斜極之紮實，聽覺上直接後生咗 10 年。
西鐵巴士UD PKG-RA274TAN EV@302 天神北→那の津口 https://youtu.be/RR9zGrf1vbE?si=LPEeeb1YROzVItey
* 13:48 (306 號 柴油版)：回程抽中咗編號 7707 嘅班次。呢部係 2013 年 J-Bus 原廠 Hino Blue Ribbon II (Non-step)。同樣嘅都市高路段返博多站，呢部相對新嘅 J-Bus 喺上斜加速時，依然發出咆哮聲。原來 2005 年嘅老兵轉生後，聽覺上竟然比呢部 2013 年嘅車仲要年輕。
西鐵巴士Hino Blue Ribbon II 福岡200か2625@306 百道→福岡希爾頓海鷹酒店
https://youtu.be/Bhpdgo2e26w?si=lEb0Doj54d0zw65x
* 夜晚 301 號及 306 號 (天神北班次)：呢兩程坐入去充滿年代感嘅碎花布座位，先至肯定自己搭緊原裝柴油舊車。301 號我全程專心搵路；而最後一程 306 天神北班次，成為咗呢場考察中最驚喜嘅遺憾。根據下午搭 306 柴油版嘅經驗，由西公園上橋後如果係經希爾頓嘅正常班次，我有大把時間準備拍片；點知呢班天神北係喺另一邊落橋，成個過程係「一開始已經結束」，快到我連拎部電話出嚟嘅機會都無。呢種柴油老兵特有嘅「爽手」爆發力，就咁喺我嘅措手不及之中消失咗。
【跨地域嘅西工：佐賀街頭嘅久留米老將】
西工 96MC 嘅生命力唔止喺天神，更延伸到九州嘅田野間。
3 月 27 日，我喺佐賀捕捉到掛住「久留米」牌照嘅西鐵巴士(編號 9369)。呢架 UD (Nissan Diesel) ADG-RA 273MAN改底盤嘅 One-Step 巴士， 裝上西工 96MC B-I車身， 配搭最傳統嘅「赤地」復古色。原來呢個型號見證咗 UD 喺 2005年，領先全球試行尿素 SCR 系統 (AdBlue) 嘅環保野心。喺嗰個年代，呢架車已經係「技術先鋒」。而家睇返，嗰種保養好到完全無蒼老感嘅狀態，絕對係西工教徒眼中最正宗、最硬核嘅「原味」。
【視覺嘅修正：差點錯過的末代巔峰】
當我帶住嗰種「復古感」返到去福岡，我發現我對西工嘅認知需要一場視覺上嘅修正。其實早喺 3 月 22 日，我喺街頭已經見過呢類車（好似編號 9881 嗰架）。但因為佢換咗西鐵最新嘅白色塗裝，喺落雨朦朧下，雖然見到嗰對唔對稱嘅窗框同大燈，但遠睇只會令人以為係帶有三菱風格嘅 J-Bus，一時間冇即刻聯想到佢竟然都係西工。
3 月 25 日見完油改電96MC 之後，好快喺街頭見到 2009 年出牌嘅同款車 5966。
直到翻查資料，先至發現原來無咁簡單：原來呢批車正正係 2010 年西工解散倒閉前、技術最成熟嘅最後一波巔峰作（以 2008 年式 UD PKG-RA274MAN底盤為核心）。
雖然 One-Step 喺今日睇嚟係舊一代設計，但車頭嗰個輪椅 Logo 證明佢依然符合無障礙標準，令佢可以喺現代化營運中繼續出現。喺佐賀見到久留米車跑跨縣線，足以體現西鐵集團嘅營運規模有幾大——呢類由市內退居地方依然保養精良嘅老將，同天神嗰種「能源轉生」嘅氣氛形成有趣對比。
【結語：老兵不死】
25/3 嗰日，櫻花我只睇到一棵，但我實測到福岡巴士最真實嘅靈魂。西鐵巴士做到一個平衡：保留舊車，同時符合將來需要。只要識睇底盤、識聽摩打聲，同埋識搵路，你就係真正嘅福岡交通大神啦！
| 
