日本航空 777-300ER 豪華經濟艙體驗

*777，好耐冇見。

一年一度旅行，今年喺國泰80週年其間反而無坐國泰而係又坐JAL，除咗JAL里數飛唯英航Avios 系統最易換之外亦都考慮到英航Avios大幅貶值嘅死線，最終先定來回均為羽田，後續行程再慢慢決定。

時間：15:06 (15:16) - 20:24 (20:25)
日期：25MAY2026
航班：JL26
機型：Boeing 777-300ER JA742J



習慣提早兩個鐘到機場避免有任何意外，今次都唔例外，唯獨今次意外係臨出發之前收到Flighty通知當日日本出發航班JL29由787-9更改為777-300ER，地勤會喺check in時同乘客主動告訴機型變更，如果對系統自動安排嘅座位有唔滿意可以即場再安排，由於我坐豪華經濟艙同一個坐位編號係無變化所以無換座位，寄完行李就走人。


其實會揀特選經濟艙嘅原因除咗因為Avios大幅眨值死線急住換之外，本身里數係唔夠換來回商務艙，更重要嘅係日航豪華經濟艙係包括機場貴賓室服務，而香港機場合作伙伴係同盟嘅澳航貴賓室，呢個都係我一直都好想試嘅一點。


出發前先要換外幣，由於工作太忙根本無時間去唱錢，依家匯豐銀行搬咗落5樓抵港層之後終於有外幣提款機，咁就可以唱定錢去到機場再提款，其實一早已經要有嘅嘢係都要拖幾年搬位先做。


澳航貴賓空其實𠵱喺北大堂出境右轉就見到，好容易會錯過。


入到門口，除咗基本打招呼之外，確認資格會再講Mr. XX welcome ，呢啲細節係加分嘅。


餐飲嚟講澳航貴賓室都唔差，不過就唔見名物日式咖哩飯有少少失望。


油水其實唔算好多，呢點真係不及國泰。


揀咗幾款熱食，韓式年糕、羊肉同炒飯，炒飯唔係用泰國米或者日本米而係更細粒嘅米會食唔慣。




除咗自助餐之外會有人推點心車，豬肉燒賣味道唔錯。


時間差唔多就去廁所，準備去上機，其實疫情前JL26 JL29呢一對來回機係用777-200ER為主，自疫情同PW引擎連環不幸事件之後就主力以787-9飛，偶然會有777-300ER或者降級嘅787-8代打，今日有777-300ER最後悔係點解當初唔畀多少少上商務，日航盒仔商務都係我好想試嘅產品。


日航特選經濟艙777同787係用同一款產品所以機型變更唔係咩大問題，好消息係fixed shell 代表前面係無得挨後，壞消息佢係fixed shell代表張凳要調整角度會壓縮腳位空間。


上機時座位已經備好毛氈、耳機同拖鞋。


耳機係鐵三角，自己個位嗰隻已經爛咗個鉸位，不予置評。


大大枝閱讀燈。




安全資訊卡。




JAL特色，座位座品介紹卡，其實畀客人睇點用係幾好，但啲客其實都係唔睇然後搞一大輪先搞到。


如果對比近年國泰HKG<>TYO同艙等餐飲，其實國泰用非一次性器皿上餐喺印象上會比較好，餐點亦都比較好（好似係），注意唔係個個航只都係咁。講返呢個餐，味道上係唔錯keep到日航水準，不過不失。


唔好話我只係捉星宇，日航啲清潔都係有少少甩漏，呢個就關南環路大企業事。


食飽機艙燈光變暗變色睇多陣戲就差唔多到，日航個機上娛樂系統本身係弱項，再加上兩個位嘅耳機位都係壞嘅，不如都係算啦。


廁所有噴水功能，非常日本人嘅做法。


準時到日本，今次入境少於一個小時算係合理預期，台灣朋友坐ANA喺T2表示中伏要個半鐘先入到境。


行李嚟講麻煩唔好再吹捧日本，入境手續要一個鐘都未見到行李其實係偏慢，反而大家係接受唔到香港入境快要等半個鐘行李我係唔理解。Anyway 攞咗行李就盡快去酒店休息，第二日早上坐最早嘅航班去新千歲。