究竟係有機定係我傻仔?!

見咁多人問意見,我都想問問各位意見,希望大家幫幫手...

話說早排俾公司個同事搞到"舵舵零",心情都仲未平覆得切,又有新o野俾我玩啦...

之前我都有落Bar消遣o既,大約半年前,我o係某酒吧識到一位拳手(即係陪客人玩骰盅同飲酒),
老實講我係對佢有好感,but當時我覺得呢類"歡場女子'多數都係但求搵快錢,唔會有感情o既...

後來因為工作少"蒲"o左,亦無再同佢聯絡,各有各忙...

直至上個月,我同朋友再落Bar消遣,發現佢無做拳手,問其他人知道佢原來早兩個月曾經入醫院,
原因係飲得太多身體有事...

後來我打電話搵佢,問佢近況,佢就話轉o左做啤酒Promoter(著住套制服o係酒吧/酒廊Sell啤酒),不過就唔使飲,齋sell...

原本都無乜特別,不過尋日下午佢打電話俾我,佢話尋晚開始要去紛嶺開工(到星期六),收1:00!
問我有乜o野車可以出尖沙咀(佢o係o個度附近住)...

我原本話幫佢搵有乜車搭,後來把心一橫,決定走入去接佢放工!!!

到尋晚我去到佢番工o個間Bar附近,我打電話俾佢問佢收工未,佢話就走,佢當時仲話未問到
朋友點搭車而煩緊,我就試佢話"男朋友無o黎接妳咩?"佢話"傻啦,都無男朋友..."

跟住我即刻"出擊",同佢講"咁妳介唔介意我o黎接妳?",佢話"傻啦,你住九龍,特登入紛嶺咩..."

我就叫佢出一出門口(當時我企o左o係對面),當時佢一見到我就即刻嚇o左一跳,
話我係咪傻o左?我就話"唔通叫一位咁靚o既女仔自己搭車走咩..."

跟住我同佢走去坐通宵綠Van出旺角先食o的o野...

食o野o個陣佢不斷同我講工作上o既苦況,又講佢同o的姊妹o既八卦o野,最重要係佢講埋
佢同以前男朋友o既事,由過去點識到分手到擇偶條件都同我講,其間佢好多次都話
未試過同一個唔係太熟o既男仔講咁多自己o既事,都唔知點解...

後來我同佢坐的士返尖咀,其間佢仲講緊,同時又話好多謝我特登去接佢放工,佢話從未唸過
我會入去接佢...

問題o黎啦:我應該點做呢?!追佢定係繼續做傻仔?

你都係岩岩了解佢多左少少，
你係女仔，突然間有人咁樣追你的話，
你又會點呢?

當然係唔好行動住啦...

做事一步登天係大忌,
唔好咁快諗追唔追得過住,
熟絡左先算啦~

同佢溝通多d先啦~
不~過我諗個女仔對你印象應該唔錯...

俾我係個女仔都會好感動,
有人特地咁遠去接佢喎,
你一定唔係做緊傻仔啦。
佢對你好感一定有所增加。

不過都係o個句,
熟左先好諗追唔追啦。

你要明白有d 人既性格
係好易令人誤會
覺得自己係有機會做到對方既情人
所以你最好都係同對方熟落左
(最好去打聽下有關佢既野)
知道佢既性格係同背景係點
先決定去唔去追人

如果諗都唔諗就話去追人
就分分鐘變左追佢等如做傻仔
(小弟以前試過啦......)

[ref=300645]Ketsu[/ref]  在 2005-7-13 05:31 PM 發表:

如果諗都唔諗就話去追人
就分分鐘變左追佢等如做傻仔
(小弟以前試過啦......)

可唔可以同大家分享點樣由追女仔變左做傻仔呢?#???

各版友講得岩呀,真係熟左先好呀!
可能我睇到樓主話佢做過Bar,依家做啤酒妹,
我覺得同呢D女仔一齊俾唔到安全感你呀,因為要經常接觸男性,實有機會俾人聊佢呀咁!
如果同你一齊之後佢繼續做呢D工你都唔方心啦
我諗無個男仔鐘意做呢d工掛?

[ Last edited by winningmok on 2005-7-13 at 19:30 ]

都唔可以話係傻仔,你對她有好感,好自然會樂意好夜都入去接她放工,一般人都唔會這樣做啦(對家人or鍾意的人就例外)
事實上,做飲食業的女仔,會好多人聊.你可能有競爭對手,我暗戀果個拉麵店女仔也有男仔聊
你可以試下到她工作間吧到飲野,現在隔晚去,之後密d,晚晚去,嘗試同她熟D