請問大家支唔支持最低工資立法？

本人當然支持啦，起埋做快餐店Ｄ員工可以調整人工去到每小時＄３０。

唔支持立法,雖然自己係打工仔

因為唔相信立法後會保障基層市民獲得基本工資,
從MPF實施8年來都已經證明部分老闆為求慳少少
錢,強迫員工變成自僱人仕,逃避供款.假如香港一旦
落實最低工資,會趕走一班年長以至新移民出勞工
市場

如果真係要立法,真係要求僱主要保證年長或新移民
都可以受到保障,及重新引入集體談判權,保護工人利益

以下問題真係解決到的話，我一定支持，否則幫低收入工人等於害左佢地。

１．僱主會否將長工解僱，再請散工，逃避去供強質金？到頭來低收入士就業不足，收入更少。
２．人工高左，有得俾老細揀，點解仲要請年紀大或低技術人士？最後失業問題更嚴重。
３．會否令工人工時大幅加大，即使日後有標準工時也好，打工仔你情我願，你唔肯OT，大把人肯做。
４．公司某一項工資成本上升，會否拉低另一項工作的工資？
５．純以公司或香港角度想，各大公司成本上升，會否對香港經濟構成影響，若果公司大部份員工是前線較低收入人士，成本便會大幅上升，難保公司不會倒閉。

其實最低工資衍生問題好多，反對立法唔代表黑心、剝削，由幫人變害人，就不如不立法好了。

[ 本帖最後由 Fun_FC 於 2008-10-16 11:35 編輯 ]

我自己都好反對最低工資，
好老實講我覺得係一個願打一個願挨，
點解d無良僱主可以用咁低既工資請人，
我覺得某情況上係因為有人願意又好，
迫於無奈又好，總之就係有人肯做，
如果真係因為低人工而請唔到人既話，
我覺得除非個僱主事事親力親為，
否則佢請唔到人就一定會用方法吸引人做，
例如調高薪金。

反而強制立法，
一來可能好似上面板友所講，
會令低技術人士同年紀較大既人難以搵工，
二來對一d較小型既公司可能構成壓力。

無話支唔支持…但係自己搞過下生意仔，明白老細既角度點諗

先以守法既茶餐廳為例
樓面廿令蚊一個鐘，立法後加到三十幾，你認為啲老細會點？正常既老細會因為成本而炒甘一部份既人，留得底既人唔該做埋被炒人既工作；洗碗阿姐如果係兼職既，以前一日做五個鐘既，立法後咪一日做三個鐘囉，重點係唔該你三個鐘內做哂五個鐘既嘢
再用唔守法茶餐廳為例
人人都有工開，不過由立法果日開始唔會再有糧單、MPF等所有可以証明你係度返工既資料

總知而家既人工係市場決定出黎，收幾多人工交幾多功課就度都係，你時薪多左，唔代表工時會同以前一樣，但係做既嘢就同以前一樣甘多。立法唔會係所有人都加人工，的確係有部份人得益既，不過諗下自己會唔會係最低工資既檥生品啦。

原帖由 MEMPHIX 於 2008-10-16 18:08 發表
無話支唔支持…但係自己搞過下生意仔，明白老細既角度點諗

先以守法既茶餐廳為例...

面對金融海嘯, 好多小生意都會變得好難做, 政府而家唔單止無想辦法幫佢地渡過難關, 仲要想盡辦法令佢地百上加斤, 遲早香港會出現結業潮, 工人連份工都無埋時, 仲講咩最低工資.

到時香港只有李加乘旗下個D高毛利公司先至可以維持經營, 因為佢地可以壓低入貨價, 又可以控制一個高既零售價, 呢樣野中小企係唔可能做到. 當中小企無得生存時, 大集團更加壟斷, 到時最低工資所帶來既額外收入, 未必可以抵銷得到物價上升既幅度.

原帖由 PB602 於 2008-10-16 22:36 發表


面對金融海嘯, 好多小生意都會變得好難做, 政府而家唔單止無想辦法幫佢地渡過難關, 仲要想盡辦法令佢地百上加斤, 遲早香港會出現結業潮, 工人連份工都無埋時, 仲講咩最低工資.

到時香港只有李加乘旗下個D高毛利公 ...

不過政府會同時推出公平競爭法例，防止任何導致壟斷市場的行為（類似歐盟的反壟斷法），違規公司將面臨很重的罰款。
另外，最低工資早已於內地多個城市實行，例如深圳。

而最低工資的建議，其實早於七年前由樂施會委託當時城市大學社會科學系講師李劍明、黃洪的一份研究報告論文「困局、排斥與出路:香港「邊緣勞工」質性研究」(2001年2月)提出。作者在第七章的結論中，建議應設立最低工資，茲引文如下：

1.　改善立法及福利，保障邊緣勞工
由於邊緣勞工不受勞工法例保障，工作處境非常惡劣，成為苦勞工。而在生活上有面臨入不敷支的情況，成為貧窮勞工。加上近年社會福利及公營房屋的削減令邊緣勞工更處於困局之中。要改善邊緣勞工的工作及生活，首要工作是要改善勞工立法及社會福利，保障邊緣勞工權益，具體的措施包括：
1.1 設立最低工資，防止工資下滑
政府應成立勞資官三方參與的工資委員會，為貧窮邊緣勞工制訂最低工資，防止邊緣勞工的工資繼續向下滑，保障邊緣勞工家庭的基本生活。邊緣勞工有了基本生活保證，議價能力能夠提高，就可以防止資方的過份剝削如長工時、無休息日、無假期等情況，避免邊緣勞工成為「苦勞工」。政府並應首先在本身外判的合約中，加入「最低工資」的條款，避免現時在外判服務「價低者得」的制度下，承辦商為節省成本，將勞工的工資福利大幅削減至不合理的水平。
....(下略)

來源：http://web.swk.cuhk.edu.hk/~hwong/publication/Research_monograph/2001_marginal_worker_qulitative.doc
「困局、排斥與出路:香港「邊緣勞工」質性研究」，李劍明、黃洪，2001，香港中文大學


可見「最低工資」的目的是減少出現「邊緣勞工」的機會，以防止進一步被僱主剝削。

[ 本帖最後由 eric278 於 2008-10-17 09:42 編輯 ]

個人來講也不太支持最低工資，相信薪金應該由市場決定，有時強行立法，未必是好事，比如前日某大台新聞，訪問一位阿伯係餐廳送外賣，人工係$13一個鐘，我用呢一個想法就係為甚麼咁低的人工仲去做，無錯立左法，阿伯個人工立即調升至可能$30或更高一個鐘，但是職位仍是他嗎，反而應該咁想如果阿伯唔做呢份工，個僱主仲有沒有可能請到人呢，請不到人，就會調整人工，呢個反之為一個市場定律
另外一樣野怕就係究竟呢個最低工資會成為僱主心目中的最高工資呢，或者有部份僱主本身想出$7000請一個人，但最低工資只需$6000，本身就會想既然已經符合政府要求，為什麼要出那麼多呢?