點解巴士司機搞工潮會「按章工作」？

當巴士司機搞工潮
話會「按章工作」
即係做一大輪睇落擾民的野
逼公司讓步
如果這些是按「章」工作
咁你平時咪違章工作？

"章" 應是指僱傭合約要求的工作, 是一個最低要求, "按章" 就是只做到最低要求就算.

按章工作英文是work to rule
即根據規章去工作，不作規章以外多餘的事務
比方說車長工作規章要求埋站牌正車停，
好了，假若巴士埋站，站內剛好有其餘巴士，
而前面部巴士個屎忽剛剛頂住你部車，
導致你部車可能差一個馬鼻先至牌正車停，
平時，車長都會照開門上落客，
但按章工作時，佢理得你，跟足規章牌正車停囉！

嚴格而言，你可以話係平時冇按足本子辦事架...
只係有時規章係死，人係生，各自係安全情況下執生咋！

工業行動就一定擾民架啦，
目的就係catch attention，
逼使資方就範，就工人提出既要求作出回應，
所以我好奇怪點解D人成日話呢D工業行動「唔好影響到公眾啦」，
如果唔影響到公眾既，
問心講，你又會唔會去了解呢班工人點解要發起工業行動？

香港呢廿年最成功既工業行動就係八十年代既中華公司大罷工，
重間接令到中華公司既巴士皇國沒落！

香港唔敢罷工的
你要明白最大的力量係輿論壓力
你試下罷工阻住香港人番工. 睇下大眾插邊個先
冇人會鬧九巴唔加人工,只會鬧"巴士佬冇試拿事來攪"
睇下班的士佬想塞機場果次.比外國人會支持聲援
比香港人,上電視十個九個鬧. 最後點?不了了之lor.
連巴士司機按章工作都揀11點後玩3-4個鐘.

總之在香港.乜都假,你阻住大眾利益阻住地球轉都好.
話之你點比人刻薄.總之"係攪事攪遠d!"

在英國呢邊,條25號巴士線的司機上年先因為話要加兩鎊人工一個鐘,罷左工成個禮拜
條線仲係敝校的專線咁滯(寫明叫Uni Link),全個禮拜學校同最近的high street斷晒交通.
都係咁啦.最後仲比班巴士佬加到9鎊半一個鐘......在香港做個sales得25蚊個鐘(2鎊幾)

所以呢.,在香港,算啦.工業行動唔會成功.因為唔洗諗資方采唔采你先
唔好話罷工.就算你按章工作,如果你敢揀番工放工時間
第一個問題已係全港民眾已同你過唔去.你已係攪屎棍,你係冇事拿事來攪.你已唔洗玩.冇人會可憐

[ 本帖最後由 cn2661_2d32 於 2009-2-22 02:03 編輯 ]

巴士司機搞工潮唔攪按章工作都應該無乜其他方法可以引起社會回響
遊行? 個個輪班工作, 有幾多人可以去到? 其他工都話夜更訓少兩個鐘出黎遊, 但職業司機就無可能咁做, 訓得幾多得幾多
按章工作大多司機都有機會參與, 又保証有嚗光機會
其實而家d按章工作大多都非繁先攪, 又唔係個個參加, 影響都唔會話太大
d工會都知道攪得大只會令大眾覺得你唔抵可憐
就算你幾岩都好, 香港人見你阻到佢只會話你唔岩...

"按章工作"係巴士公司既荒謬, 因為員工不過係照足公司指引工作, 但結果竟然會擾民同埋可以迫到巴士公司響某D問題上妥協, 咁即係證明巴士公司自己都唔想員工跟足指示開工啦.

當真正「按章工作」既時候, 有幾多司機真係咁「忍」得丫
就算真係同平時渣車唔同, 到時只係比平時守規舉少少

我仲記得有次淨係新巴按章工作, 當日交通仲更加暢通
唔知係按章工作擾民, 定係平時呢間公司既司機根本就阻住人地行呢

澳州真係有將o的車全部收晒去開員工大會的...通常玩3-4粒鐘.

最受歡迎的工業行動係唔收錢, Sydney 玩過幾次, 但最後俾巴士公司叫停, 唔俾o甘玩.

原帖由 530 於 2009-2-22 03:08 發表
巴士司機搞工潮唔攪按章工作都應該無乜其他方法可以引起社會回響
遊行? 個個輪班工作, 有幾多人可以去到? 其他工都話夜更訓少兩個鐘出黎遊, 但職業司機就無可能咁做, 訓得幾多得幾多
按章工作大多司機都有機會參與,  ...

老實講，工業行動唔阻到人叫乜野工業行動？