有關澳門東亞運動會

唔知有冇貼錯板，如有既話，麻煩板務人員代我移走。

話說我阿爸阿媽上個禮拜四過左澳門，星期六返黎，因為知道有某D東亞運動會既項目早過開幕進行，
打聽完之後，知道星期六果日有場足球賽事係科大舉行，
老豆想去睇，但係唔知點搭車去。

好啦，係主要街道睇下有冇邊條路線途徑科大，
點知唔好話科大喇，連其他主場館都教人搭邊條巴士線去。
跟住打去澳巴問，熱線員話冇車直到，唯有係搭到去「乙水」仔轉的士。
我老豆唔信(咁大間大學冇理由冇巴士到架…)，
咁就打電話去金沙訂完自助餐之後，順便問埋，職員教佢搭 26A。

問題黎喇…
1. 點解攪咁大型既運動會，咁簡單既配套設置都做唔好既呢？
除左東道主澳門，一定會有其他地方既人黎打氣架嘛，
運動員同職員就話有穿梭巴士搭嗟，其他遊客黎到人生路不熟，
叫佢地次次都坐的士？唔係掛…

2. 澳門地方唔係大，巴士路線又唔係多，有人打電話去熱線問點去一個都算大既地方，
竟然答唔出口，而一個係酒店做野既人就識答，
會唔會有點兒諷刺呢？

[ Last edited by chickenbus on 2005-10-31 at 21:25 ]