[食評] 炒蛋熱潮蔓延到港島, o係華星冰室登陸!

相信如果大家去過佐敦果間澳牛食過炒蛋,
都知佢o既香滑炒蛋同又鬆又脆o既多士令
人再三回味. 當初我心諗唔會再有第間出現
同一類o既港式常餐, 不過呢個諗法最後畀
第間冰室推翻, 因為有間叫華星冰室o既港
式茶餐廳上個月o係灣仔開幕.

據我所收到o既資料, 華星冰室o既老細係
由一位曾經o係華星唱片公司工作o既員工,
難怪當我一入去o既時候, 牆上所掛o既都係
華星時代歌手大碟o既封套, 尤其係蘿記同
哥哥o既唱片真係令人懷念. 佢請o既員工當
中, 有部份係由澳牛過檔, 所以華星冰室所
賣o既同澳牛絕大部份一樣, 不過佢冇燉蛋
之類o既甜品. 至於佢o既環境, 或者係開o左
冇耐, 感覺仲好新淨, 而且乾淨, 員工都好醒
目, 不過就冇澳牛果陣咁緊張.

我同屋企人點o左兩份常餐, 都係炒蛋多士
同叉燒意粉, 不過伙記話有得轉牛通, 我就
揀牛通代叉燒意粉. 牛通o既湯料同澳牛幾
乎一樣咁o既味, 多士鬆脆唔硬, 至於炒蛋就
更加唔駛講, 好滑. 講起炒蛋 據聞澳牛用鮮
奶加蛋o黎炒, 而華星冰室標榜用北海道 3.6
牛奶, 或者佢o既炒蛋加o左北海道 3.6 牛奶
o黎炒, 一樣咁滑, 不過奶味幾乎冇, 呢樣至
o岩我呢類對奶敏感o既人啦!  另外常餐轉凍
飲, 澳牛同華星都加兩蚊, 不過華星o既凍飲
抵好多.











我點兩份常餐之餘, 嗌多份奶醬多, 比較厚...



o恩, 希望等埋 2ac o既食經就好嚕.

[ 本帖最後由 a396 於 2010-2-2 20:07 編輯 ]

杯凍飲大過澳牛多多聲
啲伙記服務如何？有無好似澳牛咁？

澳牛啲蛋係好食，不過咁既服務真係唔會幫襯
既然呢間同澳牛差唔多質素，搵日去試下先

o的伙記快得o黎唔會咁緊張, 埋單果陣,
佢寫落紙仔o既銀碼好準. 不過要留意嗌
完份餐之後要等耐少少.

係呀, 要留意埋收銀處附近o既簽名板,
至少有兩位藝人簽過名.

記得報章提過開張0個日好似有好幾位藝員歌手到場
所以塊簽名板應該唔少簽名

如果我記憶無錯 其實佢大約一月頭至一月中已經準備完畢
當時我行過見到裝修咁似舊式冰室都嚇0左一跳
不過怕消費貴(三、四十蚊0個隻)所以無咩點停留
但係就留意到招牌個「華星」嘜頭

或者過幾日可能再去灣仔0既時候試一試

睇落都幾大份，夠唔夠飽呀？

原帖由 doraemonc 於 2010-2-3 09:23 發表

睇落都幾大份，夠唔夠飽呀？

我覺得夠啦, 如果唔夠好似幅相裡面o既
奶醬多咁, 加多 $6 一份就得.

在我上班的地點附近，而且開到11:00，放工去食先～

係唔係在英皇附近??

原帖由 HG6729 於 2010-2-3 19:13 發表

係唔係在英皇附近??

係英皇附近.

原帖由 HG6729 於 2010-2-3 19:13 發表
係唔係在英皇附近??

地理上就0係英皇對住
正確位置係克街(灣仔道與莊士敦道之間0既「正中間」)