講下自己新牌撞凹架車的經歷

嚴格黎講我就試過兩次，兩次都係渣住Hiace。
第一次係兩個星期牌，入廣源村車場上二樓，
係轉右彎上橋位偷得唔夠，一扭，噢，"硬"左
埋舊兩尺高石屎躉度，舊石屎躉已經油晒黃黑
間，而且傷痕纍纍，睇黎好多人都中過招。

落車一睇，右邊中窗下幅凹左三尺乘一尺，報價
整返要二千幾，最後冇整到。

第二次係新蒲崗雙喜街，當時差唔多一年牌，停
車係路邊熄匙等人，驚見對面錶位諗住開車，就
渣渣林撻匙入後波，仲要俾大油，結果就bomb 一
聲撞左埋去後面架NPR度，我隻尾門車牌位以下
凹晒，尾門都開唔到，NPR 竟然只係甩左塊車牌 !
最後賠左$100俾個貨車司機造返塊車牌算數。而
我架車，整左千五蚊.....

我個車尾明明已經係路口，我都覺得好奇怪點解
後面會有車，不過都係自己衰大意累事。

兩次小意外經歷，我都好幸運，第一次只係撞到
自己，第二次就貨車司機好人冇屈我，佢有權屈
到我死都得，我亦咁岩有行家起附近過黎幫手。
不過就想講下，新牌出黎，無論小心定唔小心，
都總要交ｄ學費當學下野既。

有一次楂住架Lexus ES300,因為果陣岩岩考到牌,
係元朗試下楂,點知自己個心太熊,入灣果陣快得滯,
有意識踩迫力果陣已經太遲...,撞左埋路邊一部貨車死車度
不過好彩我撞埋佢度果陣都唔係好快,架ES300頭蓋花左同少少凹

小弟就仲未有撞到要整的經驗...(有的話小弟都唔可以再駕車...)

小弟年頭出牌至今, 唯一一單就係係翠林邨後山落斜時撞到隻狗...
個次真係冇陰公...一路已經見到有隻狗係慢線, 收晒油行快線過..
車頭一到, 佢就走出來...dup停扭晒軑, 都撞到佢一野...
之後佢就唔知走左去邊, 我部車盞霧燈就移左位, 車牌有條痕..
返屋企整返盞燈就冇事lu....

[ref=425338]arhang2001[/ref]  在 2005-11-20 01:17 AM 發表:

嚴格黎講我就試過兩次，兩次都係渣住Hiace。
第一次係兩個星期牌，入廣源村車場上二樓，
係轉右彎上橋位偷得唔夠，一扭，噢，"硬"左
埋舊兩尺高石屎躉度，舊石屎躉已經油晒黃黑
間，而且傷痕纍纍， ...

廣源村個停車場真係好有問題
果次渣我架思域入去一上第一條斜已經覺得好有問題
仲要一二樓 full 晒迫著泊三樓
咁岩果日係星期日，打著死火燈上橋時都攪左好耐
後面排晒隊都無"咇"