現今歌ge問題

雖然我係一個90後 但係舊歌我都好鐘意聽
發覺現今ge歌 99%比唔上舊歌
以前ge歌 押韻好好 好易唱上口
而且d歌詞係好有意思
經典作有獅子山下 千千闕歌 等等
我認為現今樂壇 有意思ge歌 已經越黎越少
就連黃偉文 林夕都開始寫唔出類似夕陽無限好果種ge感覺
現今ge歌 往往只係為左"出歌""交差""唱得出口"就算
但係歌詞 音韻 好多都草草了事 令左首歌根本就冇左意思

唔知各版友 對現今ge歌同舊歌有咩感覺同意見呢??歡迎提出

[ 本帖最後由 回憶的呼喚 於 2010-3-20 01:45 編輯 ]

小弟認為創作飽和算唔算係因素之一呢?
勵志歌的確係少左
情歌其實都可以好好, 好的情歌, 如呷甘醇, 繞樑三日
例如較耐之前的「每天愛你多一些」就係一個好好例子
「你的名字我的姓氏」亦如是
基本上婚禮場合此兩曲經常出現
不過會不會聽見婚禮場合會出現什麼「插班生甲動作很流華」呢?
「流華」... 當初我真係不明所已
竟然是「流暢華麗」, 及後更成為一歌星的花名, 將錯就錯
仲話填詞果個人好波
又講下第首什麼「金箔印著那位他」
「箔」字應讀「薄」,不是「撲」
如果讀「薄」的話就會唔岩音
但係又過到骨
(以上舉兩例的歌係邊d人寫, 不妨找找, 提示係樓主講過既)

交貨固然係一個理由
但係交貨同埋質素似乎係兩碼子的事
除非係上頭要求極之嚴謹, 例如一日內起貨之類
(講真, 講到要催人起貨既, 佢都唔會理你寫到乜架啦, 只要賺到錢隨時寫粗口都得添, 唔咪講笑架, 某樂隊便是)
否則其實質素的維持, 應該係一個創作歌曲/ 填詞人的責任同份內事

當日, 「越問越傷心」
當日, 「別笑我, 我犯賤」
看來只得回應一句「做只貓做只狗不做情人」

以前ge歌 可能出得比較慢
但係所謂"慢功出細火"  一首受歡迎ge歌曲
一定要花好多心思 填詞者同作曲者要互相配合
先做到一首絕配ge金曲
現+所謂"勁歌金曲"
冇邊幾首可以叫"金曲"
最多只係最多人投票 但實際效果如何 大家有目共睹
無意義ge歌曲 真係令人覺得會煩悶
唱完一輪 唔知佢唱緊咩ge 首歌冇意思講
唱ge如讀書咁讀歌ge 大有人在  點似得以前d歌星 真係100%投入首歌ge世界
用首歌入面ge感受唱出黎 去感動其他聽者呢...

自從香港填詞界出左黃偉文同林夕呢兩個人之後,
流行曲歌詞變到越來越狗屁不通,
首首都玩暗喻, 玩硬堆砌, 玩到走火入魔,
想講A, 又要借B來講,
扮高深, 扮有文化.
一首歌要做到大眾化,
歌詞應該淺白直接, 人人易明,
而唔係世界Key, 冇難度,
個個曉唱唔走音就算.
難怪香港流行曲自90年代後,
一面倒向30歲以下聽眾傾斜.

乜「劉華」唔係未有某歌之前就係劉德華花名咩？
我真係一直都唔知歌詞係寫「流華」。

所以呢，唱片業萎縮，盜版及下載都不是元兇，唱片公司高調打擊，實在自暴其短。
先有盜版，後有下載猖獗，歸根究底，就係消費者認為這些歌曲的質素，不值錢掏錢買。
至少我係咁，我只會買<[喜歡的歌手]and[試聽過or睇過歌詞]and[會引起共鳴or有興趣]>的專輯。
<>內使用的是boolean。

睇下某些歌手（應該稱為「歌唱家」）的演唱會，上千元都有人入場睇，
但一些所謂歌手，佢隻碟即使正版收十元八塊我都唔會買。

現今填詞來來去去都係黃偉文林夕，林夕都講過，佢交唔交到靚貨，
都好視乎佢覺得歌手唱唔唱到佢的意思出來，如果佢覺得填得好都係被蹧蹋，就交頹貨算。
黃偉文亦都有一些發人深省的歌詞，但更流行的卻是一堆垃圾。也許有怎樣的聽眾便有怎樣的歌曲。
（溫馨提示：慢功出細貨）
我而家聽歌，都只係聽欣賞的歌手，全世界加埋，不超過五個。

香港某唱片公司我係全部抵制。假如Beyond年代香港冇樂壇，
到了這間公司當道（即係而家），香港樂壇（以七八十年代的標準）就係蕩然無存永不超生。
以唱片公司為主導、捧紅名不經傳二打六的做法已經過時，但各大唱片公司仍然抱殘守缺，
沒有從根本解決歌手及歌曲質素低下的問題，也沒有努力發掘及栽培有天分的人士，我只會話佢地抵死。
出隻碟，包到成隻糉咁，送呢樣送箇樣，又話賣大包又盛，係咪正正反映歌曲空洞無物？

一蟹不如一蟹，而家就覺得2000年代初的一些流行歌曲還是挺有意思的，可惜唱歌的卻不能大紅大紫。

[ 本帖最後由 DIH 於 2010-3-10 10:36 編輯 ]

原帖由 bustop 於 2010-3-10 10:04 發表
自從香港填詞界出左黃偉文同林夕呢兩個人之後,
流行曲歌詞變到越來越狗屁不通,
首首都玩暗喻, 玩硬堆砌, 玩到走火入魔,
想講A, 又要借B來講,
扮高深, 扮有文化.
一首歌要做到大眾化,
歌詞應該淺白直接, 人人易明,
而 ...

林夕差我又唔多覺...
起碼九十年代佢既歌詞都作得好
起碼lee首歌我覺得佢寫得真係好正:天大地大
一首快歌寫出一個咁富哲理性既歌詞
實在少有
仲有:不如重新開始
「生命是否是天黑等到天亮
我卻太害怕　以後亦是同樣」
同一樣地正得很
高深咩?我又唔覺
有時詞太淺白既
反而對首歌冇好處,冇左一種耐聽既感覺
因為你一個淺既歌詞唔會有一個空間俾聽既人去諗
只係會令人易上口,但冇實際意思
此反而是大問題,多於首歌易唱

認真我覺得最正既填詞人
我會選擇林振強
喜歡既除左佢歌詞真係填得好外
仲要唔會過火,但又會令人留下深刻印象

再講遠D
現時歌手真係冇咩值得我自己去迷時
我當然唔會去買佢地既碟
就算連Down都唔會Down
但相反,我真係鐘意既歌手
我真係會買佢既碟放落Hi-fi到聽
唱碟公司成日話人地非法下載影響到人既時候
點解唔諗下根本你隻碟就唔值得我買
有D下載都晒我時間呢?

[ 本帖最後由 Snoopy@FB8617 於 2010-3-10 12:12 編輯 ]

其實陳奕迅、方大同、張敬軒、藍奕邦、林一峰都值得買碟聽

有時唔好淨係著眼一d偶像派歌手然後就話樂壇冇好音樂，
近幾年已經冇偶像派歌手受力捧兼可以跑出

現時樂壇已經好過2000年代初，
當年真係主力捧偶像派歌手，
多少好歌手好音樂被拒於門外

回#2
記憶中歌詞真係寫"劉華",而唔係"流華"

其實成首歌可唔可以長留心中
作曲,填詞,編曲,監製,甚至歌手都有一定關係
近年作曲人,唔係涉嫌抄歌(e.g.雷生)就係melody太K/冇乜起伏(e.g.伍生)
咁試問又點可以吸引到人?

填詞人方面,不得不承認前人的確係好好
隨手講起都一大堆,e.g.林振強(小弟最愛), 黃霑, 鄭國江...
依家來來去去都係林夕同黃偉文
(黃偉文自從攞完填詞人獎之後已經明顯減產)
新填詞人咩?得林若寧似d樣(不過都好睇彩數)
其他好多所謂填詞人填完都唔知佢想寫乜(e.g.戒男,冇記錯填詞人係因葵)
咁又點令到聽眾想聽?

編曲方面,依家d歌嘅arrangement基本上都係差唔多
隻隻都係咁上下,好難搵到一隻真係鍾意嘅去聽

監製方面就唔多講喇...電腦執音越嚟越勁
唱得唔好,執個音同你執
造就咗一大班只可以聽碟而唔可以聽live嘅歌手湧現

歌手就更加唔使講,依家所謂歌手
有幾多真係學過唱歌先出嚟唱?
十個有一半都係所謂model轉型做歌手
d歌手吓吓破哂音(走音已經算"好好" =.=)
<經典例子: 傅小姐, 鄧小姐>
又難怪大家唔想聽ga wo...

甚至可以講
九十年代頭既歌俾現時既更為前衛...
都真係幾可悲...