[客源探究] 其實為何元朗<->市區的巴士線特別多人坐？

小弟並非元朗居民，不過經常要出入元朗市，小弟發覺元朗
大部份往市區的巴士線(例如：68X, 268C, 269D, 968, E34)，
即使在非繁忙時間(如晚上21:00後)出市區方向，均是比其他
新界地區類似性質的巴士線好客(268B果d就例外)

例如968，夜晚8點打後平均都仲可以坐滿30-50%出港島，尋晚見10點出港島的968平均坐滿七成，
相比960在相同時段/方向，每班平均不足20人的客量....

例如68X，有時坐洪水橋尾車出九龍，平均都有30-40個客(試過有次假日坐68X尾車是坐滿出九龍)，
相比起87D出九龍尾車(通常不過15人)

例如E34，經常見夜晚11點打後都仲可以企人入東涌，比較E42路線在相同時段往北大嶼山方向客量
只是一般，事實上E34就大部份時段都很好客，E34可說是由朝爆到黑

小弟在此請教各位站友：
1. 為何元朗<->市區的大部份巴士線在非繁忙時間還是比其他新界地區類似性質的巴士線(例如如晚上21:00後960 vs 968出市區方向)特別多人坐？
2. E34真係好多客，可說是龍運巴士客量最高的巴士線，幾乎全日都客似雲來，元天地區真係咁多人去機場返工？為何E34咁多人坐？
3. 即使相比沙田/屯門地區出市區，過晚上10點後出市區的巴士線客量接近拍烏蠅(反而往新界方向的巴士線如263,269D,798客量還不錯)，
元朗其實有何獨特之處？令非繁忙時間都還有不少人坐車從元朗出市區？

PS：話說小弟昨晚11點左右坐968尾車出港島，上層竟然還可以坐滿八成，行到三幹時看到同樣出港島的960上層坐得幾個客，
覺得幾奇怪，所以有興趣了解

[ 本帖最後由 volvo_chan 於 2011-8-15 20:54 編輯 ]

我都唔係住元朗果頭，
但係個人覺得元朗線好客既原因，
除左因為元朗市果幾個巴士站都算係人流密集既位置，
同時元朗既部份村落 / 錦繡 / 加洲花園等等都可以 (或者講幾乎一定要) 經元朗市巴士站轉車出市區。
因為除左無直車之外，元朗大把車比你揀，去邊都好方便。
於是，每度都有幾個客去元朗市轉車既情況下，
元朗市各個巴士站就成為中轉站，人流有咩理由唔高?
e.g. 錦繡 <> 旺角，搭村巴去到元朗廣場轉68x算係最快既方法。

相反，用樓主既馬鞍山/沙田做例，
條條村人流都較散，住係村落既居民又唔會點轉車去谷行一條線既客量，
於是只有巴士既定線去遷就乘客，但係變左又無咁直接，較為兜路 ，
(e.g. 87D 兜曬馬鞍山之後仲要去沙田先上公路，比人印象已經係慢)
所以客量點都無咁元朗線咁高。

同樣，屯門都係。

所以，總括黎講，小弟覺得元朗線客量高既原因就係：
元朗線可以係元朗心臟地帶直出市區，唔駛兜曬咁多條村。
相反，其他線要由總站兜兜兜兜兜，兜曬若干條村 / 地點先上公路，
客量當然無咁高喇
[呢個亦都係有部份人點解情願搭MTR既原因]

其實會唔會係因為西鐵唔可以直達市區中心地帶所致呢?當然E34應該係可以直達大嶼山唔使出南昌轉東涌線,所以先會多人坐....

原帖由 FS7418 於 2011-8-15 06:39 PM 發表
其實會唔會係因為西鐵唔可以直達市區中心地帶所致呢?當然E34應該係可以直達大嶼山唔使出南昌轉東涌線,所以先會多人坐....

唔多唔少都真係關西鐵落唔到市中心事啦
巴士基本上條條都落到大馬路
咁當然唔想轉車都係一個原因
樓主提及68X,268C,968等
都係要轉車先到
同埋元朗去中九龍/東九龍/中上環搭MTR都係比巴士貴(學生除外)
E34一條線做晒元朗天水圍當然多人啦
如果入機場你都唔想拎住d行李轉咁多次車啦

E34 日爆夜爆係同好多元、天居民均於機場、東涌上班有關
而且機場好多機構行shift  ，所以先有得日爆夜爆

同時...唔好睇少大棠呢個區，好多居民的
朗屏附近的橫洲都係

樓主呢個post同香x討論區巴士版某個講968的post唱晒反調喎
因為果個講968係咪賺大錢的post,
好多網友一味講968只係單向多人, 而唔係好似樓主所講雙向多人,
不過我就較認同樓主的觀察, 因為我都因工作關係而經常於平日出入元朗,
有時同親戚食飯而有機會搭下968, 269D等路線,
我就肯定968非繁時係雙向好客果隻,
雖然其中一個方向明顯較另一方向客多,
但起碼唔係其中一個方向得小貓三四隻, 而另一方向企滿人咁
例如平日非繁時接近中午時段, 968往市區方向仲係至少坐滿上公路,
往元朗方向都仲坐滿一半或間中連非12米直梯車都坐滿7-8成,
而下繁往港島方向就算每9-10分鐘一班,
都可以一部金豬坐滿7成座位+過左大欖隧道要企位
(所以有D人以為968過左元朗都唔多客就以為少客出港島簡直大錯特錯,
我都係放工時段搭左幾次968先知原來大欖隧道的轉車客都唔少,
當中可能包括279X轉968的客都唔定)
相較鐵路, 968的優勢係車程與鐵路相差不太遠
而又有位坐(元朗市上車), 唔駛轉車,
坐西鐵轉東涌綫, 係南昌站行上行落都唔算麻煩,
最麻煩都係去到香港站要行返上環段路
(所以我有幾次放工時間坐968往港島,
發現上環信德中心係好多人落車)
而非繁時更加唔駛講...東涌綫的疏落班次更易令元朗客搭返巴士算數
(就算搭鐵路, 去尖東站轉荃灣綫仲化算, 除非目的地近香港站)

至於E34多客原因, 本人相信同另一條線王B1一樣,
都係做獨市生意而服務範圍龐大(元朗+天水圍)
E34平時已經多返工客, 而近期更因暑假而多左一批外遊客,
(傳媒成日講天水圍係咩悲情貧窮都市, 其實都係主要係天水圍北je,
天水圍南早已發展成形, 再加埋元朗,
起碼有一批為數不少有經濟能力定期外遊的居民
(相信yoho town等住宅陸續入伙後,
有經濟能力定期外遊的居民數目會穩定上升,
屆時E34應該會更多客搭)

至於整體上元朗往來市區巴士線特別多人坐,
我認為同大埔往來市區巴士線都有少許相似之處
(商業+工業區, 平日上下午繁時有通勤客,
其餘時段仲有購物+飲食消費客,
(尤其元朗好多食肆, 又有不少糖水舖, 所以晚晚市中心都好旺場)
再加上人口集中, 巴士線亦毋須兜路先上得公路,
不少巴士線的車程與全程鐵路比較相差不遠或更快,
所以巴士線係元朗仍然有相當吸引力
(有獨市位果堆巴士線吸引力更甚, 如B1, 276/276P, 64K)
即使部分地點與鐵路重疊的68X,
都仲可以靠鐵路未能一程直達的地點搵食,
例如本人放工時間搭68X往市區,
全車企滿人進入大欖隧道, 去到市區本人觀察落客情況,
發現客量平均分佈在美孚至深水埗, 以及太子至旺角兩段,
當中以美孚至深水埗一段的客量最多,
而過左旺角後, 全車已經得返好少客
(好明顯要去到油麻地及佐敦, 68X的車程已經同鐵路相距較遠,
吸引力已明顯下降)

原帖由 ES464470X 於 2011-8-15 20:38 發表
樓主呢個post同香x討論區巴士版某個講968的post唱晒反調喎
因為果個講968係咪賺大錢的post,
好多網友一味講968只係單向多人, 而唔係好似樓主所講雙向多人,
不過我就較認同樓主的觀察, 因為我都因工作關係而經常 ...

元朗算係新界線雙向客最平均的地區了(當然沙中89都不弱)
始終元朗都算係新界最繁榮的墟市
商業活動算最發達(可與之匹敵的是荃灣)
睇下夜晚十點大馬路依然人來人往
大埔墟/石湖墟已經開始鋪頭關門,人流減少就知
加上元朗巴士站位置正
直中大馬路心臟位
自然多人搭車
只可惜近年68X/268B而家都越來越難等就算968班次都不太能應付需求

假日銅鑼灣要企都唔出奇
搞到送客比西鐵遮

[ 本帖最後由 ksmbh 於 2011-8-15 20:48 編輯 ]

MTR美孚轉車段路行過一次都怕

出旺角/深水埗都係68x 好
之不過68x 感覺上比以前疏左

好幾次見到頂閘飛深水埗

我容許講下現時情況

268C方面，平日早上去元朗就得20/30個客
相反假日就接近坐滿

講到點解元朗<>市區各條路線會更多人坐，除了上面提及居住地點因素外
還有元朗週邊地區，如恆香老婆餅工廠，假日會有遊客慕名而來
另一方面，還有大棠渡假村、大欖郊野公園
老實講，想去大欖郊野公園的話，經屯門轉車的話，在大欖總站下車行去郊野公園入口都要找得好辛苦下，元朗轉車會較方便一點，在總站下車會較方便點
我見部份帶住一袋露營用品上往元朗巴士線，包括68X,268C呢d線。估計都是經元朗轉車。
農曆新年期間，肯定全車爆滿。因為部份住市區的人會去新界d圍村拜年。
分分鐘一架車都好難上

元朗直頭係旺角、觀塘級數的市鎮。
本身及週邊既有密集的住宅及工商業區（旺角側重商業、觀塘側重工業而元朗就有工農業），
消費娛樂場所亦甚集中及興旺。
所以全日都會有人流。