[忍無可忍] 九巴 215x 班班頂閘唔清客

今次又係東九線王 215x。

呢條線快過港鐵九條街早已街知巷聞，
繁忙時間兩邊方向接近尾站（創紀之城、香港理工大學）等兩三部車基本上係預左，
都唔會因為咁樣而走去投訴。

平日夜既 6 點鐘左右，
撞正尖沙咀放工時間，o係 Poly 要等兩三架先有一架埋站都算正常，
等半個鐘先上到車間唔中都會發生。
通常去到 6 點半 Poly 放學高峰時間，尖沙咀班放工客已經清得七七八八，
6 點半打後通常去到 Poly 都唔會班班飛站，就算無一班車可以清得晒條龍，都叫有返咁上下人上到車先。

但今晚真係忍無可忍。

我 6:15p.m. 就去到 Poly 個站等車，
當時我大約排第 10 左右，等左無耐就有第 1 架頂閘 3AV 經過，飛站。
再等，放學時間到，人越黎越多，但有車頂閘飛站，下架照樣係豬紙列出最疏既時間先黎，
唔駛問下架 ATE 又頂閘飛站，大家眼望望，當時大約 6:25p.m.，大家仲好好老脾。

繼續等，條龍又長o的，長過個巴士站，
今次差唔多 6:40p.m. 先再有車黎，係 ATR，又頂閘飛站。
如是者第 4 架車都到，可惜又再飛站，
條人龍就越黎越長，最長時幾乎排到漆咸道南燈位。

之後大家等到唔對路，隊尾既人就開始見有 28 都上，
再等落去，無車，連頂閘但肯埋站既 5 都有人變節上車，再落去 5c 黎都有人衝上車，
甚至連上火車站既 81c 都有人照上。

等到 6:55p.m.，第 5 架頂閘黎既 3ASV 因為有幾個客落車，
所以司機開左門，夾硬執左幾個，連門都閂唔到，夾硬閂門走。
之後又好耐無車黎。

去到呢個時間好多人已經等左半個鐘，
於是無論 5、5c 定 28 再黎，班班都有人唔理照上車，甚至有幾個客都頂唔順直情即場截的士走人，
明明成個鐘頭 215x 只係載走過幾個客，條龍不斷有人黎排，但就越排越短，完全係趕客。
過左 7:00p.m.，第 6 架車到，又飛站，
之後就過左 7:15p.m. 先再有第 7 架車到，又飛站。

最後去到 7:20p.m.，終於有架 3AV 空車由柯士甸道私牌過黎，
上完 Poly 同山谷道兩個站就打爆返觀塘。

今晚計返我足足等左 65 分鐘先上到車，
65 分鐘入面，頭 7 架車只有 1 架上過客，其他 6 架全部飛站。

65 分鐘 8 班車，平均每 8.125 分鐘一班，雖然符合編定班次 5-9 分鐘一班，
但根本就完全清唔到客。
等到你有救兵黎，都 7:20p.m.，6:00p.m. 開始就班班打爆飛站，6:30p.m. 條龍都差唔多排到燈位，
你成個半鐘之後先派吉車黎清客，7:20p.m. 去大學門口清客，有客既話班客都座底等左超過半個鐘啦，
你估真係次次成籮客都要忍你成個鐘架咩？

最唔忿氣係：唔等 215x，搭同站其他車去轉車，所有人都要俾多左幾蚊車費，
即係話九巴提供垃圾服務，出唔夠班次，你頂唔順轉車佢反而賺得更多，咁做咩要出齊車？
最慘係同站連 5 號呢段時間所有班次都係頂住閘黎，分別只係每班車仲可以夾硬執幾個，215x 係爆到尾軸徹底飛站，
最密既 5c，反而最少人搭，但一個鐘真係黎左十幾架，無邊架要企。

投訴又投訴過，
又請過投訴組數車數客，最後數完話加班，真係加左，你話佢出唔足車但又符合豬紙班次，
但咁耐以黎情況完全無改善過，
反而越黎越差，係咪真係除左改搭其他車外，就無晒辦法？

老實咁講，哩個問題真係成日都有人回帶
但問題愈黎愈嚴重既時候，點解九記唔去諗下對策呢？

我睇完你篇文，我覺得如果喺1A同603各出一架車柯打，當然以臨時加班車名義由理工大學起載，我諗基本上可以解決到問題
但偏偏九記唔做哩樣野...

[ 本帖最後由 JT4686 於 2012-1-19 00:08 編輯 ]

我見過 215x 有麼地道起載既特車，
但呢班特車，去到加連威老道已經打爆左，對 Poly 根本一o的作用都無。

其實係咪可以開一班半空車，例如 6:20p.m. 由九龍站開，
之後就經柯士甸道直去 Poly 先再載客，列埋o係豬紙，至少大家知幾點一定有架上到既車，
自己就時間去搭，好過一齊呆企成粒鐘，等你施捨架空車過黎。
呢o的理工起載特車依家唔係晚晚都有，好彩就有，如果今晚唔好彩無，
單靠尖咀上剩既位，我諗 8 點都未清得完條龍。

我相信215X班次不穩既元兇，會係「根本冇車返到九龍站」
頭先七點幾坐98D返將軍澳果陣，見到對面係車海215X
有架直頭係唔夠十個客行漆咸道南尖東連13X都冇車返，98D都踢左最少兩架車
再數返轉頭，上幾個月又係有一次等左一粒鐘215X
個司機係話「行左兩個鐘都未返到總站」，而當日機隧曾經間封

如果真係塞到過鐘而脫班，我諗除左車務上安排固定踢車
又或者o係必要時即刻抽尖碼D 1A救命之外，已經冇其他有效既解決辦法
除非大家有方法搵到架坦克返泥碌扁晒全香港D私家車…

[ 本帖最後由 ~誰@359~ 於 2012-1-19 00:19 編輯 ]

其實呢個問題由我第一年係 Poly 都已經經常出現
試過係行上多個站搭,上到車,要企
一係就行去 hall 果邊搭 15
其實計返等車條數
其實都係差唔多
搭 15 仲要有位座,有得瞓 ~
所以我放六走,多數都係行去搭 15

講開 215x
係山下等 98D 仲火滾.....
平時八點~九點果陣已經三架 297 先一架 98D
今朝仲正,半個鍾先來一架 98D, 九點九上係欣明上車已經企係錢箱到

臨到歲晚.似乎好多人挫假收車
**另外分享係 215x 係咪有d 字軌變左新人字軌?
手車真係安全到呢
上個星期六係 poly 等 215x 尾車
等左成五個字先有車 ==
一上車就知唔妥 ==...

[ 本帖最後由 EF107 於 2012-1-19 00:25 編輯 ]

下次建議試下圖文並載SEND哂比區會,交通投訴組,九巴...
比人知道相關情況

我諗有D野已經唔係出唔出齊車既問題
而係香港已經越整越塞車
出多十架車都未必幫到D咩
因為就只係塞死晒係到

搵1A臨時調走215X做理大特車？得，日日搵車務督察註站/查機睇215X九龍站回車情況
但佢地會唔會同你做哩D野，我覺得又無咩野可能...

而另一個方法，開一D定點柯打就已經解決到
只係用私牌既時間補返塞車既時間咁解，因為塞幾耐大家心中有條數
無塞車咪擺香港理工大學個站(5號尖碼嗰個)候命，有塞車咪即到即做，一樣行得通架

[ 本帖最後由 JT4686 於 2012-1-19 00:40 編輯 ]

而家個問題係條路太多私家車, 多到塞死哂堆主幹道, 九巴可以做到幾多野?
215X 行經既觀塘道、東九龍走廊、漆咸道、廣東道, 全部都係塞車熱點黎
尤其而家年尾, 大把人揸住架私家車出街, 塞車情況更加嚴重
D 215X 全部響中間塞死哂, 根本返唔到站頭, 站頭一架車都冇, 踢乜車出去載客?
就算有車到, 都係踢去D大站起載, 好似新港中心、漆咸道南, 理工呢個站肯定係次選

原帖由 JT4686 於 2012-1-19 00:25 發表
搵1A臨時調走215X做理大特車？得，日日搵車務督察註站/查機睇215X九龍站回車情況
但佢地會唔會同你做哩D野，我覺得又無咩野可能...

而另一個方法，開一D定點柯打就已經解決到
只係用私牌既時間補返塞車既時間咁解  

最爽既係九記CS食飯時間就係撞正脫班時間
想打去CS插佢，插到佢即刻抽架1A過泥都冇機會

塞車時間就係煩在日日塞既時間都唔同，根本就冇得估
亦冇理由因為咁而要將一單時間拉到過份地長
所以呢，想巴士服務穩定的話，鏟除繁忙地區既私家車啦
頭先坐98D先好笑，彌敦道南行柏麗大道車龍塞到上柯士甸道
成條龍得三幾架巴士，其他全部都係私家車，運吉仲好意思話係巴士導致擠塞