[放榜前夕分享]昔日會考狀元，現在又如何？

臨近第一屆文憑試放榜日，只是少少有感而發。

===

剛過去的一個月，放假回過香港，跟不少舊朋友、同學飯局相聚。
我在香港的社交圈子裏面，會考尖子不計其數，
當中不少是中學同校或同班同學，又有一些是在別處認識的。
一般人的圈子裏大概沒有太多所謂「狀元」，也許未必對他們有太多了解，
以為舉凡「狀元」必高不可攀、有宏大理想鬥志，
手執一張眾人夢寐以求的會考證書，即代表事業一帆風順，
起步點遠遠超前別人，日後必能順利躋身中產甚至上流社會行列。
但事實又是否如此？且看幾個我認識多年的真實例子：

1. 會考九優，眾人心目中的模範高材生，
滿懷理想熱誠，入讀大學建築系（畢竟是相當稀有），
惜首年即被壓力摧殘，且身子不佳，一場大病，入院動手術，
自此發現無力應付課業，被迫轉系，從此鬥心不再，
且未有明確人生目標。大學畢業後，到補習社工作約一年，
決定辭工休息數月，日後再作打算。

2. 會考十優，是我本科生時代到美國當交換生時所認識。
中學時代屬天之驕子，憑全額獎學金到美國某知名度甚高大學升學。
惜似乎未能適應美國本科教育對學生自主學習、自行「執生」之要求和訓練，
且美國著名大學，能入內就讀者多為天資聰穎，自此一蹶不振，
成績平平，曾希望當科學家的他，竟失去人生目標，
不願上學，更一度打算以漫畫家為終身職業。
猶幸此君仍能笑臉迎人，為身邊的朋友帶來歡樂，甚得包括我在內的一群朋友喜愛。
經過朋友鼓勵下，他嘗試重拾自信，畢業後近一年時間待業，
期間畫漫畫、寫facebook apps打發時間，最後終決定找工作，
旋即在一跨國工程公司找到工作，終於開始重拾人生目標。

3. 跳班會考生，初認識此君時，尚未參加會考，但包括我在內一眾朋友
已下定賭注，日後必成為會考狀元，更在當年會考放榜前一晚
已能推斷其會考成績。結果成真，得傳媒大幅報道，後入讀醫學院。
惜入讀大學後，或因參與不少課外活動的緣故，成績未算相當理想，
至醫科三年級結束，本來希望當精神科醫生的這位朋友，
終發現自己較喜歡輔導工作，毅然轉系讀心理學。
這三年時間是否浪費，可謂見仁見智。

4. 會考八優，入讀一門許多把錢途和前途畫上等號的家長學生
趨之若鶩的學科，該系畢業生，月入數萬元甚至更多者為數不少。
但此君決定不以物質生活為追求目標，反希望透過非政府團體的工作貢獻社會。
此君對國際格局、政治時事認識甚深，絕非泛泛之輩，
去年更曾自掏腰包，到敍利亞、巴勒斯坦、以色列、埃及、約旦等地旅行，
了解當地風土人情、地緣政治與宗教衝突。
此君人緣甚佳，惜非政府團體憎多粥少，畢業兩年至今仍待業，
但堅拒接受其他一切有違信念的受薪工作，其風骨令人從心底尊敬。

===

上面幾個活生生的例子，旨在說明：一張公開試證書
只是代表一個階段的完結，和另一個新階段的開始。
公開試的贏家並無絕對優勢，輸家也不一定比人弱。
進入大學、進入社會，只是人生新一個階段的開始；
大家的起步點是一樣的、平等的，
還須有著明確目標，知道自己所追求者何事，
並朝著目標奮鬥不懈，不受外來困惑阻擾，方有成功機會。

因此，成績欠理想者無須氣餒，新一輪洗牌行動旋即開始；
成績驕人者，亦宜了解個人興趣及長短、堅定目標，
下決心奮鬥，以上述例子引為參考。
訂立目標時，亦宜從多方面考慮，尤其對社會的貢獻方面，
還望有能力之士，不單以前途或錢途作衡量，
多關心社會時事，善用自己的天賦能力，
為自己今日的處境感恩，多作對社會有益的事。

共勉之。

[ 本帖最後由 S3BL100 於 2012-7-19 13:37 編輯 ]

小弟認識的人都係, 會考考得叻的, 前途未必一片光明, 反而很多考得唔叻的同學, 事業卻一帆風順......
小弟有個同學, 會考得幾分, 現在工作於Intel公司.......

香港地, 唔讀商唔讀專業人士, 一般人以為窮途末路。
有時我會想, 成功失敗, 誰有權去批評？

以前有同窗有律師唔做, 畢業轉行去教書, 很多人覺得浪費。
今天, 她比同年畢業的都要快樂。
每日做自己喜歡的工作, 流利英文加上極強邏輯, 要升職指日可待。
反而一般同學, 日以繼夜在律師樓對住一大疊IPO, 做得好也不會是幫人還是害人。

可惜, follow your heart, 今時今日說易行難。

有人講過：
山不轉路轉，路不轉人轉，人不轉心轉。

講真丫，當你自己話「follow your heart說易行難」的時候，
其實這句成句先係你個「heart」喎。（無貶意，只係抽邏輯）

認命、因循、不敢冒險，當「理想」因這些理由被犧牲時，
亦代表這些才是心中所想，是這個人的真正特質。
無對與錯的，係每個人的選擇。

所以我都唔會同人講我有咩理想......
有份發揮所長的穩定工作、唔憂食唔憂住、
身體健康、家庭和睦，這些就是理想了，唔得咩？

我都曾經係一個成績優異的學生，但我小學已經覺得好辛苦，
到中學我唔會再同人爭乜野，所做的只需要對自己有交代。
會考高考，成績唔算標青，但都算實在係反映自己的水平，
入到大學讀自己喜歡的科目（明知出路唔多），多A到自己都唔信。
當然一山還有一山高，這個道理我一早明白，讀到MPhil已經好好彩，
到最後決定唔再讀上去，亦唔覺得有甚麼浪費或者損失，要學的都學懂了。
到頭來，公開試係咩成績，除了搵工時要填一下之外，對整個人生又有多大意義？
去到interview人地都唔係好理那十年八載前的成績。

引用師兄幾句歌詞：

每個選擇都有遺憾　每個遺憾都有轉機　
月落日出柳暗花明　人還在　心存感激
尋尋覓覓更在乎過程　兜兜轉轉一樣的結果　
踏破鐵鞋不經意地　答案出現　竟忘了問題是甚麼



[ 本帖最後由 DIH 於 2012-7-19 17:27 編輯 ]

Follow your heart 難在面對世人目光,
好多三姑六婆、蠶蟲師爺最鐘意好為人師, 世事都被佢地看透咁指指點點。

「讀咁多年書你轉科？浪費好多時間喎... 」
「唔係呀？好地地轉乜呀？搵唔到食架喎... 」
「不如做呢樣啦... 」
「我有個朋友個仔呢就點點點點點...」

一人一啖口水都浸死你。
我只需要對自己生命負責, 干卿底事？
做塘邊鶴講就容易, 但對其他人帶來幾多心理壓力？

近年我經常搵藉口唔去拜年, 最好去旅行去camp。
自問而家都唔失禮, 但拜年三姑六婆比較就在所難免,
廢事好過人會令人尷尬, 人地好過我令自己尷尬。

原帖由 kwyeung 於 2012/7/19 20:19 發表
近年我經常搵藉口唔去拜年, 最好去旅行去camp。
自問而家都唔失禮, 但拜年三姑六婆比較就在所難免,
廢事好過人會令人尷尬, 人地好過我令自己尷尬。

如果可以, 更高層次係人哋講乜我唔會放在心, 自己亦唔會特別講述自己嘅事 (好和唔好的都是), 對自己的事負責, 並充滿信心, 那麼, 根本不用逃避三姑六婆。

原帖由 kwyeung 於 2012-7-19 20:19 發表

一人一啖口水都浸死你。
我只需要對自己生命負責, 干卿底事？
做塘邊鶴講就容易, 但對其他人帶來幾多心理壓力？

無錯。

尤其是呢班三姑六婆，好多時以為自己咩都知，
實際對於而家世界格局、不同行業、學科的情形都一無所知。
所以我心底對呢D人其實有好多說不出的意見，當然好多野聽左就算。

有時even屋企人都係咁，例如我老豆以為我可以走去搞太空船，
又可以搞原子彈，呢個思維仲停留晌五、六十年代。
唔好意思，太空船係aerospace engineering的人做的，而
原子彈亦唔係我個discipline的未來，我個discipline的未來係講緊點樣同biology結合。

點都好，最緊要係自己對得住自己，有明確目標，
知道自己想做乜，並朝著目標努力。
人生如果無目標，只係混混噩噩，唔知自己想點，只曉得隨波逐流，才是最痛苦。

偏偏香港教育不強調獨立思考，不強調理想、不強調如何發掘人生目標，
強調「求同」但不著重「存異」，社會風氣亦如是。
老實講，年年上報紙果堆狀元，記者面前講野天花龍鳳，之後個個入晒去讀商，
佢地講果堆野有幾多來自真心，有幾多信緊自己講既野，我真係唔知。
亦難怪唔少狀元、優異生入到大學，無左人生目標，最後浮浮沉沉。

中學讀書叻，都係中學模式叻姐.....

其實最上到位既係努力型中上游果班，佢地唔係計上補習社果D，上到大學好快就轉到型，而且佢地往往都特別有食力(大概努力型都有辦法食住D3姑6婆)

最開心都係黎班人.....而最易曬時間既人除左狀元，仲有果D死谷爛谷+聽3姑6婆選科既人.....例牌十大賺錢科目.....

果D人有D出到黎做會計做左幾年先問自己做緊咩.....幾慘，但己經聽D好親朋又買樓又買咩，無法甩身.....

路係自己既，如果自己都唔信，咁不如就亂黎好過

有幾多個讀商既真係有興趣一個商業模式，我覺得100個都未必有1個.......

ps:最近睇見D補習廣告就頂心頂肺，夢想做會計？我夠膽講香港無幾多個做會計既真係愛會計，搵錢姐嘛 黎D又係3姑6婆式洗腦廣告囉.....

好老土講句
睇返以前有D小學同學去到CE連f.6都無機會讀
又或者同自己熟D既中學同學去到CE幾乎全部都留唔返原校
但係反而到而家
我敢講絕大部份人既前途都一片光明
好過我唔知幾多
一個回合既勝負其實真係未必咁大不了
尤其而家D家長成日話要"贏在起跑線上"我就覺得sai氣
人生唔係100米短跑
搶閘就跑出果D又有幾多係會由頭帶到落尾