[Exeter, GB] 老一輩港人都熟悉的第一代後置引擎巴士

電話鏡頭、拍攝技術及相片質素差劣，請洗眼


Exeter 估計算係 Stagecoach South West 分部既曬命城市，雖然不斷接收其他地區換入既舊車
但都有唔少一手新車撐場，亦不斷將用舊左既車"發配"去周邊城市
由於城市規模細，Stagecoach 個辦公室同車廠就開左係 Exeter Bus Station 隔離街，分分鐘係全英國最近市中心既巴士廠


接近一年前行過該車廠，廠外有磚牆圍著，只得一堆雙層巴士凸左個頂出黎
某晚行過見云云巴士頂中，有一部寧舍甩色生晒鏽，最初覺得可能係退役無耐既車做貨倉
至今年初日間時份，該車周圍既現役巴士開走晒，望落架車個車身似乎未必係近幾年退役既舊車
最初諗到既有丹拿 CVG_、Bristol VR、Dennis Dominator 甚至 Guy Wulfrunian
後尾見梯位無司機位上落用既門就覺得應該係後置引擎車 (Wulfrunian 梯位通常係左邊)
車身顏色睇真 d 雖然都係有紅有白，但唔似 Stagecoach 主色，似似地舊時 Devon 呢邊巴士公司既用色
係咁意查下車隊歷史，似乎西南邊好多 Bristol VR 系列，不過一路搵唔到被保留/收藏又收得咁爛撻撻既 Bristol VR......


去相先，由於附近無地方可以企高，而磚牆中間每幾個車位就有一條罅，可以用電話影
或者兜個大圈到車廠正門影，但日光日白實在無乜可能可以影到無車阻無人阻既相
再者車廠大閘比較入，行到閘口影感覺好突屹






相中最後面四四方方 d 窗好似一個個長方形窿既建築物好似係社區會堂之類，從該處向著相機方向數過黎
首先會係 Exeter Bus and Coach Station，以鋸齒排狀方式十部八部巴士一齊斜斜地插入站上客
巴士總站後面就係 Exeter 巴士泊車場 (話晒 Stagecoach 地頭，泊既巴士以佢佔大多數，但亦有其他公司車輛停泊)
主要泊現役車、訓練車同大大後備車，夜晚收車泊爆晒就會泊埋上巴士總站既車位同埋周邊通道，
只留翻兩個月台俾半夜仍然有用既巴士同 Coach 線
再隔一條馬路數過黎就係相中呢個用磚圍著既車廠同埋 Stagecoach South West Office，相信停放要修理同改裝既巴士
例如近幾次行過都見到全紅色雙層車泊係度等變身，倫敦個種紅色同 Stagecoach 橙紅色唔同，日頭好易認得出 (不過拍攝當日就剛巧見唔到)







如果唔係日頭周圍巴士走晒，騷眼望埋個車尾都未必察覺有部古董泊係佢地一堆可以隨時開走既現役車中間
分分鐘同 Stagecoach 一堆圓圓地既 E400 車頂混淆



只可以從石罅影入去



望見塊後波燈牌只覺得熟口熟面





間條地板好似有少少面善，凳既樣諗起城巴坡柴 (只爭椅背上跟著椅背形狀一齊彎彎地既扶手)
司機位左邊個舊斜斜地金屬面控制台令人諗起珍寶，細個見過中巴司機棟隻腳上去渣車，都真係驚驚地萬一行車期間踩熄左踩開左某 d 掣會有問題





再近鏡同影右少少可以見到行李架
另外，事後睇翻擋風玻璃上面既 8_2 原來已留下伏線，說明架車既身份，另一伏線係頭先塊"Reversing"牌



唔知點解鬼佬好似好多青靚白淨後生仔做司機同車房




拍攝當日多左個貨櫃係度，之前左右無車又無呢舊野，就見到此車梯位同下層，推斷出係後置引擎巴士



拍攝當日氣溫高達 20℃ ，烈日當空圍著巴士廠影左半個鐘都無已經熱同曬到暈陀陀
英國巴士乘客咁神的？雙層巴士咁細隻窗都可以照坐如儀......



兜個大圈從車廠另一面影過去，閘口比較入，而自己身處行人路上，旁邊係巴士洗車機入口
巴士要洗車就會駛上本人身後個截行人路上前往藍色私家車尾方向既洗車機入口，所以基本上該段行人路都算埋 Stagecoach 管轄範圍咁濟，一大堆私家車、巴士、司機、技工出出入入望著你影巴士個感覺都幾怪下

企係度既技工似乎係頭先張相同一個，動作似係修理緊架巴士



不過即使企係合法位置影入車廠，此地都係不宜久留，反正等多陣都唔見得相中主角周圍既人、車會走晒
而且呢張相差唔多夠說明 Stagecoach South West 有既大部分載客巴士 - Solo、E200、ALX400 蠆、ALX R 車身 olym、Plaxton Dart
只爭 E300 Man、E400 蠆、E400 Scania 影唔到，以面孔計 E300 同 E200 基本上都係一樣


以 Bristol VR/T 或者 Daimler Fleetline 查極都無結果，最後查到此車原來係 Leyland Atlantean，車牌 "872ATA"
Atlantean 都係將一堆控制開關擺晒落一塊 panel 度放係司機位左邊，唔怪得咁似
"Reversing" 牌令人諗起 MCW ，原來就係此車車身
車廂望向擋風玻璃既 8_2，應該係此車屬 Devon General 擁有時既車隊編號 872；車身仍然維持當年公司色彩

1959 年 6 月出牌，為最早期量產 Atlantean 之一，可算係西南邊第一批後置引擎巴士編號之首 (以底盤編號計其實係第二部)
78 座位正常高度車身，配 O600 引擎同 SCG 半自動波
翻查資料，此車只係比中巴 PDR / HA / 九巴 2L 底盤編號最細既早廿架車左右，可以話係同期生產既姊妹車黎
頓時令架車多左一份親切感，原來當年 PDR / HA / 2L 改裝前就係咁 (賣去中/九巴既唔係呢間公司既車，但配同款車身)

只不過定過神後，下一刻諗到既係 "當年批車未完全改裝車窗前，香港人點搭呢堆車架！？"
記得母親憶述過早年搭過海巴士時既苦況，話當年基本上係全車人捏著鼻入隧道的
此車出牌日子比我媽後生一個月左右，相信佢講緊既已經唔係搭呢批車未改裝時既日子，上一兩代港人真係慘



轉貼一部同批次同款車泊係 Exeter Bus and Coach Station 隔離
880ATA 既底盤編號跟香港 Atlantean 最舊既中巴 PDR15 只差 9 架車左右 (以追蹤到有紀錄既底盤計)
(轉貼自 http://transport-illustrated.blo ... er-in-eighties.html)


最近收到既消息證實埋上述照片另一條伏線，修理緊架巴士既技工好有可能係 Stagecoach South West 既員工之一
再細心睇翻上面輯相，車頭其實可以見到一堆銀灰色，似換過車頭傍板或者車頭燈
兩個月前此車正式由 Stagecoach 代為保管變成 Stagecoach 古董巴士一份子，並獲發用以區隔古董車既大 number 雙層車隊編號 19993

相片拍攝日子好似係 4 5 月咁上下，記得之後幾個月曾抱有一絲希望心態再睇過部車，似乎修復進展甚慢
車身多左一兩張 "嚴禁拆件" 既英文告示，算係防止錯誤當左此車做零件車
根據網上資料，此車被收留前已係西南邊荒廢一段時間，不過有心唔怕遲，相信一兩年內架車終有一日變得翻以前咁
希望香港各處荒廢多年但仍然存在既巴士都有人救啦，救唔翻變成 1:1 立體模型都好過無



[ 本帖最後由 HW8373 於 2012-11-9 17:46 編輯 ]

批車係中巴HA 定係XA?

原帖由 king 於 2012-11-17 16:34 發表
批車係中巴HA 定係XA?

中巴 HA 或者部分九巴 2L

XA 算係後期好多既版本，相信底盤有所改良，引擎亦係後尾坡柴所用既 O680

呢批車係咪嚮書度話當年專跑城際,下層有廚房廁所既客車?
仲好似話當年中九巴買呢堆二手車隨車附送米奇老鼠

原帖由 DW8306 於 2012-11-26 15:38 發表
呢批車係咪嚮書度話當年專跑城際,下層有廚房廁所既客車?
仲好似話當年中九巴買呢堆二手車隨車附送米奇老鼠

如果根據《車主》所述，只是九巴專門購入行走城際路線的 Atlantean，所以車內便設有廚房及洗手間。

原帖由 hkaiw 於 2012-11-26 20:41 發表

如果根據《車主》所述，只是九巴專門購入行走城際路線的 Atlantean，所以車內便設有廚房及洗手間。

原車主係邊間公司?
廚房同洗手間係車內咩位置?
另外呢d 設備有冇係香港使用過?保留左幾耐?

原帖由 raylex 於 2012-11-26 23:22 發表
原車主係邊間公司?
廚房同洗手間係車內咩位置?
另外呢d 設備有冇係香港使用過?保留左幾耐?

當時批客車九記係由Ribble巴士公司引入，九記引入呢批車係因為佢哋裝有氣墊避震同高背坐椅，行長途會舒適啲，當時九記全數72部Atlantean入面只有14部係客車版(2L9-21及61)，廚房同洗手間係設於樓下車尾位置，九記買左呢批車後，即將所有廚房同洗手間拆除

[ 本帖最後由 bbahwing 於 2012-11-27 21:41 編輯 ]

原帖由 bbahwing 於 2012-11-27 00:24 發表


當時批客車九記係由Ribble巴士公司引入，九記引入呢批車係因為佢哋裝有氣墊避震同高背坐椅，行長途會舒適啲，當時九記全數70部Atlantean入面只有14部係客車版(2L9-21及61)，廚房同洗手間係設於樓下車尾位置，九記買左呢批車 ...

當年是否全批2L(9-79)都係氣墊避震, 定只係AD車牌果批?

那麼XA, LA同HA是否用葉片彈簧?

(好彩澳洲新南威爾斯政府不批准悉尼賣PMC車身Atlantean給中巴, 它有風油軑同氣墊避震, 如果唔係, 港島區在80年代至90年代初期真係唔洗旨意坐到新車)

[ 本帖最後由 gordon 於 2012-11-27 14:27 編輯 ]

原帖由 gordon 於 2012-11-27 14:22 發表
當年是否全批2L(9-79)都係氣墊避震, 定只係AD車牌果批?

那麼XA, LA同HA是否用葉片彈簧?

(好彩澳洲新南威爾斯政府不批准悉尼賣PMC車身Atlantean給中巴, 它有風油軑同氣墊避震, 如果唔係, 港島區在80年代至90年代初 ...

當年氣墊避震係屬附加設備，一般城市巴士都不會採用，只有長途客車才會用到，所以應該除左AD牌Atlantean外，其他二手Atlantean應該係用葉片彈簧

[ 本帖最後由 bbahwing 於 2012-11-28 16:28 編輯 ]

原帖由 bbahwing 於 2012-11-27 00:24 發表

當時批客車九記係由Ribble巴士公司引入，九記引入呢批車係因為佢哋裝有氣墊避震同高背坐椅，行長途會舒適啲，當時九記全數72部Atlantean入面只有14部係客車版(2L9-21及61)，廚房同洗手間係設於樓下車尾位置，九記買左呢批車 ...

Ribble巴士客車版原名係Gay Hostess，個廚房/廁所ｏ係下層最後一隻半窗

大家可以Google搵"ribble gay hostess"，會有好多相，
真車又有，模型都有