香港以鋼材為主要結構的建築物

http://www.hkitalk.net/HKiTalk2/thread-740104-2-1.html
承接以上連結之原文，為免離題，故在此貼文。


現時香港部份商廈的主要結構為鋼材（升降機大堂、升降機槽、洗手間等為鋼筋混凝土結構），如IFC, 港島東中心等。
為何上述大廈的辦公室部份，採用鋼材為主要結構？

[ 本帖最後由 dongfeng 於 2012-12-1 16:33 編輯 ]

輕先輕得高....但主要結構我又好少見只用鋼，要知香港D法例， IFC成個軸心都係石屎......咁既結構飛機撞都實正好多...

你可以睇睇D高到傻既住宅用石屎起，低層D風力牆粗到爆(高層都粗？個設計師唔多掂囉，咁曬料)

原帖由 DGCNYO 於 2012-12-1 18:19 發表
輕先輕得高....但主要結構我又好少見只用鋼，要知香港D法例， IFC成個軸心都係石屎......咁既結構飛機撞都實正好多...

你可以睇睇D高到傻既住宅用石屎起，低層D風力牆粗到爆(高層都粗？個設計師唔多掂囉，咁曬料) ...

如果WIND LOAD DESIGN過唔到BD(太墨守成規)
想幾慳都無用

其中一個例子, 全鋼結構, 係中環HSBC 總行

其實香港較少以全鋼結構建築物, 主因並唔係因為法例/安全, 而是金錢,
因為鋼本身好貴, 全鋼結構會造價好高, 而中環HSBC 總行現時仲係香港
最貴建築物, 大家就知道

(依家D人渠蓋都偷, 可以想像金屬係好貴)

而點解外國, 包括美國, 咁多全鋼結構, 甚至世貿都係全鋼結構呢, 主原因是
天氣及時間, 因為太凍天氣, 石屎好難搞, 要一邊等佢變硬一邊保溫, 所以外
國可能一年一大段時間係會落雪好凍, 本身唔合適落石屎, 咁工期又無理由
成個冬天唔開工, 所以佢地會選擇全鋼結構, 但香港則一年四季都無呢D問題

另外, 石屎建築唔係唔可以起得高的, 中環廣場, 曾是全港最高建築, 本身是
全鋼根石屎結構, 而D 超高住宅用石屎結構亦唔係傻, 本身係講緊錢的問題...
發展商都要睇造價

其實無論石屎定全鋼結構, 都係可以乎合香港建築物法例的, 本身無咩分別,
並唔係因為法例要求令香港較少全鋼結構建築

回應返樓主問題, 選擇咩結構, 當然有好多因素, 其中主要包括本身樓面設計,
IFC 等OFFICE點解要石屎CORE, 鋼結構外圍, 其中一原因是因為佢想有更大的
無柱OFFICE 空間, 呢D先會受大公司喜歡租用, 尤其佢地針對國際大公司, 但一般
高住宅樓, 多D柱/牆都OK, 自然就唔駛...這解釋返點解office同住宅會有唔同設計...

而有D新OFFICE 大廈, 唔駛好高, 都會用大量D鋼結構...因為鋼結構先做到更大無
柱的SPAN空間, 所以這未必只同高有關.....

(要睇唔係只睇高, 更重要係睇用途及市場所需求的設計要求)

但近年呢D設計又開始有D問題, 因為新OFFICE 用戶, 可能要放一D好重好大的電腦
SEVER, 結果呢D 鋼結構未夠FLOOR LOAD, 新D設計會加強返近CORE 結構的
FLOOR LOAD, 俾呢D公司放SEVER,

另外鋼結構比石屎結構好, 就是易於拆卸, 所以好多臨時建築都會係鋼

ICC 的大無柱空間, 成為現今GRADE A OFFICE的重要因素


ICC 工程時睇到用大工字鐵造成更長的span


而如果更重的機械設備層之下, 就要返更多更大的支撐



[ 本帖最後由 3ASV196 於 2012-12-2 02:56 編輯 ]

其實呢類Open Plan Office受歡迎又唔係太關用鋼結構事。
同樣樓面但矮D，不逾四、五十層樓高的商廈，以全石屎興建都幾常見。

係去到IFC二期、ICC呢類級數的樓宇，用鋼材做主結構會有效率D。
一來柱身可以維持合理尺吋以減少佔據樓面空間，另外鋼造樓面會輕身D，可以有效減少地基的負荷。

其他鋼結構雖然可減少佔用樓面空間，但當矮到某一個高度，效應就唔明顯。
但點解一樣有業主考慮用，其中一個因素係鋼結構興建過程比混凝土結構快，因為無需等待石屎乾透。
令樓宇更早入伙以供租售。


提一提點解中間一定係用混凝土核心，其實唔係預飛機撞。
混凝土核心除了承重外，本身亦夠硬淨，令大廈符合香港嚴格的風力荷載及擺動要求。


講番樓主提到的港島東中心，除佐外圍支柱係半鋼半石屎外（呢個算係近年發展，以取鋼及石屎之長），
寫字樓樓面都係全鋼筋混凝土。
樓面用佐橋樑常用的預應力技術，令樓板厚度可以大大減少，去解決全石屎太重的問題。
當然係有代價0既，就係設計同造工複雜得多，同埋會減少安裝屋宇設備的彈性。

原帖由 s3n370 於 2012-12-4 01:25 發表
其實呢類Open Plan Office受歡迎又唔係太關用鋼結構事。
同樣樓面但矮D，不逾四、五十層樓高的商廈，以全石屎興建都幾常見。

係去到IFC二期、ICC呢類級數的樓宇，用鋼材做主結構會有效率D。
一來柱身可以維持合理尺吋以減 ...

其實的確, 要數原因, 選擇不同結構的因素多的是.....全鋼結構, 全石屎結構,
高定矮, 住宅定office, 係不同情況, 不同場合都會有不同選擇, 各樣係香港都
有不同例子...

好似最近交易廣場中間平台加建樓面, 唔係高, 就用上全鋼結構, 相信考慮主要
重量, 尤其係現有建築上加建之考慮..

但對於鋼結構興建比石屎結構為快, 我本身就有保留, 雖然這都是我讀書時所
教的內容, 但近年隨住石屎技術進步(如有輕石屎), 石屎板模技術(各類JUMP FORM),
甚至預製石屎組件的發展, 或更強大的石屎PUMP , 石屎結構本身工期都快得多, 其實
都絕不比鋼結構慢...設計使用空間亦越來越多....

尤其睇返ICC等實際情況, 中間石屎CORE 甚至可以比外圍鋼結構更快完全, 有段時間
石屎CORE 甚至遠高於鋼結構...


(之前都講漏左, 大廈越高, 要運送工料上越高位置就更有難度, 如傳統用天秤吊石屎斗
上去天面工作, 可能變成慢/不夠效率, 可能需要石屎PUMP等, 鋼鐵亦可能有優勢, 呢D工
程時之上下物流, 都係考慮之一)

當然, 正如閣下講, 港島東中心正用了新技術以取鋼及石屎之長, 其實建築技術發展好快,
行業都因為各項新技術而不斷有新設計, 不同時代採用不同方式, 亦受工料物價等影響決定,
的確好難用一套去解釋晒所有出現之情況

原帖由 3ASV196 於 2012-12-4 04:07 發表

(之前都講漏左, 大廈越高, 要運送工料上越高位置就更有難度, 如傳統用天秤吊石屎斗
上去天面工作, 可能變成慢/不夠效率, 可能需要石屎PUMP等, 鋼鐵亦可能有優勢, 呢D工
程時之上下物流, 都係考慮之一)

當然, 正如閣下講, 港島東中心正用了新技術以取鋼及石屎之長, 其實建築技術發展好快,
行業都因為各項新技術而不斷有新設計, 不同時代採用不同方式, 亦受工料物價等影響決定,
的確好難用一套去解釋晒所有出現之情況

認同，其實要講都仲有排講。咁老實講，0係討論區都只可以好概括咁講。

原帖由 3ASV196 於 2012-12-4 04:07 發表

但對於鋼結構興建比石屎結構為快, 我本身就有保留, 雖然這都是我讀書時所
教的內容, 但近年隨住石屎技術進步(如有輕石屎), 石屎板模技術(各類JUMP FORM),
甚至預製石屎組件的發展, 或更強大的石屎PUMP , 石屎結構本身工期都快得多, 其實
都絕不比鋼結構慢...設計使用空間亦越來越多....

尤其睇返ICC等實際情況, 中間石屎CORE 甚至可以比外圍鋼結構更快完全, 有段時間
石屎CORE 甚至遠高於鋼結構...

首先，“快”係講領先，定係速度果種快？

如果快係講領先果種快，即係興建期間，核心比外圍高幾層的話。
係IFC呢類摩天大廈，其實係好常見的安排。
咁做好大程度上係滿足施工需要，俾混凝土泵、天秤、臨時風火水電等外圍工程所需工具、支援設施可以預早安裝。
以及當核心部份需要變動（如隔火層、機電設施預留位、即時改動）時，仍有時間走盞。
（即核心部份工程可以稍為減慢甚至停頓，而無需叫停外圍工程而影響進度）

速度而言，一般承建商都調較到兩者差不多速度，以更好運用機械等資源。

所以，ICC呢個例子，又好難用黎概括邊一種形式快D。